ნა ნიშქვინენ ლაზური მსქიბუფე მსქიბუ ნა კიდუფტა, ილლა ღალი ტასუნონ. ღალიშ ქინარის კიდაგინონ. ღალის ქინარის ოკიდუ კაი ვა რენ ნა, ხენდეკითენ მუყონოფან კაი სოთიშა დო ექ კიდუფან მსქიბუ. წკარი ხენდეკიშენ მულუნ დო მანჩხაშა ნულუნ, მანჩხაშენ ნულუნ ღურნიშა. ღურნის უღუნ სპინა, წკარი ნა ომჭიფანაფს დო გეჩაფს ჩარქის. სპინა იქიფან ნჯაშენ. გამახუტონუფან ბურგითენ დო არკელე წკარი ნა მულუნ სოთიკელე, მციქა მოფართანერი უღუნ დო ენა გამულუნ სოთიკელე მჭიფე უღუნ, ხონისთერი რენ. ჩარქის მსვაეფე რენ ჩანერი. სპინაშენ ნა გამახთას წკარი ნატენ მსვას დო ობურბალაფს, ოქთაფს ჩარქი. ჩარქი გედგინ ფოლადის, ფოლადიშ ჟინ იქთენ. ორდო ვარ იშირენ, კაპეტი რენ. ჩარქიშ ნჯას გუშუძინ ლაფირა. ლაფირას თის მოჩანს აქვი. აქვის გედგინ ჟინი ქვა დო ოქთაფს. აქვი ჟურ ჭეშიდი რენ. არი რენ ჟურ ღოჯი უღუნ, არჩქვა რენ ოთხო ღოჯი უღუნ. სუმ ღოჯი ნა უღუნ ვა რენ, მა ვარ მიძირუნ. რახმეტონი პაპულიქ ნა ჭკადუფტუ აქვეფე მიჩქინ. ჟურ ღოჯი დო ოთხო ღოჯონი. აქვი კაპეტი ტასუნონ, ქვა ოქთას, ქვაქ ვარ ოჯგინას. ამუშენი ჲა ფოლადიში იქიფან ჲა კაპეტი რკინაში. თუდენი ქვა გენცხოდურეს კაპეტიშა ოქაჩუნ, ვარ ინკანასუნონ. ქვას უღუნ ხუტულა, ამუს უწუმერნან გური. ლაფირაში მჩხვანაფა გურიშა მოჩქვერი ვარ იყვენ. გური დიდი იყვენ. ამუშენი ქვაშ გურის მწკილეფე გუჩანაფან კაპეტიში დო ლაზუტი ვარ გამალას დო თუდე ღალიშა ვარ დილიბღას. მწკილი ლაფირაქ ნა შირას დო დიმბოლანას, თექრაკათი გოშოჩანაფან. არ კოჩიქ მსქიბუს ლაზუტი ქოგედუ, ქოგეწიფხუ. ოკულე ქვაშ ქინარის ქელახედუ დო ქოდინჯირუ დო მჟორას იტიბინს. მეგერემ ქვაშ გური გამალაფერი ტერენ დო ლაზუტი ღალის დილიბღენ დო ღალიქ ნიმერს. მითხანიქ, კოჩი ტუი, ოხორჯა ტუი, უწუმერს: “მუ იქიფ სი ჲა? ლაზუტი გურიშენ დილიბღენ დო სი აქ მოთ ელახერ ჲა?” შკულე: “მა ჩქიმი ეცხალა დოპი, ქოგევუდვი დო აწი მსქიბუშ ეცხალა რენ დო მქუფს ჲა!”. ქვაშ ჟინ, მციქა დარაბაკელე მოდინი რენ. მოდინითი ხონისთერი რენ, მარა მორგვალი ვა რენ, ოთხო ღოჯონი რენ. ემუში უკაჩხენი სემთი დარაბას ოქაჩუნ, წოხლენი სემთი დარაბაშენ დარაბაშა გონდვერი ნჯას ნოჭკადუნ. მოდინის ინტრენ ჟურ ფუთი, სუმ ფუთი, ხუთ ფუთი, ვით ფუთი. ჭიტა მსქიბუს ჭიტა მოდინი აყვენ, დიდის დიდი. მოდინის ეწაკირელი რენ კაიკი. კაიკი მანჩხაში