DUDBUT'K'A

MEHMET ZAHİT KOTKU

Mehmet Zahit Kotku, Gumuşxanevi dergaxişi şeyxi Mustafa Feyzi Efendişi qoropeli mamgurepeşen arteri do “Xoca efendi” lağubite çineri alimi rt’u. 1897 3’anas Bursas dibadu. Baba muşi İbrahim efendi, nana muşi Sabire xanumi ren. Ocaxi muşi Şirvanişa mek’ireli, mcveşi xanobaşi şkaguri Nuhaluri ren. Ocaxi muşi Osmanali-Rusiaşi xarbis Anatoliaşa moxtu do Bursaşa dibargu. Baba muşi İbrahim efendi, Bursa Hamzabeyi medreses ilmi iguru do çkvadoçkva came do mescidepes imamoba qu. Mehmet Zahit Kotku sum 3’aneri rt’uşi nana muşi Sabire xanumi doğuru. Baba muşi İbrahim efendik majura fara, Dağistanişi muxacirepeşen Fatima xanumi k’ala içilu.

Mehmet Zahit Kotkuk, iptineri gurapa Bursa Oruçbey p’ridoguraleşen eç’opu. Oşke gurapa Maksem oşkedoguraleşen do do Bursa Sinai Nefiseşen eç’opu. Maartani kianuri xarbişi sebebite vitoovro 3’aneri rt’uşi askerobaşa icoxinu. Askerobaşi vazifeş sebebite St’amp’olis dodgitut’uşi dinuri ok’oxtalapeşa, xususi dersepeşa do camepeşi vaazepeşa ak’atu. Dağistanuri Şeyxi Omer Ziyauddin efendişa intisabi qu do emuşi mamgure iqu. Emuşi sohbeti do dersepeşa ak’atu do tasavufişi gzas naqonu. Bayezid, Fatih do Ayasofia camepe do medresepeşi dersepeti eç’opu. Emorapes xafizoba muşi oçodinu. Çkvadoçkva k’aza do oput’epes imamoba qu do k’oçepeşa İslamişi emirepe do yasaxepe oxo3’onapu.

Mehmet Zahit Kotku, 1929 3’anas baba muşi ğuruşi, Bursaşi oput’e İzvatis emuşi vazifeşa naqonu. Vitoxut 3’anaş morgvalis noqoneri am vazifeş k’ule Bursaşi Uftade cameşi imami-xatibobaşa iyatinu. 1945-1952 3’anapeşi oşkes akonuri vazifeşa naqonu. 1952 3’anaşi Xristana tutas Gumuşxanevi dergaxişi postnişi eç’opu do St’amp’olişa dibargu. Fatih Zeyrekis Çivizade cameşi imami-xatibobaşa itayinu. Mk’ule oras xolo Zeyrekis Ummugulsumi mescidis imami-xatiboba qu. 1958 3’anaşi Gimua tutas Fatih İskenderpaşa cameşa itayinu do ğuruşakis em vazife aqu. Bursas do St’amp’olis rt’uşi orapes ok’oxtimeri k’oçepeşa vaazi do nasihadi oğodu edo mtini gza no3’iru. Mehmet Zahit Kotku skidala muşişi çodina 3’anapeş izabunu do p’at’işi 3’k’uni uğut’u nati, sohbetepe muşis naqonu. 13 3’ilva 1980 tarixis doğuru. Suleymaniye cameşi hazires xocape muşişi xolos dixvinu. Mehmet Zahit Kotkuk, Tasavufi axlak’i 1-2-3-4-5, Duaşi mecmua, Cennetişi gzalepe do Muminepeşa vaazepe coxoni ketabepe ç’aru do İslamuri kianas nuxezmet’u.



                                                                                                                                                              TÜRKÇE