OSETEPE DO ABXAZEPE ŞENİ 'CUMALURİ' ÇODİNA

Abxazepes do Osetepes timoşletinerobaşi irade dvark’inan yado Tbilisişi oktalas na numxvacups do Kartvelist’uri faşizmas na nuğinz’ibups Okorturaşi p’at’rik’i 2. İlias, Abxazia do Omjore Osetia go3’oğinu şeni Xrist’ianuri cumalobaşen imendi uğun. 2. İlia, Rusia k’ala p’roblemape mo3’qvaluri gzapeten oçodinu, irişen mtini do irişen k’ai metodi ren ya tku do "Artneri religia na uğun jur xalk’is, artikartişa duşmanoba var axvenen. Aşo ok’oduşmanus k’ai moxtanora var uğun" yado noqonu. P’at’rik’i 2. İliak, Abxazepe do Osetepeşa "Abxazepes do Osetepes, renoba mutepeşiş noqonu şeni Okortura k’ala ok’omtelu dvaç’irnan” yadoti gamognapu.

"AMAGİ DO TXİRİ ÇKİNİ VİMANCELAT"

Bulancaği do muşi gomorgvaşen noğa do ç’it’anoğapeşen na moxtu mamralepek kok’oibğes ot’ogarişi meidanis mit’ingi şeni. Giresunişi xalk’uri teat’rik nosahnu “Txirişi munt’uri: AKP” coxoni kuçaşi teat’ri. Oput’epeşen na moxtu txiriş mamralepekti ğarğales mit’ingis. Edo o3’ires entepeşi derdi do meç’irelobape. K’ursuşen na ğarğalu mamralepek eşo tkves: Txiriş mamralepe mağduri na qu xe3alaşi naziri do mebusepes gza var mepçaten Uçazoğaşi t’erit’oriaşa amaxtimuşa. Moxtanoraş svalonuri 3xunas AKP yaşik’is gevoxvaten” Mit’ingis Findikseniş generaluri dudmaxvence Kutsi Yaşar do Mp’olişi mebusi Ufuk Urasikti ğarğalu. Mit’ingi diçodu saat’i 13.00-s.

3'URAK'ALOBAŞİ OP'ERA3İA MP'OLİS

Organizeri k’abaxat’epe k’ala ok’vak’iduşi burmeşi direkt’orobaşi ek’ibepek ot’elepes na qves op’era3iaşen çkina meçu Mp’olişi vali Muammer Gulerik. Menyaş galeşen oxorcalepe meqonuten, zoriten xe na geidvinu do 3’urak’alobaşi sekt’oris na ixmarinen yado na ognapu valik ar 3’anaşen ekole ar oraşen doni oşkurinobaşi mencelepek avt’orit’oni resp’ublik’aşi masavepeşi go3’oncğonerobas na qves sakvarepe diçodu ya tku aşo naqonu:

“Otxo ot’elis xveneri op’era3ias 94 şuris xe geidvinu. Antepeşen 53, skidalaş oxorca na icoxen do galeni p’asap’ort’oni 3’urak’ape, majurapeti renan am sakvaris şkak’oçoba na ikipanpe. Mara am organiza3ia na ikipanpeşen didopeten vit k’oçi iç’opinu. Bediğoç’veroba ren, oşkurinobaşi xalk’işen namtinepeti am dulyaşi doloxe na rt’u, k’abaxat’onepes 3’oxleşen muxbiroba oxvenuten ambari na meçes varna na nuşveles steri obarbalobapeti koren. Amuten şkviti oşkurinobaşi xalk’i şeni goşogorak naqonops. Entepeşen met’a, çkva mitxanepeti iqven oşkurinobaşen, namupek na ak’ates am k’abaxat’is.” K’abaxat’oni k’artayis xe gevodvaminonan-ya na tku Mp’olişi valik oşkurinobaşen ar mitxanik am sakvaris ak’atu na, aya na eç’opu do na ognaputi do adliuri mak’amepeşa na mendiqonuti xolo am oşkurinobaşi menceli ren-ya. Am mencelik qvasen mtel çilatape na qupes. Am op’era3iakti majura op’era3iape steri ixvenasen-ya tku.

