ხოფურეფეს ხოფურეფე შენი დოვიყვი მტკური, მარა, ხოფას ძინ ხოლო ჩქიმი გური, გური ექ ძინშაქის ვარ ჲულუნ შური, ხოფურეფეს ვუბირ ხოლო ლაზური. მუ პა მუჭო პა, მიშა მედი პა? შურ დო გური, ვარ გზირაე-ი ხოფა? ხოფას ნე დიხა მიღუნ, ნე ღობერი, ნე ოხორი, ნე თის მომათვენ ჭერი, გოვულურ მა დელი დევრიში სთერი, სო გემომწკუფას, ვოთანაფ ექ სერი! მუ ბღოდა მალი, ფსქიდურ ხალალი, გინონ კოჩი მშინით გინონ აბდალი. ნანა ჩქიმიქ ექ მიბირუ ონწელის, ე ჭალიმი ლეტას გჲაჯინთუ ბელის, ე ოხორის ქვა ეჟობდვით თემელის, ხოფურეფეს აჲა უჩქინან მთელის. მუ პა მუჭო პა, მიშა მედი პა? შურ დო გური, ვარ გზირაე ი ხოფა? მა ლაზეფე შენი დიდოფე მწირი, მუ ნა ვორტი, ქოვორე, ვარ ვიქთირი, დერდი ვარ დოსქიდუ მა ნა ვარ ბძირი, ხვალა დუდის ვარ ჲემიხთუ ინჭირი. ეთი ჲეხთასენ, კათა მიხთასენ, ლეტა ჩქიმიშენთი კვანცა იყვასენ. ირი ხოფურიქ ვარ მშინაფს ნოსერი, ბაზიქ მშინაფს მციქა ელაფათხერი, აშო მიღუნ მა იგბალი გოქთერი, ოქროთი ხე ჩქიმის ნიქთენ ნოშქერი. მითის ვარ უჩქინ, მათი ვარ მიჩქინ, მო ფსქიდურ მა, უმუთელი დიხაშ ჟინ. დობღურაში, ბირაფა დოსქიდასენ, ჩქიმიშ კულე ჯოხო ჩქიმი სქიდასენ, ქიმი ხოფურიქ გურის მემიჭვასენ, ქიმი ქანჩა, ქიმიქ დელი მშინასენ. ნე მიღუნ ბედი, ნე მითიშ მედი, ხოფას ძინშა გური ჩქიმიში გვერდი. მა ნე ქანჩა, ნეთი დელი ვარ ვორე, ნე უმუთელობა ფშინაფ ონჯღორე, ჰალალი ლუკმაშ მამჭკომალე ვორე, ნე ქჲოლე ვოქაჩაფ, ნე ქჲოლე ვორე! მა აშო ვორე დო წორი ვორე, ვარ ვიმხორ, ვარ მიჭკომაფუნ ონჯღორე! ქამოშალაში ფენწკაშენ ჭუბური, იმხონან, ვა რენ ნა ეჲა ფუნტური, გომბუნდღოლუ, გემატუ ცაშენ ქური, მათი ვარ ვიჯერ, ვორტი-ი ხოფური. მთელ ვარ გონდუნუნ, მთელ ვარ იჟოლენ, ნოკუჩხენეფე ჩქიმი ხოფას ქორენ. მუ ნა მიღუნ, ირი კოჩეფეში რენ, ჩქარ მუთუშა სქანი-ჩქიმი ვარ მათქვენ, ნე ნა რენშა მითის მუთუ მანძინენ, ნე ნა რენშენ მუთუ გეგაკორდინენ. ე ნა რენ ქორენ, ხოლოთი ტასენ, ჩქიმიშ კულენეფექთი იხმარასენ. ტანის ტუცა მიღუნანშა დიცხირი, ქიანა ვიხმართ მუჭო მუსაჶირი, ჭუმენ დუდის ქემიხთანში ინჭირი, სქანი-ჩქიმი დიხას გესქიდუნ ირი. მუთუ ვარ გაღენ, მწულე რენ ლეტა, ჩქარ მუთუ ვარ განჭენ თაბუთიშ მეტა! დრო მოხთასენ ვარ იყვასენ დიხათი, ვარ დოსქიდუნ კოჩიში ნოხვენეფეთი, მარა ქიანას მუთუ ვარ გჲოკორდუნ, მურუცხეფექ ვარვალასენ ხოლოთი. ტუ უჩქინელი, ტასენ ხოლოთი, ამუს