“ჩქინი ნარღი ლაზური რენ” ლაზური ოსქედინუ შენი ნა იხანდეფს “kolkhoba.org” ჯოხონი საიტიში ედიტორეფეშენ ერქან თემელი კალა, ჟინეფს ჯოხონი გაზეთაში ჭანდინაში კონსეიშენ ჰალდუნ ოზქანიქ არ ინტერვიუ ყუ. დუდპახი თემელი, ჩქინდა მკულე არ ჩინაფა მეგაჩენანი? ლაზური ნა დიბადასუნონ ბერეფეშა ოხამპუთენ ჭარელი ნუნჭიშინუში ნოღირა ნა უღუნ, ნანანენაში ნარღონი დო გურონი არ გრუპი ვორეთ. მარა პოლიტიკური არ გრუპი ვარ ვორეთ. ამ ნოღირაშა მხუჯი ნა მეჩაფს ჩქვანერი სიმადა დო ჯერა ნა უღუნ კოჩეფეშენ ოკონტალერი ვორეთ. ჩქინი ნარღი ლაზური რენ, ლაზურიში ოსქედინუ რენ, ლაზური ნენა დო კულტურაშა ნა მაყვენან ნჭელა რენ. www.kolkhoba.org ჯოხონი ინტერნეტიში საიტი კიდით. მუშენი აშო არ სიმადა ეჩქინდუ? თურქეთის ნა სქიდუნან ლაზეფეში ნანანენა ნა რენ ლაზურითენ ნა ვარ იჭანდინენ შენი, თურქული ნა იხვენენ ჭანდინაფე ნა ვარ დიბაღუნ შენი, ლაზური კულტურა პოლიტიზე ნა იხვენენ დო ხვალა არ გრუპიში ხეს რენ ჲადო ნა იშინენ შენი, იკვანდინუ დო კონტაქტი იხვენუნათი თრთ ქ ლაზურითენ ნა ვარ ჭანდინაფს შენი, ნანანენა ჩქინი ხამფა, ჯინჯონი დო ნა სქიდუნ არ ნენა რენ ჲადო ოწირამუ შენი დო ლაზური ოკულენი ნესილეფეს ჩვერი მეჩამუ სთერი სებებეფე ნანანენათე ოჭანდინუშა გემოჭკაფეს. ამ საქვარიშა ამახთიმუ ნანანენა ჩქინიში ღირსონი ოსქედინუში ლიმა რენ. გლობალიზაციაში დეგენერაცია, ხეწალა კულტურაფეში ასიმილაცია დო ოჶიციალური იდეოლოგეფეში მანიპულაციაფეშა ჲედგითინუ რენ. საიტი თქვანის მუშენი ამ ჯოხო მეჩით. ჯოხო თქვანი მუ თქვალა რენ? “კოლხი”, ანდღანერი მარგალი დო ლაზეფეში მჯვეშ ორაფეში ოშქენური ჯოხო რენ. ამ სებებითენ ქიანაში მჯვეში ცივილიზაციაფეშენ არ თერი ნა რენ “კოლხური ცივილიზაცია” მოლაშინუ დო ამ ცივილიზაციაში ჯუმა ჟურ ნენა ნა რენ მარგალური დო ლაზური ოჭანდინუ შენი “კოლხეფეში შურონი” თქვალა ნა რენ “კოლხობა” ჲადო ჯოხო მევიჩით. საიტი თქვანის ვოწკედათში ლაზური (ლათინური ალბონი), ლაზური (ქორთული ალბონი) დო თურქული ჲანი სუმ ჶორმითენ ნა ოჭანდინაფთ ბძიროფთ. აშო მუშენი დოგაჭირეს? ლაზეფე ჰემი თურქეთი დო ჰემითი ოქორთურას სქიდუნან. ნა იჩქინენ სთერი ჩქინ თურქეთური ლაზეფექ ლათინური ალბონი მიჩქინან. ამ სებებითენ საიტი ჩქინის ლათინური ალბონითენ ჭარელი ლაზური ალბონი ვიხმართ. ოქორთურას ნა სქიდუნან ლაზეფეს, ქორთული ალბონი უჩქინან. ემუშენი ქორთული ალბონითი ვიხმართ. რუსეთის ნა სქიდუნ ლაზეფე ტუკონნა ენთეფე შენითი კირილური ალბონი ვიხმარამინტეს. ალბონეფეშე ნა მიღუნან ნჭელა, ლაზურიშა ნა მეფჩაფთ ბეჯითობაში ოწირამუ რენ ჲადო ოხოწონით. ხანდაფე თქვანი მედიასთი გამახთუ. ნა ითქვენფე მუჭო გაწონეს? ჩქინ დიდო აღანი არ საიტი ვორეთ. 1 იგრიკა 2006 ში თარიღის ოჭანდინუშა გევოჭკით. ანქა ამბარიში აგენსიქ ჩქინი ამბარი მეჩუ. ამ ამბარი ნამთინი გაზეთაფეს გამახთუ დო იჭარუ. “ულქედე ოზგურ გუნდემ” დო “მილი გაზეთე” ჩქინი კალა ღარღალუ, ენთეფე კალა რეპორტაგი იხვენუ დო გამიჩქვინუ. ლაზურიში ოსქედინუ შენი ნა იხანდეფს კოჩეფე კალა მედიაში ხეთენ ოჩინუ მინონან. საიტი თქვანის გედვალერი ნა რენ ამბარეფე დო ბიოგრაჶეფე მუეფე რენ? დიდო ჶარა ნა ფთქუმერთ სთერი, ჩქინ ლაზური ოსქედინუ, ოხამფუ დო ნა მოხთასუნონ ორაფეშა ჲოქთუში ნოღირა ნა უღუნ არ საიტი ვორეთ. ლაზური არხვალა ობირუში ნენა ჲადო ნა ოხოწონაფან სთერი სიმადაფეს ვარ მეოყუფთ. ლაზური ნა სქიდუნ არ ნენა რენ დო ლაზური კალა ირი გამაჩქვალა იხვენენ. ჩქინ აჲა ნა ფხაზირით დო საიტის ნა გებდვით ამბარეფე კალა ვოწირით. ბიოგრაჶიში ბურმე, ლაზური ნენა დო კულტურაშა მხუჯი მეჩამერი დო ნამთინეფე ღურელი ნა რენ ადამეფე ჩქინი გოშინუ შენი ფხაზირით. არ კულტურა ნა ოწირაფს მთელი თემა საიტის გედვერეთ (ანდაზი, ინტერვიუ, პიესი, მუსიკა, ოჭკომალეფე სთერი) თურქეთის დო ქიანას ლაზური კულტურა დობაღინერი იჩინენი? დუდკანონური ჰაკკი ჩქინი ნა რენთინა, თრთ ში ჭანდინაფეს ნენა დო კულტურა ჩქინი ნა ვარ მოლიშინენ შენი საიტი ჩქინი ჭანდინაში ჶორმატითენ ფხაზირით. ამ სებებითენ ხვალა მუსიკაფე, კლიბეფე, ლექსეფე, პაშურაფე ვარ დო ამბარეფე, სტატიაფე, ბიოგრაჶეფე, ინტერვიუფე, დიალოგეფე დო ტექსტეფეთი გებდვით. მთელორას გოშოგორუ დო ოწკედინუშ დოლოხე ვორეთ დო საიტი ჩქინიშა აღანი ჩქინა დო მატერიალეფე გედვუ შენი ვიხანდეფთ. თურქეთის დო ქიანას ლაზური კულტურაში ოჩინუ დიდო ბეჯითი ვა რენ ჲადო ვიზმონთ. ბეჯითი ნა რენ ლაზურიში ოსქედინუ რენ. ჩქინ ლაზური ომორდინუთენ ნა ირდასუნონან ბერეფეშა მეჩამუ შენი ართოთ ნა ვიყვამინონან “ლაზურიში მეგაბრეფე” კალა ოკოკათუ მინონან. “ლაზური ამბარიში ხანდაში გრუპი” ოთეშქილუ მინონან. ლაზური, მანჯეფე ნა უყონუნ ორაფე კონარი სქიდასუნონ. ლაზური კულტურა ემ ორას თურქეთის დო ქიანას იჩინენ. ამ ოჩინუს ემ ორას არ ღირსი აყვენ. საიტი თქვანის მუსიკაში კლიბეფეთი გელაჩაფს. ლაზური მუსიკალური არ ნენა რენ, ხალკის ამ მუსიკაფეში თურქული ქთირაფე ონჭელნან. ანთეფე გედვათენი? ვარ. არ ლექსი