ÇETES NA NUXANDEPS P'OLİSİ

Xark’i p’asap’ort’oni esk’ort’i k’ulanepe; masave, sudia do burok’rat’epeşa na mendiqonu do entepeşi omz’ikuşi z’irapape şant’aji şeni mpuleri k’ameraten na eşiğaps çete k’ala artot na ixandeps Mp’olişi oşkurinobaşşi direkt’orobaşi ok’ont’rolu do disiplinişi filialeşi direkt’ori N. K.-k 3’urak’alobaşa zoriten mendaçkveri mtel xark’i k’ulanişen ar dğas 20 Turkuli lira na ezdu, oxui3’onu. Organizeri k’abaxat’epe k’ala ok’vak’iduşi filialeşk’elen goşogoras na go3’vancğonen Mp’olişi resp’ublik’urii dudmasavobas na nuncğonu rap’orişi toliten, am gzaten, çete na goçumert’u p’olisişi direkt’orik mogapt’u 400- 600 Turkuli lira ar dğas. Mosaşi muxuxi ren ya na itkven, 3’oxle Fatihişi ç’it’anoğaşi oşkurinobaşi direkt’orobas na ixandept’u jur oşkurinobaşi umçaneti, finansiuri filialeşi direkt’orobaşi t’eknik’uri ontxozobas ixandept’u. Çete k’ala na uğut’es t’ilifonepeşi ğarğalepe, çetek na meçu muşiuri t’ilifonuri ğarape ve ontxozobapes yeşiğeri suretepe steri dok’ument’epetenti k’abaxat’oni, na ren p’olisepeşi şefepes xe geidvinaseni varna var geidvinaseni, oxui3’onasen Mp’olişi resp’ublik’uri masavobaşen na moxtasen direkt’iviten.

Dudnaziri Recep Tayyip Erdoğanis ar 3’anaş 3’oxle mencğoneri ixbarişi kart’alişk’ule 3’urak’aloba do şant’ajişi çeteşa medgineri op’era3ia na geiç’k’inu organizeri k’abaxat’epe k’ala ok’vak’iduşi filialeşi ek’ibepek otxo dğa 3’oxleti Buyukçekmeces Dedemani; Fatihis Seranda, İnter İstanbul do Topkapis Astoria coxoni ot’elepes 3’urak’aloba do şant’ajişi çeteşa medgineri op’era3iapeti 3’opxeret’u. Op’era3iapes xark’i p’asap’ort’oni jurneçdovit oxorca k’ala çeteşi mak’aturepes xe geidvineret’u.

"QUEEN VİCTORİA" DO "POESİA" ALSANCAKİŞA KONANÇ'U

İngiltereşi p’rensi Charlesik İngilteres 3eremoniaten zoğas na geinç’u do kianaşi irişen luksi k’ruvaziyerişi gemi, 6 muru3xoni ”Queen Victoria” moxtu İzmiriaşa iptenerot. 600 milion Amerik’anuri dolaroni gemi ren 10 k’atoni. K’ruvaziyerişi t’urizmis k’arta dğas na irden do acentapeşi rot’apes didopeten na izi’ren İzmirik numisafiru kianaşi irişen luksi k’ruvaziyerişi gemi. “Cunard” magemobaşi k’omp’aniaşi anşi muru3xoni “Quenn Victoria”k, erk’ina dolot’k’oçu Alsancakişi baxonas. 2 vitoş magzale do nanç’inerot vitoş p’ersoneli k’ala Grek’iaşi k’un3’ula Mikonosişen İzmirişa na moxtu k’ruvaziyeri dodgitu Alsansakis limcişakis. İzmiriş baxonaşi dudmaxvencobak ognapu Queen Victoriak qvasen otxo seferi çkva İzmirişa 3’ilvaşakis.

