26.08.2005 თარიღონი კოლხობაშ ჶესტივალიში დისკორსი ხელაკაობა, დალეფე დო ჯუმალეფე, ხელაკაობა, ღორმოთიში მსქვა კოჩეფე, ხელაკაობა, მჯვეში კოლხეფეში მოთალეფე, ხელაკაობა, ხორცი დო დიცხირი არ ნა ვორეთფე, ხელაკაობა, დობადონამშინეფე. თიეფე ჩქინი ემთინერი რენ, კაპეტიში კოლხი კოჩეფე ნა ვორეთ შენი, თოლეფე ჩქინი გონწკიმერი რენ, მთელი კოლხეფე აქონაშის ნა ვიძირეთ შენი, გურეფე ჩქინი ფათქალერი რენ, კოლხეფეში ჭიპონი ნა ფშიგნამინონან შენი, ხეეფე ჩქინი მენჯელონი რენ, კოლხეფეში დიცხირი ნა მიღუნან შენი, კუჩხეფე ჩქინი თირთინერი რენ, კოლხეფეში ხორონი ნა ვისთერამინონან შენი. მარიაშინაში ამსქვა ნდღას, კოლხობაშ ჶესტივალი შენი აქ ვორეთ. თურქეთის ნა სქიდუნან დო აქ ნა ვარ მალეს კოლხეფეშენ დიდო სელამი მოგიღით. ენთეფეში გური მთელი თქვანი კალა გონდვალერი რენ. ნეკნა ნა გოინწკუშენ დონი, ართიქართი კალა ჩქარ პრობლემი ნა ვარ უღუნან ოქორთურა დო თურქეთიში ხალკეფეში მეგაბრობა დო ჯუმალობა შენი აქ ოკოვიბღით. საქართველოს რესპუბლიკა კელეშენ ორგანიზაცია ხვენერი ნა რენ ამ ჶესტივალიშა ნა მოფთით შენი დიდო ხელებერი ვორეთ. ხელებერი ვორეთ,უჩაზოღაში პიჯის,ჯღატა ნცაში თუდე,მოდული ლეტაში ჟინ სქიდალა მიღუნან. ელამცქვერი ვორეთ, ფესონი ისთორია, ხამფა კულტურა, მჯვეში ცივილიძაცია მიღუნან. გურონი ვორეთ, მაფა აჲეთი, მაფა გუბაზი დო მაფა ქუჯი მიყონუნან. მენჯელონი ვორეთ, ხვამერი სვარაფე, დიდი ოხვამეფე, ღორმოთიშა ოჯერუფე მიღუნან. მეშვენერი ვორეთ, ჭაკუჭი სთერი ბიჭეფე დო ჭინკა სთერი კულანეფე ჩქინი ირდენან. აკონარი მუთხანეფე მიღუნან მარა ართიქართი კალა ნა დიბაღას კონარი კონტაქტი ვარ მიღუნან. სინორი გოინწკუშ კულე ვიტოშქვით წანა გოლახთუ მარა ართიქართი დიდო კაი ოჩინუ ვარ მიღუნან. ჟურ მანძაგერი თერე ვორეთ მარა ართიქართიში მსქვანობაფე ოძირუ ვარ მიჩქინან. ელანცახერი კოჩეფე ვორეთ მარა ართიქართიში კაი ნდღალეფეს ოხელუში, პატი ნდღალეფეს ომგარუში ამბარი ვარ მიღუნან. ეკონარი კითხერი დო გონჭკირელი ვორეთ მარა ართიქართიში ნოჭარეფე ოკითხუში ონჭელუ ვარ მიღუნან. ემუშენი, აშო მსქვა ნდღალეფე დიდო ჩქვა მაყვან, დიდი ჭანდაფე გებდგათ, გოხთიმუში ორგანიზაციაფე პათ, კულტურაში ოკრობულეფე მოვუნძინათ დო დორკინერი ნა მიღუნანფე ორდოშენ დოვოჩოდინათ დო დოვიგურათ… ნენაფე ჩქიმი მევოჩოდინაფტაში ბზოპონ ქი; ყოროფელი კოლხი დალეფე დო ჯუმალეფე ! მსქვა ნდღალეფე დო თანერი ჭუმანეფე ჩქინი იყვას. ართიქართის მხუჯი მეჩამუ დო ხვამა ოხვენუ ჩქარ ვარ გომონჭკონდან. ღორმოთიქ მეგაბრეფე ჩქინიშა მენჯელი, მტერეფე ჩქინიშა შქურინა მეჩას. დოსქიდას კოლხეფეში ართობა, მეგაბრობა დო ჯუმალობა…