დო ბირაფა არხვალა ნა იჭარუ ნენას მსქვა იყვენ. ჩქვა ნენაშა გოქთირაში ხეშნოხვენური ღირსი ნა უღუნ ლექსი ვარნა ბირაფაში ნენაფეს აჰენგი, რიტმი დო ოხოწონალე გვანდუნენ. ამუშენი ჩქინ, ანთეფე ნა იჭარეს ნენაფეთენ იკითხას დო იბირას ჲადო ვისიმადუფთ. ლაზური კართა ტექსტი ჩქვა ნენაფეშა გუიქთირასუნონ ჲადო არ ჩილათური სიმადა ვარ მიღუნან. ლაზური კულტურა დო ლაზური, ინტერნეტი დო გამაჩქვალაფეშენ ჩქვა ნამუ პრაკტიური მუთხანეფე ოხმარუთენ უმოსი დიდო ხალკეფე კალა გაფაენან? არ წანა კონარი წოხლე სუმ თუთას არ გამაჩქვინუ ნა მინტეს დო ჯოხო მუშითი “სუმთუთა” ნა გევოდვერეტით არ სვარული გამავოჩქვამინტეს. ეჲა მციქა მევოჲანით. ამ პერიოდის საიტიშ ჭანდინა უმოსი კაი იყვასუნონ ჲადო ვიზმონით. მარა ოკულე ინტერნეტის სვარული გამაჩქვინუ მინონან. აწი თურქეთის ლაზეფეს ჩქარ სვარული დო გაზეთა ვარ უღუნან. გონწკიმერი ნენათენ ჩქინ ხოლო ინტერნეტიშ დოლოხე ნენაშ ოგურაფუ ვიზმონთ. ჲანი ინტერნეტური დოგურონითენ ნანანენა ოგურაფუ მინონან. არ თუჯარიქ ვარნა არ დულიაშმანჯექ ჩქინდა მხუჯი მომჩანნა კურსი გონწკიმუში მენჯელი მიღუნან. გრამათიკუროთ დო ილმიუროთ ამ ნენა ოგურუ შენი გრუპი მიყონუნან. მარა ირიშენ მენჯელონი, ოწკომილონი მედია რენ ჲადო ვისიმადეფთ. ემუშენი თურქეთური ლაზეფეს დიდო მანიშა ოწკომილუში მედია ოხმარუ ჭირნან. საიტი თქვანის აღანობაფე იყვასუნონი? ოხვენუ ნა ისიმადეფთ ნამუ პროექტეფე გიღუნან? ჯუმა ჟურ ნენა ნა რენ მარა პერიოდიშ დოლოხე ართიქართიშენ ნა იმენდრანუ მარგალური დო ლაზური ნენაფეში ამ ორაშაქის ნა ვარ იხვენუ არ ლექსიკონი ოხვენუ მინონან. ტეკნიკუროთ დო ჶინანციალუროთ გონწკიმუ მუში დიდო მეჭირელი ნა მაყვენან ნენაშ კურსი ვარ მარა ინტერნეტის ნანანენაშ ოგურაფუში პროექტი ჩქინი ოხერციელინუ მინონან. ხოლო საიტიში დოლოხე შურონი რადიოში პროგრამი ოხვენუ ვისიმადუფთ. აჲა ეშო არ ჭანდინაშ ტესტი სთერი პათმინონან დო ნა მოხთასუნონ ორაფეს ოყოფინუში ალბათობა ნა უღუნ ჭანდინაშა ვიხაზირათმინონან. საიტი ჩქინიშა ოღარღალუში პროგრამი გედვალუ დო აშოფეთენ მაკათურეფეს ართიქართი კალა ლაზური ოჭარუთენ კონტაქტი ახვენან ჲა მინონან. საიტი ჩქინიში ორგანიზაციათენ ოქორთურაში სარფის კართა წანას ნა იხვენენ სთერი, “კოლხობაშ ჶესტივალი” ოწიფხუშ პლანი მიღუნან. ლაზური ნენა დო კულტურაში თემათენ დიდო კოჩეფე ნა აკათასენან აკადემიური ქონჶერანცეფე ოხვენუ გურის მიღუნან. თურქეთის ლაზურითენ ნა იჭარუ დიდო სვარაფე ნა ვარ რენ შენი ლაზურითენ ჭარელი ამბარეფე, ბიოგრაჶეფე დო სტატიაფე გამაჩქვინუ მინონან. ნანანენათენ ოგურინუ დო ნანანენა აღანეფეშა ნუნჭიშინუ შენი მუ იზმონთ? ჩქინ თურქეთის ჩქარ ნანანენათენ ოგურინუ იყვასუნონ ჲადო ვარ ვიჯერთ. ამუში დიდო სებებეფე რენ. ამ თემაში ჟინ ოღარღალუ ვარ მინონან. ჩქინდა ნა დომაჭირენან ლაზური ნენაში ოსქედინუ რენ. ნანანენა ოგურუ დო ნანანენათენ ოგურინუ ჩქვა თემაფე რენან. ედო ჩქინი თემათი აჲა ვარ რენ. თემაში ჯოხო კაი გიდვინასნა ფოლემიკა ვარ გამულუნ. მთელი ნა ფთქუმერთფე ლაზური სთერი ნენაფე შენითი ეშო რენ. თრთ-ქ თურქეთის ნამთინი ნენაფეთენ გვერდი საატონი პროგრამეფე იქიფს. რთუქ-იქ ორაში პრობლემი დოჩოდინუ. მარა ლაზური, აბხაზური სთერი ჩქვა დიდო ნენაფეში მოივარუს მუჭოში ოწკერთ? თრთ-ქ ნამთინი ლოკალური ნენაფეთენ ნა იქიფს პროგრამეფეშა ორაში თემაშენ ოწკომილუ წორი ვარ რენ. ბეჯითი ნა რენ თრთ ში ოჭანდინუ რენ. 10 დეკიკე რტასნათი. ამუს არ სემბოლიური ოხოწონალე უღუნ. ჟინ მუშის ოსიმადუ ნა უნონ თემა; დუდკანონური არ ოჶისი ნა რენ დო მთელი ლოკალური ნენაფეშა ართნერი ოღოდუ ნა დვაჭირენ თრთ ში უჰაკკონი დო უართნერონი დულჲა ოხვენუ რენ. ნამუ კრიტერეფეთენ თრთ ქ არაბული, ბოშნაკური, ჭერკეზური, ქირმანჯური დო ზაზური ნენაფეთენ პროგრამი იქიფს? მუშენი ლაზური პროგრამი ვარ იქიფს? მუშენი აბხაზური პროგრამი ვარ იქიფს? ამ თემას პოლიტიკური ავტორიტექ ბანდალაფს. კრიტიკი ვიქიფთ. არმციქა ელანძინერი არ მისალი მეფჩათნა; არ ოფუტეს ოში კოჩიქ ნა ღარღალაფს არ ლოკალური ნენა კალა სუმ მილჲონი ხალკიქ ნა ღარღალაფს ჩქვანერი არ ლოკალური ნენას ჩქვანერობა ვარ უღუნ. თურქეთის ნა რენ მაჟურა კულტურაფე ედო ხუსუსუროთ ჭერკეზური კულტურა შენი მუ ისიმადუფთ? ნა გიჩქინან სთერი, “ჭერკეზი” ში ნოთქვალეში ჟინ “ჭერკეზეფეს” თი არ ოხოწონალე ვარ უღუნან, აჲა პოლიტიკური არ ოწკომილუ რენ. ჩქინ ლოკალური ნენაფეშა პოლიტიკუროთ ვარ, კოჩინობუროთ ედო ხოლო დობათუთენ ნა მუიღინენ ჰაკკოთ ვოწკერთ. ბეჯითი ნა რენ ნენა ჩქინი, ჩქინი ნენაფე რენ. ნენაფე ჩქინი ოსქედინუ დო მოხთასნერი გენერაციაფეშა მეჩამუ რენ. თქვანთი ნენაფე თქვანი შენი ოხანდუ კჭირნან. “ჭერკეზური ნენაფე” შენი ბზოპონთ. მთელი სქიდას მარა კავკასიაშენ ხირელი ტექსტეფეთენ ვარ. თქვანთი ომრალით, ჩქინ ნა ვიქიფთ სთერი. გინონანნა ჩქინ ამ თემა შენი თქვანდა მემაშველენან. ჰალდუნ ოზქანიქ ნა ყუ ამ ინტერვიუ “ჟინეფს” ჯოხონი გაზეთაში ხცალა 2006 ში კოროცხალეს იჭარუ.