ნოდერეფე ჩქინი ორა მოხთაშკულე ონტულეშა დოლოვიტით. ბერგითენ ღერეფე პკვათუფტით. ემ ღერეფე ფთირუფტით დო ონტულეშ ხოლოს ნა მიღუტეს კუის დოლობღაფტით. ემუშ ჟინ ჟვარეფუნა ჲევობღაფტით ქი კაიხეშა ხცას დო ონტულე შენი გვანა ოყოფინუ შენი. ეჲა დოხცატუში ტიკინაფეთენ ფთირუფტით დო ონტულეს ჟინ გევობღაფტით. ახირიში ლაზმა ტიკინაფეთენ ფთირუფტით დო ონტულეს გევობღაფტით. მარა ჟურ-სუმ მეტრო არათენ გევობღაფტით ქი ონტულე იმგვანას დო კაიშა ლაზუტი, ლუყუ დო ჩქვა დო ჩქვა მერგჲაფე ოყოფინუ შენი. ობელუშ ორას, ბელეფე ჲებზდიფტით დო ონტულე ობელუშა მევულურტით. ამ ობელუშ დულჲაფე, ნამთინი ორას ოხორი ჩქინიში კოჩეფე კალა ვიქიფტით, ნამთინი ორას ნოდერეფეთენ ვიქიფტით. ჩქინდა ნა მოხთატუ კოჩეფეშა ჩქინთი მევულურტით. ანთეფე დიჩოდუშკულე მულურტუ ოხაჩქუშ ორა. მარა, კუკუშ ოყურუ ვა ვოგნაფთტათშაქის ოხაჩქუს ვა გევოჭკაფტით. მუშენი ქი, კუკუქ ოყურუს გჲოჭკატაში ოხაჩქუშ ორა მოხთუ ჲა მიჩქიტეს. ნამთინი ორაფეს, ჩქინ ოჶუტეს ფხაჩქუფტითში კუკუშ ოყურუ ნა ვოგნატით, ონტულე ნა ხაჩქუფს მთელი კოჩეფექ ართოთ: ” კუკუ, კუკუ, კუკუუუუ.... დიყუ. მუნდეშაქის ყურაფ! ვა ძიროფ-ი? ფხაჩქუფთ იშთე ჲა.” დო ემუს შაკაფეთენ ნენა მევუქთირაფტით. აშო დიდო მუთხანეფე, შაკაფე ვიქიფტით. ართოთ ჩქინ მთელი კულანეფექ ვიბირტით, ათიშმაფე ვიქიფტით, ბღარღალაფტით, ვიძიცაფტით დო ეშოფეთენ ბაჲრამი დო ჭანდაშ შენლუღი სთერი ვიჩალიშეფტით. ფხაჩქუფტითში ბელეფეს ეშო ჟურდო-ჟურდო გეფჩაფტით. მუჭო ეშო ბირაფაფეში ხონარი სთერი მსქვაელა ხონარეფე გამულუტუ ოშქენაშა. მანძაგერეფექთი ეშო მელენ კელეშენ, ხელებათენ ჩქინდა მენდამიწკერტეს. ხოლო ეშო მელენ კელეშენ თითო თითო მსქველა ნენაფე მიწუმერტეს. იშთე ემ ორაში შენლუღი ჩქვაფებურა იყვეტუ. დოფხაჩქაფტითშკულე ართნერი ხოლო გოვიქთერტით დო ლეტაფე გეფათხუფტით. მუშენი ქი ლაზუტი კაი ჲეხთას ჲა დო. ჩქინდენ წოხლე, ამ დულჲაფე იხვენეტუში: ჲენგეფე, ჯუმადეფე, ნანაფე, ჯუმალეფე, ბერე-ბარიქ, მთელიხოლოქ ართოთ იჩალიშეფტერენან. ჩქინი ორაფეს, არხვალა კულანი დო ოხარჯაფექ ვიჩალიშეფტით. ემ წოხლენერი ორაფეშა გჲორა აწი დიდო კაი ორას ვორეთ. ემ ორაფეს ჶუკარობა დიდო ტუ. მარა ემ ორაფეს, ამ დულჲაფეშ ოხვენუ შენი მეტი კაი შენლუღეფე იქიფტერენან. კულანეფე დო ბიჭეფე ართიქართი ყოროფტესში მარა ოქიმოჯუ დო ოჩილუშ იზნი ვა მეჩაფტესში იმტერტეს ართიქართის. ე დო ემუშენი აშო სვაფე ოყოროფინერეფე შენი ოძირამუ, სევდალუღეფე შენი ოყოროფუშ სვა ტერენ. ყოროფერეფე ართიქართის ვა ძიროფტაშა ნოდერეფეს, ბირაფათენ ღარღალაფტერენან. ემ ღომანერი ბიჭეფექ, ყოროფერი მუშიშა შაკა ოხვენუ, ჰემთი ვა მიჩინას ჲა დო ოხორჯაშ ფორჩა დო კაზი მუითუმერტერენან დო კარშილუქლი იბირტერენან. აშოფეთენ თითო თითო შაკაფე იქიფტერენან. ყოროფერი კულანეფექთი, ნამთინისთი იმტერტერენან ოქიმოჯუ შენი. ყონაფე