დუდბუტკა

ნახჩივანიში ავტონომიური რესპუბლიკა

ნახჩივანიში ავტონომიური რესპუბლიკა (ნარ), (აზერული: ნახჩივან მუხთარ რესფუბლიქასი) აზერბაჲჯანიში რესპუბლიკაშა მეკირელი მარა აზერბაჲჯანი კალა სინორი ნა ვარ უღუნ დობადონა რენ. ოლანდე დო ჲულვაშკელე არმენია, ომჟორე დო გულვაშკელეთი ირანიში ლეტაფე გოკირს. გულვაშკელე ნა დგინ თურქია კალა 13 კილომეტრონი სინორი უღუნ. ნახჩივანიში შქაგურნოღა კალა იღდირიში მენდრანობა რენ 160 კმ დო ნარ კალა თურქიაში ოშქენდას ნუნჭუშობა დო თიჯარული დულჲაფე დილუჯუში ობაჟეშენ იხვენენ. ნოღა ნახჩივანი დო გომორგვა მუში რენ ისტორიაში ირორა ძირამერი ბეჯითი ისტორიული ცენტრეფეშენ არ თერი. გეოგრაჶიუროთ ისტორიაშ მორგვალის ჲულვა დო გულვაშ ოშქენდას ირორას ბეჯითი გოლახთიმონი დო კონტაქტონი სვაფეშენ არ თერი წოფხერენ.

ნარ, ნანანოღა ნახჩივანი დო ამ ნოღაშა მეკირელი 7 ილჩეშენ წოფხუნ (შერურ: 10.700, სედერექ: 12.000, ბაბექ: 65.300, შაჰბუზ: 20.300, ჯულჶა: 35.900, ქენგერლი: 10.000 დო ორდუბათ: 40.600). ნოღა ნახჩივანის 85.000 ნაკონობა უღუნ დო ნარ-ში მთელოთ ნაკონობა რენ 370.000 კონარი. ნარ-ში დიხაშზომა რენ 5.500 ქმ². დიხაფე მუში გერმაფუნა ნა რენ ნახჩივანის, ზენეფეში ირი დიხაფეშა ნისფეტი 20%, მტკაფეში ირი დიხაფეშა ნისფეტითი 2% რენ. დობადონაში ლეტაფე კართა კელენ გერმაფეთენ გოკირელი რენ. ნახჩივანი დო არმენიაშ შქას ჭიტა კავკასიაში გერმაფე გოლაძინ.

თურქიაშკელენთი იმზა გედვერი 1921 წანაში მოსკვა დო კარსიშ აქტეფეში თოლითენ ნარ, ავტონომიაში სტატუში შარტითენ აზერბაჲჯანიშა მეშქვინერი რენ. ნარ-ს დოლოხენი დულჲაფეს ავტონომია უღუნ მარა ნოდგითა დო გალენი დულჲაფეს აზერბაჲჯანიშა მეკირელი სტატუ უღუნ. კანონიში ორგანი 45 მაკათურონი ალი მეჯლისიშენ, ხეცალაში ორგანითი ნაზირეფეში კომისიაშენ წოფხინერი ნახჩივანის, ჰუქმიში ვაზიჶე თიმოშლეთინერი მახქემეფეშკელენ იხორცელინენ. ნარ-ს ეკონომიკუროთ უმორდინერი ხალი უღუნ. მეკირელი ნა რენ აზერბაჲჯანი კალა სინორი ნა ვარ უღუნ დო ხუსუსუროთ არმენია კალა დიდო გინძე დო მენკილერი სინორი ნა უღუნ, ირანი კალა ეკონომიკური დო თიჯარული კონტაქტი მციქა ნა უღუნ შენი დობადონა მოთრაგერი ეკონომიკური ხალიშა ქოდოლოლერენ. მარა ნარ-ს გამანთანაში კიდალაფე დიდო მორდინერი უღუნ. დობაღინერი გეჭკაფურონი დო ოშქენდური ნწოფულაფეშენ მეტა ჩქვადოჩქვა პროჶეციაში ადამეფე ნა გამოჩქვინაფს არ დანე ოშქენდური ნწოფულა, არ დანე ოხენცალური უნივერსიტე დო სუმ დანეთი ხუსუსური უნივერსიტე ქუდგინ.