|
MUSLİMANİ SLAVEPEŞİ NENA BOŞNAK'URİ
Boşnak’uri nena (Bosanski jezik), omjore Slavuri nena ren. Xirvaturi nena k’ala artot omjore Slavuri nenapeşi geulva variant’i 3’opxups. Edebiaturi nenaşa irişen xolos nena Boşnak’uri, Xirvaturi do Serbuli nenapeşi oşkes xinci ren. Bosnia-Hersek’işi maxoroba gverdişen dido Boşnak’epek 3’opxupan do Boşnak’uri nena am dobadonaşi resimuri nenapeşen arteri ren. Amdğanerdğas; Bosnia-Hersek’i, Sancak’i, K’osova, Mak’edonia, Slovenia, Serbia, Uçagerma do Xirvatistanis 2 milioni k’oçiş k’elen iğarğalen. Turkiasti Boşnak’uri nenaş mağarğale T.C.-şi dobadonari dido Boşnak’i skidun.
Boşnak’uri nena bilasa çodina 3’anapes Xirvatuti do Serbuli nenapeşen hemi şeklurot hemiti zit’alurot k’aixeşa çkvaneri koniktu. Resimurot Xirvaturi nena steri Latinuri albonite iç’aren. Mara K’iriluri alboniteti ç’arupan. Boşnak’uri albonis 4 xonaroni, 26 uxonare, 30 bonca uğun. Boşnak’uri nenas nesnepes cinsieti uğunan. Oxorcaluri nesnepe “a” boncate içoden. Kimoluri nesnepe ekseri uxonare boncate içoden. Noturi ekseri “o” boncate içoden. Boşnak’uri nenas k’arta coxos art cinsieti uğun; coxope oxorcaluri, kimoluri varna noturi namu renan entepe oxo3’onapaps. Kimoluri (artenuri) coxope uxonare boncate içodenan. Kimoluri (didonuri) coxope “i” boncate içodenan. Oxorcaluri coxope ekseri “a” boncate içodenan. M3ikapek uxonare boncateti içodenan. Oxorcaluri (didonuri) coxope “e” varna “i” boncate içodenan. Coxopes; yalini xali, -in xali, -e xali, -i xali, -le xali, -de xali do hitabi xalepe uğunan.
Boşnak’uri ç’araloba ekseri otxo çkvaneri oraş doloxe molişinen. Maartani Osmanalişi devre, majurani Avust’uria-Macaristanişi devre, masumani kianuri majurani limaş çodinaşakis devre do maotxaniti mcveşi Yugoslaviaşi goşobğinuşakis devre ren. Osmanalişi devres Boşnak’i maç’arepek xampa ç’araloba do3’opxes. Am ç’aralobas menceloni destanepe, xampa divanuri ç’araloba do mskva hekayepe uğun. Edoxolo am devres Boşnak’uri ç’araloba vak’ainame, seyahatname do salnamepete dido xampa ren. Am devreşi maç’arepek Arabuli, Farsuli, Turkuli do Boşnak’uri nenate noç’arepe ç’arelerenan.
|
TÜRKÇE