მენგაფურა რენ მარა კაპულაშკელე მოთვალერი რენ, ლაზუტი ვარ დიბღას ჲადო. მოდინიშენ ლაზუტი კაიკის დილიბღენ, კაიკიშენ ქვაშ გურის დილიბღენ, მემწყვერი ჟურ-სუმ დანე. კაიკიში წოხლენი სემთის ჟურ კუნწულისთი თოკი რენ გედვალერი დო თოკიში შქას მაჟურა თოკი რენ გედვალერი. აჲა თოკიში მაჟურა კუნწული ჟინ ნა გონძინ ნჯას (მოდინი ნა ოქაჩაფს ნჯას) ჟურ კარჶი მეჭკადერი რენ დო ექ გოკირაფან დო კუნწულის მონკა ქვა გოწოკიდაფან ვარ ნასქურას, კაიკი ვარ გინჭას დო ლაზუტი ქვაშ გურიშა დიდო ვარ დილიბღას ჲადო. აჲა თოკი გეწიფხუ შენი რენ: მჩხუ მქირი გინონ ნა კაიკი გეონჭაფ დო ლაზუტი დიდო დილიბღენ; მჭიფე გინონ ნა ჲონჭაფ დო ჭიტა დილიბღენ, მჭიფე მქირი მქუფს. კაიკის ეშატუხნერი უღუნ ექ დოლოძინ ბიგაშ არ კუნწული, მაჟურა კუნწული გენცხოდურეშ დარაბაში ეშაჭკირელის დოლოძინ. აჲა ბიგას დოლოკიდერი რენ ორაკალონი. ორაკალონიში მაჟურა კუნწული ჟინი ქვას გეძინ. ქვა ნა იქთენ, ორაკალონი ოცხონტინაფს, ორაკალონიქთი კაიკი ონკანაფს ედო მოდინიშენ ნა მოხთას კაიკიშა ლაზუტი, ქვაშ გურის დილიბღენ დო იმქვენ. ქვაში წოხლენი სემთიშ თუდე ხარო რენ, მქირი ნა დილიბღენ სოთი. ქვაქ ნა მქირი დობღას, გოქოსუფან ოქოსალეთენ დო არ სოთის ოკობღაფან ხაროს. ხაროშენ ლაფირათენ, კალათის იყვენი, ჭუვალის იყვენი, დოლობღაფან. კალათი შუფან მტკეცითენ, კალათი შუფან მსიჯითენ. მსიჯითენ ნა შვან კალათის უწუმერნან ომქირალე. ეშო ნტკაბერი შუფან დო მქირი ვარ დიბღენ. ჭუვალის თის გოვუდგიფთ კერკელი დო მქირი რახატი დოლოვობღაფთ. მქირი სუმ ჭეშიდი რენ: გურიში მქირი უწუმერნან დო გალენი მქირი უწუმერნან. გურიში მქირი მჭიფე რენ, ჩორჩი რენ დო ქვაშ ქინარის მელაფს. ქვაქ მენდრა ვარ უჩუმეს. მომჩხუა მქირი ქვაშენ მენდრა დიბღენ. მასუმა რენ ქერცელა. ლაზუტიშ ხოშ ქერცელა უღუნ! ეჲა დაჰა მენდრა დიბღენ. სუმ კათი დობღაფს: გურიში მქირი, მომჩხუა მქირი დო ქერცელა. ლაზუტიში მჭიფე მქირი ქვაშ იხიქ ჲომღირაფს (ქვა ხოშ იქთენ, მუში იხი უღუნ) დო კიდაფეს, დარაბაფეს ნაკიდენ. ემუს უწუმერნან კიდაშ მქირი. აწი გინონ ნა მჩხუ ომქვაფა, გინონ ნა მჭიფე ომქვაფა, ამუშენი ქვაშ გენცხოდურეში ხოლოს მსქიბუს უღუნ ჲედაძალე. ჲედაძალეში თუდენი კუნწული ჩარქი ნა გედგინ ნჯაში კუნწულის მეჭკადერი რენ. ჲედაძალეში ჟინი კუნწულის სალისთერი ტაკო