ქეშახაჩქანში, ყონაშ მანჯეშ კუჩხეს გჲაკნეფტერენან დო ოჶუტეშა დოლოთირუფტერენან ოძიცინუ შენი. ემ ორაფე, ნანა დო ბაბა ჩქიმიში ორაფე ტუ. ჩქინი ორაფეს აშო მუთხანეფე ვა მიძირუნ. ეკულე არ თუთაშკულე ოჶუტეფე მოლუფტით. ემუშკულე ლაზუტი იყვეტუ. ოხორის ხარმანეფე ოკოვობღაფტით. ნოდერეფე ვიქიფტით ლაზუტიშ ოცხუნუ შენი. არ სერის ემუშ ოხორის, მაჟურა სერის ჩქვაშ ოხორის. ე დო ეშოფეთენ ართოთ ვიჩალიშეფტით. ემუშკულე ჭვარეფე ბგიბუფტით, ხილეფე პწილუფტით. ხარმანი ქეშიჩოდუში გიბერი ჭვარეფე, ნა პწილით ხილეფე დობდუმერტით ტეფსეფეთენ დო ვიმხორტით. ეკულე, ნა პტახით ლაზუტიში ჩალაფე ფჩალუფტით ფუჯეფე შენი. არ ორაფეს, აშო დულჲაფე იხვენეტუში არ მითხანის ცხენი ქაგუნდინერენ. მციქათი ტერენ გოსავახერი. ნა გუნდუნუ ცხოვარიშ ჯოხოთი ვა რთი უჩქიტერენ. ე დო, ქოდიქაჩერენ არ ხეში ჩალა, აშო თქვერენ: “აჲა იმხორს, აჲა ძგუფს. სოთი ძირით-ი ჲა?”. ნა ხაჩქუფს მითხანეფექთი ძიცინათენ აშო ნენა გჲუქთირერენან: “ეჲა რენ ბექითი კუდელხაშარი თი-მანგანა. ემუშ ჯოხოთი რენ ცხენი” ჲა. ე დო ამ ნოთქვამეში პაშურაფეთი აშო ტერენ. ლიმხანაფე პჭკირუფტით მანგალითენ. ხეში ხეში ვიქიფტით, თაფალა ნჯაფეს გელაბდუმერტით დო ხომუტაშაქისთი ფჩუმერტით. ანთეფე დიმჭითანაშკულე წიწილაფე ქოდინჯირტეს დო კორობუფტიტშკულეთი მაშქურინეტეს დიდო. მუშენი ქი უმიმხორნან ჲა დო. ე დო ემუშენი ანდღალაფესთი ხოლო წიწილაფე ყვილუფან. ვარნა, კანთხა დო ჩქვა არ წიწილაქ კოჩის მცუდიშიში ვა გჲაკიბინს. წიწილაში დიდი შქურნა აშოფეთენ მოხთუ ანდღალეფეშაქის. ხოფა ჩქინის, ემ ორაფეს ეკო დიდო წიწილა დო კანთხაფე ტუ ქი ბიგაფეთენ გოვულურტით ონტულეფეშ დოლოხე. ჩონჩიშ ოქოსუშათი მევულურტით გერმაფეს დო ჩქვა სვაფეს. მუჭოში ქი, ფაცხაფე მოკიდერი დო ბუცხი დოქაჩერი მევულურტით ყონაფეშა, გერმაფეშა დო ჩქვა სოთხანეფეშა. მარა ოქოსუში ნდღას კალაში ვა იყვასუნონ. მუშენი ქი, ემ ორას დიდო კაპეტი იყვენ დო ქოსუფტაში ჩონჩეფე იშირშოლენ. მციქა აშო მჭიმა მოდგინერი ტარონი ტას ნა კაი ჩიჩქუ იყვენ დო ფაცხასთი კაიშა ინტრენ. ეკულეთი, ფაცხა კაპულას მოვიკიდაფტით დო ოხორიშა მოვიმერტით. ახირეფე მიღუტეს ჩონჩიშ მეშაბღუში, დღას სუმ-ოთხო ჶარა ფუჯის ეწარჩუ შენი. ყონაფეს დიშქა ოკვათუშა მევულურტით, დიდო მენდრა სვაფეშა. ემ ორაფეს ჩაი ვა რტუ, თხირითი ეკო დიდო ვა რტუ. ე დო ემუშენი ხოლოს მთელიხოლო ყონაფე ფხაჩქუფტით, დიშქა ნა კვათუფტით სვაფეთი მენდრა დომისქიდერეტეს. ამ დულჲაფეთი ხოლო ვიქიფტით ნოდერეფეთენ. ეკულეთი სილეფეთენ დიშქაფე ფჩითუფტით, აქირიში ხერხითენ ხე ნა ვა გუინჭიშინენ წიფური დო ჩქვა ნჯალეფე ხეში ხერხითენ ფხერხუფტით. თხირი პკორობუფტით, ფცხუნუფტით. ქჲუმეფე ვიქიფტით ყურძენიშენ, მისიხურმაშენ, უშქირიშენ, მცხულიშენ, ჩქვა დო ჩქვა ხილეფეშენ. პეკმეზითი ვიქიფტით აშო ხილეფეშენ. ე დო ეშოფეთენ ფსქიდურტით იშთე.