“ნენაფეში ჩქვანერობა მუში რენობაში დელილი რენ” ქიანას ინტერნეტის მაართანი ჶარა www.kolkhoba.org ჯოხოთენ ლაზური საიტი გომწკით ნა თქუ საიტიში ედიტორი ერქან თემელიქ, “ნენაფეში ჩქვანერობა მუში რენობაში დელილი რენ” ჲადო ნოყონუ. თემელიქ, ისლამის ოჶიციალური ნენა – ნანანენა ჲადო მუთუ ვა რენ, ალლაჰი შენი მთელი ნენა ღირსონი რენ, ემუშენი ნენაფეში ჩქვანერობა რენობა დო მენჯელობა მუშიში დელილეფე რენან ჲა თქუ. ინტერნეტის ლაზური ნენათე ნა ჭანდინაფს არ საიტი გონწკიმუშა ნამუ სებებეფექ მეგინთხეს? თურქეთის ნა სქიდუნან ლაზეფეში ნანანენა ნა რენ ლაზურითენ ნა ვარ იჭანდინენ შენი, თურქული ნა იხვენენ ჭანდინაფე ნა ვარ დიბაღუნ შენი, ლაზური კულტურა პოლიტიზე ნა იხვენენ დო ხვალა არ გრუპიში ხეს რენ ჲადო ნა იშინენ შენი, იკვანდინუ დო კონტაქტი იხვენუნათი თრთ ქ ლაზურითენ ნა ვარ ჭანდინაფს შენი, ნანანენა ჩქინი ხამფა, ჯინჯონი დო ნა სქიდუნ არ ნენა რენ ჲადო ოწირამუ შენი დო ლაზური ოკულენი ნესილეფეს ჩვერი მეჩამუ სთერი სებებეფე ნანანენათე ოჭანდინუშა გემოჭკაფეს. ამ საქვარიშა ამახთიმუ ნანანენა ჩქინიში ღირსონი ოსქედინუში ლიმა რენ. გლობალიზაციაში დეგენერაცია, ხეწალა კულტურაფეში ასიმილაცია დო ოჶიციალური იდეოლოგეფეში მანიპულაციაფეშა ჲედგითინუ რენ. საიტი თქვანიში დოლოხე მუეფე გედვალერი რენ, ენთეფეშენ ჩქინაფე მეგაჩენან-ი? დუდკანონური ჰაკკი ჩქინი ნა რენთინა, ჭანდინაფეს ნენა დო კულტურა ჩქინი ნა ვარ მოლიშინენ შენი საიტი ჩქინი ჭანდინაში ჶორმატითენ ფხაზირით. ამ სებებითენ ხვალა მუსიკაფე, კლიბეფე, ლექსეფე, პაშურაფე ვარ დო ამბარეფე, სტატიაფე, ბიოგრაჶეფე, ინტერვიუფე, დიალოგეფე დო ტექსტეფეთი გებდვით. მთელორას გოშოგორუ დო ოწკედინუშ დოლოხე ვორეთ დო საიტი ჩქინიშა აღანი ჩქინა დო მატერიალეფე გედვუ შენი ვიხანდეფთ. საიტეფეში დიდობას ნა იძირენ სთერი ოკოკიდინუ დო პოლემიკაფე ვარ მაყვან ჲადო ჶორუმი დო მუსაჶირეფეში ბურმე ვარ გომწკით. მუსაჶირეფექ ნა პკიდით გრუპი ჩქინიშა ამალენან, სიმადა დო ზმონეფე მუთეფეში ჩქინი კალა აფაენენ, გედვინუ ნა უნონან მატერიალეფე ჩქინდა ნანჯღონენან. www.kolkhoba.org-ის ლაზური კულტურაში ჯოხოთენ ნა ჭანდინაფს მაჟურანი საიტეფეშენ მუფერი ჩქვანერობაფე უღუნ? ირიშენ დიდი ჩქვანერობა ჩქინი ლაზური ნენათენ ოჭანდინუ რენ. ედო ხოლო ჟურ ალბონი ოხმარინუთენ. ქორთული დო ლათინური ალბონეფე ოხმარუთენ მუსაჶირეფე ჩქინიშა ოცხუნუში ჰაკკი მეფჩაფთ. საიტი ჩქინიშა მუსაჶირი ნა იყვენანფე ლათინური ბონჯაფეთენ ლაზური, ქორთული ბონჯაფეთენ ლაზური დო თურქული ბურმეფეშენ არ თერი აცხუნენან. მაჟურანი ჩქვანერობა ჩქინი, თემაში ოხოწონუ დო ოწკომილუში გაგნა რენ. კულტურა ჩქინი ამ კულტურათენ ნა სქიდუნ მთელი კოჩეფეში ართოთ რენობა რენ ჲადო მაჩქინენან, პოლიტიკური