|
MŞKEREPUNAPEŞ DOLOXE AR OPUT'E: MŞKE
Coxo muşi mşkerişen mulun, muç’o eşo mşkerişi mt’k’alepuna steri ren, pukirobaşi oras k’vint’eli do m3’k’upmç’ita pukironi mşkerepeş memskvaneri ont’uleşa kanikten martalurot. İrişen dido mşkeri, 3’ipuri, ç’uburi, 3xemuri, txomu steri ncapeş oqopinot mt’k’alepunape uğun. Xopaş noğaşa aşi k’ilomet’ro mendranoba uğun, Livaneş şaraş jin na gez’in Xopaşi indust’riaş sit’eş rak’anişi k’ap’ulas gedgin. Xendek’i do Keiçxana coxoni raionepe k’ala ofi3ialuri coxote Cumxuriet’işi Maalle do3’opxinups. Keiçxana do Xendek’işi şkaşen na gyulun Zendidiş ğalik, Xendek’i do Mşke, Keiçxanaşen ok’ortaps. Am raionepeşi irişen jindole Mşke gedgin. Jilentuna muşis Keiçxana do Xopa, 3’alentuna muşis Ardala, gyulva k’eleni muşis Gvarci do Zendidi, yulva k’eleni muşisti Amç’işe do Mxigi coxoni oput’epe golaz’in. İrişen mağali dudi muşi na uğun Nonç’ona do Rak’anok’vaçxe steri rak’anape muşişen Xopaşi zuğak dido memskvaneri do mç’ipaşaşi kaiz’iren.
1955 3’anapeşen doni şuçaişi agronomia, an3’ineri orapes eşo dido va rt’asnati txiriş agronomia, diditioni 3xovarepeş ma3xovaroba, lazut’i do çkva mergyapeşi agronomia ixvenen. Mara Mşkeşi irişen didi skidalaşi 3’k’ortolik şuçaişi agronomia ren. Xendek’i do Mşkeşi oşkendas geç’k’ap’uroni doguroni uğun mara Xopaş noğaşa k’oçepe muşişi obargu, mendra didi noğapeşa mendaxtimu, mamgurepeş dido udoskidoba, ovro 3’anurot uoçodinoni gamantanuşi steri sebebepe an3’ineri orapes xususi ar çaiş yeç’opinuşi ok’rebule oqopinot kaixmarinen. Mşkeşi maobargalepeş didope 1877 Osmanuri-Rusuri limaşk’ule Xopaşi manz’ageri oput’eş Laziş k’erapeş moxtimurepek 3’opxups.
1970 3’anapeşk’ule çaiş agronomia ordu do xolo am 3’anapes na giç’k’u Turketişi didi noğapeşa mendaxtimu, Xopaşi noğas obargu, dulyaşi ogoru, dulyaşi alt’ernat’ivepeşi dvaç’iroba, universit’et’i steri mç’ipaşaşi gamantanuşi dvaç’iroba steri namtini sebebepeten dido k’oçepek Mşkeşen mendaxtes, andğalepes didopete didi3’anerepek iqven qinobaşi orapes mara mapxaşi tutapes çaişi o3’ilu do Mşkeşi mok’itxu şeni dido k’oçepek mulurnan Mşkeşa. Gamantanuşi st’andart’i irişen mağali na uğun Xopaşi oput’epeşen ar teri ren Mşke. Belediyeşk’elen noxvene memskvaneri bit’oniş gza uğun, Mşkeurepeş noxvene hukumetis çaişi gamaçumuşi ok’rebuleti uğun xolo eşo.
Abdumanişi, K’aralişi, Xacişi, Kyurtişi, Dursunişi, Şukrişi, Ortulişi, K’uk’ulişi, Met’ulişi k’erapek Mşkeurepeşi k’erape do3’opxups. Rak’anok’vaçxe, Nonç’ona, Paxurati, Dim3xu, Nok’andale, Binexepuna, Meç’urç’a, Nobağule, 3’alenidixa, Jilenidixa, Viya, 3’k’aqeni, Batuği, Didiqona, Ç’it’aqona, Noxurmeni, Mskibuğali, Abano, Mşkecenişzeni, Kvamurgi, Didiruba, Ç’it’aruba, Pa3xaşçai, 3xemurişruba, Seç’evati, Nobrinconi, Xelimefendişzeni, Doguronişemti steri svape Mşkeşi oput’e 3’opxupan.
www.kolkhoba.org sait’işi ideaş mancepek, kianas iptinurot Lazuri ar sait’iş o3’opxinuşi magurdolingonepek, magamaçkvalepek jur Mşkeurik iqves do şaramşinepe muşi k’ala am şaras kogedgites. Lazuri nena do k’ult’ura Mşkeurepeşk’elen k’arta oras kogeimancenasunon do çkar oras umancane va nit’alasunon.
|
TÜRKÇE
