დუდბუტკა

ქუნიში ოთხომურუ მენენჟიტი

მენენჟიტი რენ ქუნიში ზარეფეშ ოთხომურუთენ ნა ჲეჩქინდუნ არ ზაბუნობა. თიშყვილიში ოზარარუ ვარნა ოშქენდური ყუჯიში ზაბუნობაში სებებითენ ქუნიში ზარეფე ითხომურენ. დიცხირიქ ნა თირუფს მიკრობეფექთი ხუსუსუროთ ჭიტა ბერეფეს მენენჟიტი ოღოდაფს. მენენჟიტიშა მიკროორგანიზმაფექ გზა მეჩაფს. ირიშენ დიდო ნა იძირენ მენინგოქოქ ჯოხონი მიკრობიქ დიცხირიში ოზეჰირუშათი სებები მეჩაფს. მენენჟიტის ბაქტერიული დო ვირალური ჲადო ჟურ ჭეშიდი უღუნ. ბაქტერიული მენენჟიტიში ირიშენ ბეჯითი სებები რენ ჰიბ ჯოხონი ბაქტერი. ვირალური მენენჟიტი გენერალუროთ უმოსი დიდო იძირენ დო უმოსი ფერფუ გოლიჩქვინენ. ვირალური მენენჟიტის ანტიბიოთიკაშ ოხმარინუ მუთუ ვარ ნარგენ. ნიშანეფე მუში რენ; ტუცანობა, ონთხორუ, თიში წკუნი, ჯინიქიში ოკაპეტუ, ჯინიქიში წკუნი, თოლიში მოთვალაშ მონკანობა, ოთირთინუ დო ოყინუ. მანიშა ოჩქინუ დიდო ბეჯითი რენ. შველა შენი შქაშენ წკარი ეზდიმუ უკორს.

მენენჟიტიქ გეჭკალას მონკა გრიპი სთერი ოწონაფაფს. გენერალუროთ ჯინიქიში კაპეტობათი ნაყონოფს მარა ნა ვარ იძირენ ხალეფეთი იყვენ. ზაბუნიში ხალი არ-ჟურ დღაშ დოლოხე იმონკანენ. მენენჟიტი ვარნა დიცხირიში ოზეჰირუშა სებები ნა მეჩაფს მიკრობეფე ნორმალუროთ ადამეფეში ხურხის სქიდუნ. დიდო ადამიქ ზაბუნობა უოღოდამუთენ ამ მიკრობეფეში მათირალე სთერი სქიდუნ. ამ მიკრობეფე ადამეფეში შქას ოხვალუ, ოჩინდინუ, ოჯუნდინუ დო ოყურუში გზათენ ნაკლიმენ. 0- 5 წანერი ბერეფე, 15- 20 წანერი აღანმორდალეფე დო ბადი-ხჩინეფე რისკიში გრუბი წოფხუფან. მენენჟიტი ნა გოლოჩქვუ დიდო ადამიქ ამ ზაბუნობაშენ მთელოთ მუჩითუნ მარა ნა ოღურინაფსთი ქოიძირენ. ვარნა ზაბუნობაშ კულე საკატობაფე ქოდოსქიდუნ. მაღალი ტუცანობა, თიში წკუნი, ონთხორუ, ობუნდურუ, თე დო ხონარიშა ჰასასიეტი, ადალეში წკუნი, ბერეშ თუდე ოქთირუშ ორას ტრიკეფე ეწუზდაფტაში ოწკუნუ დო ამუშენი ომგარუ, ჯინიქიში ოკაპეტუ სთერი ნიშანეფე ართოთთი ჲეჩქინდუნ თითო თითოთი. ზაბუნობა გენერალუროთ არ-ჟურ დღაშ დოლოხე იმონკანენ. ჩიჩქუ ბერეფეს ნა იძირენ ნიშანეფე ნორმალიშენ ჩქვანერი იყვენ. ჯინიქიში ოკაპეტუ ვარ იძირენ, ხურაში ტუცანობაშ ნორმალიშენ ოთაფალუ, ბინგილდაღიში ობარუ, ოკონაღურელი ოწკომილუ, ონჯირუში ხალი, მონკა ზაბუნი დო უფერონი ოძირამუ, ჰასასიეტი, უიშთაღობა, ელიჩინაში ვარნა თუდე იფაღინაში უხუზურობა, ომგარინუ, ოწინწინუ სთერი ნიშანეფე ოწირაფს.

დიდო ადამიქ მენენჟიტიშენ მთელოთ ქომუჩითუნ დო არ-ჟურ თუთაშ დოლოხე ნორმალური ოსქედინუს ნაყონონი ხალი ქომოგაფს. მარა ნამთინი ადამეფეს გინძე ორალონი საკატობაფე ქოდოსქიდუნ. მენენჟიტიქ სებები ნა იყვენ საკატობაფე: ნდურობა, აქსიონიში ოკოხვობა, კონსანტრასიონიში ოკოხვობა, კოორდინასიონიში ოკოხვობა, დოჭკინდინობა, აქსიონიში დორკინობა. ნამთინი შიქაეტეფე ორაშ დოლოხე ინწურანენ მარა ნამთინეფე ვარ იკაენ. ნდურობა სქიდალაში მორგვალის ნაყონოფს. მენენჟიტი ადამიში სქიდალა მთელოთ ოქთირაფს. მესელა, ბერეფეს მენენჟიტიშ კულე დიდო აქსიონერობა, ოგორუში მეჭირობა იძირენ. წანერეფექ სოსიალური დო ოხანდური სქიდალა მუთეფეშის ნა ნოთესირაფს პრობლემაფე ნწირუფან. ნამთინი ადამეფესთი ზაბუნობაშ წოხლენი სთერი დულჲაფე კაი ვარ ახვენენან. ნაყონონი მეჭირობა ჲეჩქინდაში სპესიალისტეფეშა ნა უკორს კონარი ორდოშენ ოხთიმუ რენ დიდო ბეჯითი.