სიმადა კალა ჭანდინა ვარ ვიქიფთ. მასუმანი ჩქვანერობა, ნანანენა ჩქინიში ოშინახუ დო ოსქედინუშა ღირსი მეჩამუ რენ. პოპულარიტე დო თიმოწონობაშენ მენდრა დოდგითუ შენი დიდო ვიხანდეფთ. მაოთხანი ჩქვანერობათი, ამ თემაში ჟინ დიდო ჩქინერი დო კითხერი ვორეთ ჲადო ვიზმონთ. ამ ორაშაქის დიდო წანაფეშენ დონი ნა ვარ იხვენუ საქვარეფე ჟურ თუთა სთერი მკულე არ ორას ოხვენუ ჩქინი იდიაში დელილი რენ. ლაზური ნა მოხთასუნონ ბერეფეშა ოხამპუთენ ნუნჭიშინუ შენი მუეფე ისიმადუფთ? დიდი მაეჩქინდექ ჩქინდა ნა დომოგურეს სთერი ვიჯერთ; “ნცაეფეში დო დიხაფეში ეჩქინდინუ, ნენაფე თქვანი დო ფერეფე თქვანიში ჩქვანერი ოყოფინუთი ემუში რენობა დო მენჯელობაში დელილეფე რენ. ანთეფეს ჩქინაშმანჯეფე შენი გამაღუში ჭკუაფე რენ.” (რუმ 22) ლაზური ვარნა მაჟურა მთელი ნენაფე შენი ალლაჰიში ნა ვარ ნითქვინენ რენობა დო ნა ვარ ისიმადინენ მენჯელობა მუშიში ირიშენ დიდი დელილეფეშენ არ თერი რენ ჲადო ვიზმონთ. ემუშენი ქიანას არ ნენა ღურაში ალლაჰიში დელილეფეშენ არ თერი გონდუნუნ ჲადო ვოწკერთ. აშო ოწკომილუ ნა მიღუნან შენი, ოჶიციალური დო ლოკალური მუჭო რტასნათი კართა ნენაფე, მჯვეშეფეშენ მუჭო ეპჭოფითნა ნა დიბადასენ ბერეფე ჩქინიშა ოშინახუ შენი ამანათი ოჩუმალუ დო მთელი მუთხანეფე ოხვენუ დომაჭირნან ჲადო ვისიმადეფთ. ამ კულტურა ოხამპუ დო ოსქედინუ შენი მუ ფროგეთეფე გიღუნან? საიტი ჩქინის ხვალა თურქეთური ლაზეფეშა ვარ მთელი ქიანას ნა სქიდუნან ლაზეფეშა დო ოქორთურას ნა სქიდუნან მარგალეფეშათი (კრისთიანი ლაზეფე) ვუჭანდინაფთ. ჯუმა ჟურ ნენა ნა რენ მარა პერიოდიშ დოლოხე ართიქართიშენ ნა იმენდრანუ მარგალური დო ლაზური ნენაფეში ამ ორაშაქის ნა ვარ იხვენუ არ ლექსიკონი ოხვენუ მინონან. აშოფეთენ ჩქინდა მენგაფერი ხალეფეს ნა სქიდუნან მარგალეფე კალა, ართიქართი უგჯიში ოხოწონუ დო პრობლემეფე ჩქინი ოფაუ მახვენასენან. ტეკნიკუროთ დო ჶინანციალუროთ გონწკიმუ მუში დიდო მეჭირელი ნა მაყვენან ნენაშ კურსი ვარ მარა ინტერნეტის ნანანენაშ ოგურუში ფროგეთი ჩქინი ოხერციელინუ მინონან. აწი პიასას ნა რენ გრამათიკაფე, ლექსიკონეფე დო ოკითხუში სვარაფეში მეშველუთენ ნჭელა ნა უღუნანფექ დოხუნერი ლაზური აგურასუნონან. ხოლო საიტიში დოლოხე შურონი რადიოში პროგრამი ოხვენუ ვისიმადუფთ. აჲა ეშო არ ჭანდინაშ ტესტი სთერი პათმინონან დო ნა მოხთასუნონ ორაფეს ოყოფინუში ალბათობა ნა უღუნ ჭანდინაშა ვიხაზირათმინონან. საიტი ჩქინიშა ოღარღალუში პროგრამი გედვალუ დო აშოფეთენ მაკათალეფეს ართიქართი კალა ლაზური ოჭარუთენ კონტაქტი ახვენან ჲა მინონან. ლაზურითენ დიდოფექ ნა ვარ ჭარუფან შენი აშო ოხვენუთენ მთელიქ ჭარან ჲადო ნოღირა მინონან. საიტი ჩქინიში ორგანიზაციათენ ოქორთურაში სარფის კართა წანას ნა იხვენენ სთერი, “კოლხობაშ ჶესტივალი” ოწიფხუშ პლანი მიღუნან. მუსიკაფე, ოსთერუფე, ჩქვადოჩქვა ძირაფაფე ნა იყვასუნონ ამ ჶესტივალითენ კულტურა ჩქინიშა ოხიზმეტუ მევოღირაფთ. ლაზური ნენა დო კულტურაში თემათენ დიდო კოჩეფე ნა აკათასენან აკადემიური ქონჶერანცეფე ოხვენუ გურის მიღუნან. აშოთენ ნენა დო კულტურა ჩქინიში ოხანდუფეშა შარა ვოწირათმინონან. თურქეთის ლაზურითენ ნა იჭარუ დიდო სვარაფე ნა ვარ რენ შენი ლაზურითენ ჭარელი ამბარეფე, ბიოგრაჶეფე დო სტატიაფე გამაჩქვინუ მინონან. ამ თემაშა ნჭელა ნა უღუნანფეში ნჭელაფე ოდიდანუ, ნა ვარ ონჭელნანფეშა ნჭელა მეჩამუში ნოღირა შენი აშო პროგეთეფეში ჟინ ვიხანდეფთ. ნანანენა ოგურინუ დო ნანანეთენ ოგურინუშ თემა შენი მუეფე იზმონთ? ნანანენა ოგურუში ჰაკკი კოჩეფეში ირიშენ ბეჯითი თემა რენ ჲადო ვისიმადეფთ. მარა ნანანენათენ ოგურინუს მაჟურა ლოკალური ნენაფე ნა რენან სთერი ლაზურითი დობაღინერი ვარ რენ ჲადო ვიზმონთ. ედო ჩქინი თემათი აჲა ვარ რენ. ჩქინ ქიანას ნა იღარღალენ მთელი ნენაფე შენი კოჩეფეს ართიქართი კალა კონტაქტობა ახვენან დო ამ ნენაფე ნა ვარ უჩქინან კოჩეფეს აგურან ჲადო რენან ჲადო ნოსის დოლოვიდუმერთ. კურანის ნა იჭარენ სთერი; “ჭე კოჩეფე! მთინი მუში ჩქინ, არ კოჩი დო არ ოხორჯაშენ ჲეგოჩქინდით. დო ართიქართი კალა იჩინით ჲადო ნაცია დო ხალკეფეშა ოკოგორთით. ალლაჰიში ხოლოს ირიშენ ღირსონი, ემუშენ ირიშენ უჯგიში ნა აშქურინენ რენ. ალლაჰი ირიშენ ჩქინერი რენ დო ირიშენ ამბარი უღუნ.” (ჰუჯურათ 13) ადემი დო ჰევაშენ ნა იმრალეს კოჩეფე, მთელ ქიანას ჩქვადოჩქვა ფერი დო ნენათენ ჭიტა დო დიდი ხალკეფეშა ოკუირთეს. ჭიტაშენ დიდიშა, ხალკიშენ ნაციაფეშაქის ჩქვანერობა ნა ოწირაფს ამ თემაში სებები, კოჩეფეში ართიქართი ოჩინუ, ოხოწონუ დო ონანჭუ რენ. ემუშენი ნაციათენ ვარ მოიწონდინენ მარა დიდო ნაციაფეში რენობაში სებები, ჩქვანერი კულტურაფეში ოჩინოფუ, ოკიბღინუ დო მხუჯი მეჩამუ რენ. ჭანდინაშა ნა გჲოჭკით ორაშენ დონი მუფერი პოზიტიური-ნეგატიური რეაქციაფე ძირით? მკულე ორაშენ დონი ვოჭანდინაფთ მარა თერეში დოლოხე დო გალე დიდო პოზიტიური რეაქციაფე ეპჭოფით. კულტურა ჩქინი ნა ონჭელნანფექ ელეკტრონიური პოსტაშ ადრესა ჩქინიშა მიჭარეს დო გრუპიშ ადრესა ჩქინიშა სიმადა დო ზმონეფე მუთეფეში მომინჯღონეს. ხუსუსუროთ ამ პუნკტის აშო არ ჭანდინაში დორკინობა მუში დიდო ორაშენ დონი მიღუთეს დო საიტიში გოინწკიმუთენ ეჲა დომაჩოდეს ჲადო ხელებათენ მიწვეს. ამ ორაშაქის ნეგატიური არ რეაქცია ვარ ეპჭოფით. ჩქინი შენი კართაშენ დიდი რეაქცია თრთ ში რეაქცია რენ. დევლეთური კანალი ნა რენ დო მთელი დობადონამშინეფე მუშიშა არ ოწკომილუ ნა დვაჭირენ არ ოჶიციაში მაოკორთობა მუში ვარ ოხომაწონენან. ჟურნალისთ აჰმეთ გარიბიქ ნა ყუ ამ ინტერვიუ “მილლი გაზეთე” ს 15.06.2006 ში თარიღის გამიჩქვინუ.