|
LAZİSTANİŞİ LİMANEPE
Kianaşi didi zoğapeşa gon3’k’imeri irişen didi doloxeni zoğa na ren Uçazoğaşi yulvaşk’ele na golaz’in Lazistani, ist’oriaş morgvalis zoğaluri ticaret’i dido na ixvenet’u limanepe muşiten işinu. Uçazoğaşi xalk’epeş oşkendas na i3’opxinu megabroba, k’ult’ura do ticaret’işi xinciş ar k’uçxe na rt’es Lazistanişi limanepe, ist’oriuli Met’aksişgzaşi Avrop’aşa gon3’k’imeri nek’na rt’u. Dido skele na uğun Lazistanişi didi limanepe ren, T’amt’ra, Rizini do Xopa. Lazistanişi limanepeşen galeni terepeşa mgvanaşi maddepe, txiri, şu xila do lilve, markvali, dik’aşi mkiri, kapçiaşi yağoni filet’o, uça çai, pağobaşi maddepe, elekt’rik’oni eşya, elekt’rik’aşi malzemepe, upşu lpg tank’i, pambuği, t’ekst’ili do t’k’eboni dolokunepe, pvc lambri, ok’iduşi malzemepe, mermeri, mdf, muk’ava-kart’oni, oxorişi do ofisişi çkvadoçkva malzemepe, t’angi, kromi, k’urşumi do çink’oşi cevheri, pen3’k’aşi levha, çiment’o, klink’eri, bentonit’i, aksi, tamp’oni, makinaşi yaği, goktaşi poyra gamiçinen. Galeni terepeşenti kovaluri dik’a, ker3ela, noşkeri, kerest’e-cirek’i, ncaşi 3omi, melaminoni kart’ali, t’ekst’ilişi malzeme, çkvadoçkva t’k’ebi, xurda metali, saci, p’et’roliş purengi do xurgişi malzemepe, çkvadoçkva makina, omkvoni mili, kimialuri madde, kart’oni, mgvana yiç’opinen.
T’amt’raşi limani: 1946 3’anas temeli muşi na dolidginu ağani limani, 1954 3’anas içodinu do oxizmet’us kogeç’k’u. 1990 3’anasti limanişi modernizasioni diçodinu. 21.11.2003 tarixis, Alport T’amt’raşi Limaniş Oktaluşi A.F.şa 30 3’ana şeni koniçinu. T’amt’raşi limanis, gon3’k’a zoğapeşa menk’ileri İrani, İrak’i, Azerbaycani, Armenia, Turkmenistani, Ozbekistani streri ist’oriuli Met’aksişgzaş jin na z’inan dobadonape, Avrop’aşi do kianaşi p’iasapeşa nunç’işinuşi dido beciti roli uğun. 1.135 met’re ginz’enobas didi mendireği, 440 met’re ginz’enobas ç’it’a mendireği do 380 met’re ginz’enobas majuroni mendireği na uğun T’amt’raşi limanis; 3,8 milyon t’oni/3’ana geğinuşi, 3 milyon t’oni/3’ana odep’oluşi, 2.000 adedi/3’ana k’araviş k’abulişi do 250.000 adedi/3’ana magzaleşi k’apasit’e kuğun.
Rizinişi limani: 13.08.1997 tarixis, Riport Rizinişi Limaniş Oktaluşi A.F.şa 30 3’ana şeni koniçinu. Ç’it’a k’aravepe do maçxomepeşi feluk’apeşa na nuxizmet’ups rixtimi, 3 dane ticaret’uri rixtimi do 1 dane Ro-Roşi rixtimi na uğun limani, Lazistanişi irişen k’ut’ali limani ren (-12.00m). 2,5 milyon t’oni/3’ana geğinuşi k’apasit’e na uğun limanis, 10 t’ononi 2 dane mobili vinci do 2 dane 5 do 10 t’ononi forklift’i koren. Ndğeri 5.000 t’oni cevheri mok’idinuşi k’apasit’e na uğun limanis, 10.000 m² motveri dep’os 60.000 t’oni cevheri istok’inen, k’onveyori k’ala moik’idinen do gale gamiçinen.
Xopaşi limani: Geografiuri st’at’u muşi k’ala Uçazoğaş kianaşa na goin3’k’en nek’na yado na işinen limani, 26.06.1997 tarixis Park Mazoğaroba Xopaşi Limaniş Oktaluşi A.F.şa 30 3’ana şeni koniçinu. 104.000 m² saxa na uğun limanişi mendireğiş ginz’enoba ren 1.346 met’re. 18.120 m² motveri dep’o do 72.622 m² umotvu dep’oşi saxa na uğun limanis; mok’idinu, moçodinu, t’erminali, odep’olinu, rexberoba, moşletinu do likit’i tesisepe iktalinen. Oşkendaasiaşi Resp’ublik’apeşen na yiç’opinen pambuği, Xopaşi limanişen Turkiaş doloxe do gale incğoninen.
|
TÜRKÇE
