დუდბუტკა

მუჭო არ დუდკანონი დომაჭირენან?

დუდკანონი, ოხენცალეში თემელური ორგანიზაციაფექ მუჭო იხანდასუნონან ნა ოწირაფს ნამთინი თერეფეს ჭარელი, ნამთინი თერეფესთი უჭარელი გენერალუროთ კაბული ხვენერი კაიდეფეში კორობღა რენ. დუდკანონი, ოხენცალეშ ოქთალაში სტილი ნა ოჩქინაფაფს თემელური კანონი რენ. ედო ხოლო დუდკანონი ნა ითქვენ ამ ტექსტითენ კოჩეფეში თემელური ჰაკკეფე დო ოხოშქვინობაფე ითემინატინენ. თურქიაშ რესპუბლიკაში ანდღანერი დუდკანონი, 1982 წანაში დუდკანონი ოყოფინოთ ნა იჩქინენ ტექსტი რენ. 12 სტაროშინა 1980 თარიღონი დარბეშ კულე ხაზირელი ნა რენ დო 18 გიმუა 1982 თარიღის რეჶერანდუმი კალა კაბული ოხვენუთენ თათბიკინერი რენ. 1980-1983 წანაფეში შქას ოქთალა ხეს ნა უღუტუ ასქერული ჯუნთაშ მაქთალეშკელენ ჭარელი რენ. 1982 წანაში დუდკანონიშ ნამთინი თემაფე, 2001 წანას დო ჩოდინუროთ 2004 წანას ავროპაშ ართობაში რეჶორმეფეში შენი ქთირელი რენ.

თურქიაქ ნანჭინეროთ 200 წანაშენ დონი დუდკანონი დო ემუშა მეკირელი დემოკრასი მუში გორუფს. ქიანას დემოქრასი კალა იქთალენ ჲა ნა ითქვენ არ თერეს აშო გინძე ორაშ დოლოხე თი-მუშიშა მემსქვანერი არ დუდკანონი უოძირამუ გურიშ მეჭვონი არ ხალი რენ. თურქიას დუდკანონი ოჭარინუშ ისტორია 19. ოშწანურაში მაართანი გვერდიშაქის უკუნიქთენ. 1808 წანას სენედი ითთიჶაკი კალა ნა გჲოჭკუ დუდკანონიშ ოგორუში მერთებეფე აშო რენ; 1839 თარიღონი გულჰანეში ჰათი ჰუმაჲუნი, 1876 თარიღონი კანუნი ესასი, 1921 თარიღონი თეშქილატი ესასიჲეში კანონი, 1924 წანაში დუდკანონი, 1961 წანაში დუდკანონი დო 1982 წანაში დუდკანონი. მარა თურქიას ანდღანერი ნდღაშაქის თი-მუშიშა მემსქვანერი არ რესპუბლიკური დუდკანონი ვარ ახვენუ!

დუდკანონის, ნაციაში ტრადიცია დო ადეთეფეშა, სოციაში ისტორიალური ფახაფეშა, სოციალური დო ეკონომიური სტრუქტურაშა, კულტურული კიმეთი დო ნორმეფეშა, დობადონაში მკულე დო გინძე ვადელონი ნაციონალური ნოღირაფეშა აჰენკური ოყოფინუ დვაჭირს. დუდკანონის “თურქი” ვარდო “დობადონამშინე” ტერმინი ოხმარინუ, პოლიტიკური ჰაკკეფეს ჟინ ნა რენ დესფოტური ხალი დო კულტურული ჰაკკეფეშ თემას ნა რენ შქურნაჯობა ოელასთიკუ, დუდკანონი “დობადონა-ადამი-ოხენცალე” ჲადო ხვენერი არ ტექსტიშენ ოყოფინუ, დუდკანონის ჩქარ ინსტიტუტის ვარნა ღირსის მეშრუიეტი მოგაფუში ენდიშე უოყოფინუ უნონ. ჰაქიმიეტი, დობადონამშინე დო სეკულარიზმიშ ტარიჶიშ ოქთირუ, მებუსეფეში უელაჩამუშ ომციქანუ, ოხენცალური უნკილაფეშა ამირი მუთეფეშიში იზნი ვარტაშა ომახქემუ, პრეზიდენტიშ ოთაინუში მენჯელიშ დვარკინუ, ასქერული მაღალი შურა, მეჰაქიმეფე დო მესავეფეში მაღალი კონსეიში კარარეფე მახქემეში კონტროლიშ გონწკიმუ უკორს. პრეზიდენტიქ ოხენცალე ნა ოთემსილაფს შენი დირექტოთ ხალკიშკელენ ოცხუნუ ნომსქუნ. ჟურ კელენი მახქემეში სისტემა ნაშქვინუ დო არ კელენი მახქემეში სისტემათენ ნოყონუ, ასქერული მახქემეფე დო ასქერული ჲარგითაჲი გენკილუ უნონ. ასქერეფეში ხეშენ ოფუტური სფეროფეს ნა უღუნან სელაჰიეტი ეზდიმუ დო “ოფუტური ფოლიცია” ოწოფხუ დვაჭირს. კოჩეფეში ოკათინუშ მონძინუ შენი აღანი დუდკანონის “ცენტრული” ვარდო “ლოკალური” ოქთალაში გაგნაფათენ ოხაზირუ უნონ. რელიგიაში კულტურა დო ეთიკაში ჩქინაშ გურაფა ომორდინუ დო მეჯბურობა მუშიშა ნაყონუ უკორს. გამანთანუ დო გურაფაში ჰაკკიშ უთეჶრიკუთენ კართა ადამიშა მეჩამუშ ოხორცელუ დვაჭირს.

სივილი, დემოკრატიური, ადამიშ ჰაკკეფეში სთანდარტეფე ინტერნაციონალური სევიეშა ნა ჲონჭაფს, ოხენცალეში ინსტიტუტეფეში ოშქენდას ნა რენ კონტაქტი პარლამენტური რეგიმიშა ნაკაელი ნა წოფხუფს, სოციაში კართა ბურმეს ხე ნა მუდუმერს, მაკათურონი, გონწკიმერი დო დიდოფერი არ დუდკანონი ოჭარუ უნონ. ჩოდინუროთ აღანი დუდკანონის, დემოკრატიური სოციაფეში ელანცახერი ორგანიზაციაფე ნა რენ პოლიტიკური პარტიაფე, სოციაში სივილი ორგანიზაციაფე დო პროჶეციაში ორგანიზაციაფე კალა ართოთ დო ავროპაშ ართობაში ნორმეფე დო კოფენჰაგიში კრიტერეფეშ ლანდეს ოწოფხინუ დვაჭირს.