ლაზონაში მესელი შილჲა დო შილჲა წანაშ კაპულას არ პოტენური ორაზ ღორმოთიქ ქოგულთუ ირ კოჩიზ ლეტა შქით ჯუმაშენ მეტა “აღანეფე გამოდგინით ნოსერი ივით მჯვეშეფე თქვანი შინით გოიშინით სერი მურუნცხეფე მექჩით ცხანკალერი გონთანაში თანა ორა რაკანიშენ ეგოთანან მჟორა ნოსერეფე ნდღალერი გავან სერეფე გოგაფინან დიდი წუტა ბერეფე აჰა ქიანა ეჰეთი თუთა მურუნცხეფე წუტა წუტა ჟინ ნცა თუდე დიხა ირდით ედო იმბრალით” ჲა. ქჲონა ქჲოდუ ირი ხოლოსი ჩხრონოსსი ჩხორო ნოსი ჰეშო ნენა დოდუ ვროსსი. ირი კოჩიზ ქომეჩუ ლეტა შქით ჯუმაშენ მეტა შქით ჯუმა შქით წიფრიშ ტოტი შქით ოხორიშ ნჯა ჰეშო ნოსერი ჰეშო კაპეტი დიდო კაი შინომტეზ ჰემერეფეზ ხაი შენი ხაი, კაი შენი კაი ტეზ ჰეშო ჩქინერი ჰეშო ნოსიჲარი გური დოლუძიტეზ შქითიზთი შქითო მსუმჲარი. მიზ უჩქინ ნაკო დო ნაკო ნდღაზ ლეკური ოვალამტეზ კაბღაზ ხე დო კუჩხე ჶილი ჶილი მთელლი დიცხირი თი დო ტანი ფუფული ბანდალერი ბანდალერი მულურტეზ შური დოლოლაფერი ჰუნგერი ჰუნგერი შქით ჯუმა ტუ შქითითი გაჩქინან არამხუტუ ჰამ ნა ვეზ კაბღათი ჰეშო ტუ კაი შენი კაი ხაი შენი ხაი ტუ ჩხინდი მოკერკელერი გურპიჯი ნთომალჲარი ქვა დო ნჯა სთერი ჰეშო მენჯელჲარი ღორმოთიქ ქომეჩუ ირ კოჩიზ ლეტა შქით ჯუმაშენ მეტა “ე ღორმოთი ჩქუნ დუშმანეფეზ ლეკური მობუმქინით ჩქუნ მუშენი ვარ მშინით? შქით წიფრიშ ტოტი ვარ ვაშა კაბღა ქიანაზ ვარ დიდვენ ჯუმალობა, დალობა დო კაობა მუშენ გულთი ჩქუნდენ მეტა ლეტა ემოჩქენდინით ნა მუთე ბოძღათენ ბერეფეშ ქორბა?” ჟინ ღორმოთი თუდე შქით ჯუმა შქით წიფრიშ ტოტი ღორმოთი “ჰემუშ დერდი ნწორუმთ-ი აკო კაბღა დოვით დო ჰაწი ლეტა გორუმთ-ი კოჩი კოჩიზ გურიზ გური დანჭატუ ქოჩი დიხაზ კოჩობათე ნანჭატუ ჰამ ქიანა მთელლი შურიზ ქჲანჭატუ. თქვან მუფერ ლეტა გინონან? მა ქიანა აში ნდღაზ ნა ოქობდვი ქიანა ვარ ტუშა ნენა ნა დობდვი თქვანი შენი კაი თქვანი შენი ვროსსი ჩხრონოსსი ჩხორო ნოსი ქიანა ნცას დოლოხე არ ჭვეთელა კოჩიზ ნა ანჭენ ვაგლახთი ვასაგლახთი დო ჩხორო მტკო ლეტა შვით ჭკომით იბირით იხორონით მუ გინონან ჰემუ ვით თქვან ნა მექჩათენ ლეტა ვარ იშინასენ ჯოხო თქვანიშენ მეტა იმბრალით მოიშენით დუმჭკუ სთერი ირო დო იროთე მჟორა თქვანიზ მოთ მულაფამთ ემფულა პოტე ჩქიმი შენი ნა დობდვი ქიანაში ჯენნეთი თქვანი ტაზ ჰეთი გიჩქიტან ჰააა... მოთალეფე თქვანიშენ ემანეთი. ნა შვანუმთ შური შურიში გური ვიწური, ათინური არქაბური, ხოფური მა პაპული მა ნანა ნანაში ნანა მოთ ნოსქურინამთ თენა გიჩქიტანქი ჰამ დიხა ჩქიმი შანა ჯოხო თქვანითე მოლიშინაზ თი დოხმელი ლაზონა. ჲააა...! ლაზონაშ ჰექჲაჲე ჰაშო დიჩოდუ ღორმოთიქ ლაზონაზ ჰამ ნენა დოდუ.   © 2009 კოლხობა.ორგ