დუდბუტკა

ნოდგითაში ნენა ავარული

ავარული (მაარულ მათს: გერმალური ნენა), დიდოთე დაღისთანის ნა სქიდუნ ავარეფეში ნანანენა რენ. ოლანდეჲულვა კავკასიური ნენაფეში ნახ-დაღისთან გრუპიშ დოლოხე იშინენ. დაღისთანიში რესპუბლიკაშ ოჶისიალური ნენაფეშენ ართი ნა რენ ავარული, დობადონას ირიშენ დიდო ნა იღარღალენ სოთინური ნენა რენ. რუსია- კავკასიაში ლიმაფეს ნა გოწვანჯღონუ სუმ დიდი იმამი; იმამ გაზი მუჰამმედი, იმამ ჰამზადი, იმამ შამილი დო რუსია- კავკასიაში ლიმაფეს მალიმობა მუშითე ჩინაფერი ხაჯი მურადიშითი ნანანენა ავარული რენ ნოდგითაში ნენა.

ქიანას ამ ნენა ნა ღარღალაფს 1.500.000 კონარი ავარი სქიდუნ. ავარული იღარღალენ დიდოთე დუდვათანი მუთეფეში ავარისთანის ედო ხოლო რუსიაში ჶედერასიონის, აზერბაჲჯანის, ჩეჩენისთანის, კალმუქიას, ოქორთულეს, კაზაქისთანის, სურიას, ირაკის, ლუბნანის, მისირის, სუუდი არაბისთანის, ურდუნის დო თურქიას. ავარეფეში ნენა მჯვეში მეზოპოტამიაში ოკომცხვერი ნენაფეს ნუნგაფს. ყირყინტიშენ გამახთიმე დო ოფურჩონი ხონარეფე უღუნ. ოკომცხვერი ნენაფეს ზიტაფეში მაანაფე, ჩოდინა მუთეფეშის ნა ნიმცხვენ ჰეჯეფეთე ჯინჯიშ უგოქთირე აღანი ჶორმეფეშა ნიქთენან. ავარული, 5 ხონარონი, მთელოთ 50 ბონჯაშენ წოფხინერი ალბონი მუშითე ხამფა არ ნენა რენ.

ავარული ნენას, ავარი (მაარულა), ანდი (ქუანნი), დიდო (თსუნთალ) ჲადო სუმ დიალექტი უღუნ. დიალექტეფეში შქას ჶონეთიკა, მორჶოლოგია დო ვოკაბულეროთ ჩქვანერობაფე რენ. ავარული ნენა იფთინეროთ 15. ოშწანურას იჭარინუ. იფთი ნა იხმარინუ ქორთული ალბონი რტუ. 17. ოშწანურაშენ დონი მაღარღალეფეშ კელენ ნა იღარღალენ ანდღანერი ავარულიშა ადაპტასიონერი არაბული ალბონი იხმარინუ თინა 1928 წანას ლათინური ალბონი იკაბულინუ. სოვიეთური ართობაში მეჭირობათე 1938 წანას კირილური ალბონითე ოჭარუს გეიჭკინუ დო ანდღა ხოლოთი იხმარინენ.