მეშუძინ დო ტაკო ნონჭაში, ქვა ჲინჭენ, გამონჭაში გინჭენ. მჩხუ მქირი გინტაში მეშონჭაფ, მჭიფე გინტაში გამონჭაფ. ბურღული გინტაში დაჰა ჲონჭაფ. ჲედაძალე ხვალა მჭიფე დო მჩხუ მქირი შენი ვა რენ. კართაონის ხომულა (გამახომინერი) ლაზუტი ვარ იყვენ. ნამთინორას შუ ლაზუტი რენ ნა გურის გვაკირენ დო ქვა კაი ვარ ოქთაფს, ვარ ამქვენ. ამ ვახთის ჲედაძალე ეწოზდიფან, ჲუდაძუფან, ქვა ზორი იქთენ დო გურის ნა გოკირს ეჲა ქაგამახიცქუფს. ქვას გური გამუხიცქუფან (ხურხი ქაგამახიცქუჲა, ეთი ზოპონან). მსქიბუ დიდო ვახთის ნა იქთას დო ქვა დიშირაში, ამ ორას ჟინი ქვა დოწკიფან დო ჟურ ქვასთი ოცხოჯი მეჩაფან, ძანგუფან, კიბირი უხვენუფან. ოცხოჯი ფოლადიში იქიფან. არ კუნწული მწკილი უღუნ, მაჟურა კუნწული ფართო, ჟურითი მჭკირულა. ქვაში გურიკალა მწკილითენ ძანგუფან, ქვაში ქინარეფეს ფართოთენ ძანგუფან. მანჩხას უღუნ ოცხოჯი. ბუცხითი უწუმერნან, ოცხოჯითი უწუმერნან. ოცხოჯი სთერი აშო სვარელი რენ ბიგაფე ვარნა რკინაფე. ღალიქ ნა მუღას ბუტკა, ნოხაპულე სპინას ვარ ნანძგიფას ჲადო უხვენუფან ბუცხი. ოცხოჯი ღურნისთი უხვენუფან. მსქიბუს არ ოცხოჯი უღუნ ხვალა მანჩხას. ოცხოჯი ჟურ ნა უხვენა, ემუშენი კაი ენა თეღი ოცხოჯიშენ იმტუ ნა მაჟურა ოცხოჯიქ ჭოფას, ბუტკა იყვენი, ნოხაპულე იყვენი, ბიგა იყვენი, მუთხანი ნა მუღას ღალიქ. ოცხოჯიკალა მანჩხაში ექოლე-აქოლე ნოჭკადაფან ჟურ კითიშ მაპეჯანა (ფართანა) ბიგა. ამუს უწუმერნან გოლაკვათონი. მსქიბუ დოდგინუ გინტაში გოლაკვათონის გოშოჩანაფ ლაფირა დო წკარი ჩქვა ღურნიშა ვარ ულუნ, ქინარიშენ დიბენ. ომქუში ნა დიჩოდას, ქვა უფშუ ვარ იქთას ჲადო ღურნის სპინაკალა უხვენუფან გეკვათალე. კაპეტი ფიცარიში დო კუნწული მეჭკიდერი რენ ჩარქიშ ქინარის დოციგერი ნჯას. არ კარჶითენ რენ მეჭკადერი იქთას ჲადო. მაჟურა კუნწული სპინაკალა ჟურ დოციგერი ნჯას გოშაძინ. ფიცარიში აჲა კუნწულის მეკირელი რენ თელი, აჲა თელიში მაჟურა კუნწული მეკირელი რენ მოდინიში მენგაფურა ჭიტა ოთხო ღოჯონი ხონის. აჲა ხონი დულუდგიფან მოდინის. მოდინის ლაზუტი ნა იჩოდეტას ემ ვახთის ჭიტა ხონი ქეშასთუნ, ემუშენი გეკვათალე მონკა რენ დო მონკანობა მუშიქ გელოწინაფს დოსქიდინერი ლაზუტი, ქაგინჭენ სპინაკალა წკარი ქაგულუკვათუფს. მსქიბუ ქოდოდგითუნ, უფშუ ვარ იქთენ დო ქვა ვარ ტუხუნ. ავთანდილ აბულაძე, სარფი, 1984