დუდბუტკა

სახაჶეფეში ჩარჩი

სახაჶი რენ არაბული ნენა. ხმარინერი სვარა ნა გამაჩაფტუ მითხანის ჯოხონტუ მჯვეში ორაფეს. სახაჶეფეში ჩარჩი რენ ირიშენ მჯვეში მასვარეფეში ჩარჩი. ჩარჩი გელადგიტუ მოთრაგერი ჩარჩიში მაჶესეფეში ნეკნა კალა მეჩეთი ბეჲაზითიში შქას. ოსმანური პერიოდის, მედრესეფეში გომორგვას გოშადგიტუ სახაჶეფეში დუქჲანეფე. მოთრაგერი ჩარჩიში ოკიდობა 1460-ონი წანაფეს დიჩოდუში, დუქჲანეფეშენ ნამთინეფე ნიჩინუ სახაჶეფეს. 1894-ს ნა ჲეჩქინდუ მპოლიში დიდი დიხაშკანკალათენ მოთრაგერი ჩარჩის ნა ჲეჩქინდუ ოჭვაში სებებითენ, სახაჶეფექ ნაშქვეს მოთრაგერი ჩარჩი დო ანდღანერი სვას ქოდიბარგეს. სახაჶობა რტუ ბეჯითი პროჶეციაფეშენ არ თერი ორა მუშის.

სახაჶობაში პროჶეციაქ ჲეჩქინდუ 15 ვარნა 16. ოშწანურას ჶათიჰ დო ბეჲაზით სთერი მეჩეთეფეში გომორგვას, მედრესეფეში მაგურეფეს სვარა გამაჩამუთენ. მჯვეში ორაფეს, სახაჶეფეში დუქჲანეფექ იხანდეფტუ, აწი მაჲორღანეფე ნა გელადგინ ბურმეს. ევლიჲა ჩელებიში ჯოხოთე ჭარელეფეში თოლითენ, ჩარჩის ჟურნეჩდოვით სახაჶური დუქჲანი ქორტუ დო აქ სუმოში კონარი შური იხანდეფტუ. სახაჶეფეს უღუტუ იერარქია. უსტა, კალჶა დო ჩირაღეფე რტეს მეკირელი ლონჯა ნა ითქვეტუ კორპორაციაშა. კართა სახაჶის ოსქედინუ უკორტუ ჩირაღი, კალჶა, უსტალობაში პერიოდეფე წოროთ. სახაჶეფეში დუქჲანეფე გუინწკეტუ დო გეინკილეტუ ხვამათენ კართა ნდღას. ოსმანური სქიდალას, კართა ლონჯა, კართა პროჶეცია უყონუტუ ფირი ნა ითქვეტუ არ ხჩეთომონი. ბასრალური აბდულლაჰ ჲეთიმი ეჶენდი იშინენ სახაჶეფეში ფირი. ემ პერიოდის; ჰათთათეფე, მუჯელლითეფე, მუზეჰჰეფეფე, მაქარტალეფე, მაკალემტრაშეფე დო მამურექქეფეფეთი გოლადგიტუ სახაჶური დუქჲანეფეში გომორგვას.

სახაჶეფეში ჩარშის აყუ დიდი არ ოჭვა 1950-ს. მპოლიში ბელედიჲექ კიდუ ჩარჩი აღნებუროთ. სახაჶეფექ დიბარგეს აღანი კიდერი დუქჲანეფეს 1952-ს. წოხლენერი ორაფეს, ისტორიული ნოხვენე დო ხეთენ ჭარელი, ქვაშგამოჩქვა დო მჯვეში ბონჯაფეთენ ჭარელი სვარაფე გამიჩინეტუ. ანდღანერი ნდღას დიდოფეთენ მაგურეფე დო ტურისტეფეშა სვარაფე გამიჩინენ სახაჶეფეში ჩარჩის.