ნე სქან გიკათუნ, ნე ღორმოთი! თანგრი ნა ჲოჩქინუ რენ ნა კოჩი რენ კოჩიშ ნოსიშენ თანგრი დიდი ვა რენ მუში ჲენოჩქინუშა მუქ ქჲოლე რენ ნა ჲოჟილასენთი ხოლო კოჩი რენ ნოსი ნოსი რენ, უჩოდინუ რენ ეჲა ნე ჲიჭოფენ ნეთი გამიჩენ კოჩიში ნოჩქინე კოჩეფეში რენ, ეჲა ნე ნიხირენ, ნეთი იმფულენ, სქიდალაშენ ექოლე მუთუ ვა რენ, რენ ნა, ხვალა ვერესია მედი რენ! აჲა აშო რენ, ირი წორი რენ, ემ დუნჲაშენ ნა მოხთუ მიწვი, მი რენ? ნოჭარეფე ჩქიმითი ჩქიმი ვა რენ კოჩი ვორე, ეჲათი კოჩიში რენ ჭუმე მა ჩქვა ლაზური ვარ მაბირენ ნე ნა იბირანფეშენ მასიმინენ ჩქვა მუთუ ვა რენ, ირი დიჩოდენ, ღურაშ ექოლე სქიდალა ვა რენ! ნამუს პკითხათ, ნამუ ვორეთ ნოსერი? ქიანა დოდგინერი რენ გოქთერი, დიდოფე ნჯირის რეთ სერი-ნდღალერი, გოფუჯაფან, სქიდუთ ფუჯეფე სთერი. მო იყვერ ფუჯი, მა მემიყუჯი! ელეგიბირფეს წორი მომჩი ყუჯი! მის ეჲა ჯენნეთეფე ნა გიქადეს მო უსიმინ მოლლა, ხაჯი, ხოჯაფეს აშუღიშ საზი ვარ მიღუნ თინა ხეს წორი ნენა ვუბირ პანტა ლაზეფეს სქიდი ხალალი, მო რე აბდალი ნჯირიშ ორა ვა რენ, გოიფაცხალი უნოსეფე შენი ყოროფა ვა რენ ნოსერეფეს კითხით, ყოროფა მუ რენ კოჩი, კოჩი ნა წიფხუფსთი ნოსი რენ კოჩის ნა ვარ ყოროფს მუქ კოჩი ვა რენ გიჩქიტან ირის, ქორეთ ნა ტვინის ყოროფა ნომსქუნ ხვალა კოჩი სქირის დოლოქუნუთენ კოჩი ვარ იცადენ კოჩიშ ნოსი რენ კოჩი ნა აცადენ ცადუფ ნა სი კოჩი ცადი ნოსითენ ნოსიშ გალე კოჩინობა ვარ იყვენ ნა გიბირ სთერი, ირი ნოსერი დო, მო იყვერ დიხას ბედი გოჭვერი ნოსერიშა ვარ გოლილაფს დუბარა პანტა ნოსერიქ დოგიდგიფს ქანდარა მო გიღუტას ჯებეს კაპიკი ფარა ხვალა მო რტა ნოსიშენ სი ჶუკარა მო რტა ბუნდური, შვანუფშა შური უნოსე კოჩი რენ, კოჩეფეშ მტკური ირი ქიმოლის შარვალი მოძინან მარა გვერდი, კოჩიშ მაჲმუნი რენან წორი კოჩის ირეკეფე დოდგიფან ირეკი მუთეფეშითენ ჭოფუფან ვარ მასინჯენან, ვარ მაცხუნენან ირი შარვალონი კოჩი მიჩქინან კურბეთი მა ვარ ფშინაფ ა თბილისი, ვორე თინა მა ბაბაშენ მუჶლისი, სქიდალაშენ მა ნა მანჭენფე ებზდი, მა ამ დუნჲას ემ დუნჲაშ დერდი ვარ ბზდი! მა წორი ვორე, ქანჩა ვარ ვორე, ოშწანურა ჩქიმიში სქირი ვორე! ქიანას მა ფსქიდურ ქიმოლებური ჩქვაშ მეშველუთენ ვარ მიშვანუნ შური ჰელიმიშ ხასანი ვორე ხოფური მთელ ლაზეფეს ე ნა ვუბირ ლაზური ფშვანუფშა შური, ვიბირ ლაზური ვიბირშაქის ვარ დომიდგითუნ შური. თბილისი, 1970   © 2006 კოლხობა.ორგ