Majura k’ele İt’aliuri k’ruvaziyerişi k’omp’ania MSC-şi ağani k’aravi ren 293 met’re ginz’enobas. 13i guverte na uğun “Poesia” coxoni am k’aravik Grek’iaşi k’un3’ulapeşen moxtu İzmirişa. K’arta ik’inaçxas İzmirişa na mulun “Poesia”şi seferepeti içodasen 1 3’ilvas. Alsancakişi baxonak numusafiru xutvitoşişen met’a t’urist’i ar dğaşi doloxe, namupeşen juvitoşik “Queen Victoria”ten do sumvitoşdooşdovitoçxorokti “Poesia”ten moxtu. İzmirişi baxonas ak’onari didoba iz’iruşi, t’aksepek udobağineri doskides t’urist’epeşi goçvinus. T’aksepeşi odginalepes iz’irinu ginz’e k’udelepe. Didinoğaş belediyek na nuncğunu upasoni avt’obusepekti kipşu. T’urist’epeşen namtinepek goiles Agora, Kemeralti steri raionepes, didopekti ak’atu Efes do Bergamaşi t’urepes.

ÇİNOBERİ K'OMP'UT'ERULİ VİRUSEPE

İnt’ernet’ik epto irdu çodina vit 3’anaşi doloxe. Ok’oambaruşen met’a, mabank’alobaşen eç’opu-gamaçuşakis dido mçire ar speros odulyaoba na meçaps int’ernet’ik didopeten k’oçinobas feide meçapstina, doloxe muşis na oskedinaps tolioşkurinobapeten p’at’i izmoce iqven uk’ore3xu xalk’is. Andğanerdğas milionepeten çkvadoçkva virusik na skidun int’ernet’işi zararonepes medgineri xveneri uk’ore3xu ant’i-virus p’rogramepeti iz’iren. Artikartişen çkvadoçkva mecinobas xe na meçaps am p’rogramepeşi vavas, mtelot var t’astina, maksimumot mecinoba ak’ap’et’inen. Murenki namtini virusepeşa medgineri mecinobaşi p’rogramepekti doskidun uçareli. CHIP onlineşi k’omp’aniak k’aixeşa goşogorups dido zaranoni vit virusi, namuk bypasi na axvenen do ist’orias ç’areli na ren.

B12-Şİ VİT'AMİNİK GZA VAR MEÇAPS GOÇ'K'ONDİNOBAS

İngilisuri çkinerk’oçepek ognapes, xor3i, çxomi do mjas na iz’iren B12-şi vit’aminik badi- xçinepes goç’k’ondinobas gza na var meçaps. Oxfordişi Universit’eşen magoşogorepek jurnali “Neurology”is na gamoçkves st’at’iaşi toliten, seviye mutepeşi oşkendobaşi tude na ren badi-xçinepes kunişi oç’it’anu anşi fara çkva yeçkindun. Çkinerk’oçepek gale gamiğes, 61-şen 87-şakis na ren badi-xçinepeşen, cansağoba mutepeşi k’ap’et’i 107 gurişarişi xe meçamuten 5 3’anaşen ekole na qves oxosorobapes B-şi vit’aminişi kunişa onç’obapeşi ağani fakt’orepe. İbadaşi, ixçinaşi, kunişi oxup’us oç’k’omalepeşi onç’oba oxui3’onu.

"T'ERİT'ORİAPEŞİ ŞKAS BECİTİ ÇKVANEROBAPE İZ'İREN"

(TUSİAD) Turkuli maindust’re do dulyaşk’oçepeş k’erk’elaşi oktalobaşi k’omisiaşi dudmaxvence Arzuhan Doğan Yalçindağik, Turkiaşi dvaç’ironi xuraluri oktiroba, ora uoqviluten oxor3elinu do t’erit’orialuri 3’oxlextimobaş çkvanerobaşen na gamulun ağanobargoba, t’erori, udulyaoba do uk’itxeroba steri p’roblemepe oçodinu şeni na dvaç’irs dulyape oxvenoni ren-ya tku. TUSİAD-şi “Turkias t’erit’orialuri çkvaneroba do p’olit’ik’ape" coxoni rap’orişi oçinapuş ok’oxtalas na ğarğalu Yalçindağik, Turkias t’erit’oriapeşi şkas dido beciti so3io-ek’onomik’uri 3’oxlextimobaşi çkvaneroba ren, am çkvanerobak hem dobadonaş doloxe namtini p’olit’ik’apeşi k’ai çodinape meçamu do em gzaten oxtimonişi odidanuşa gza meçamuşa niğen, hemti Avrop’aşi Artobaşa mak’aturobaşi gzas dido oxtimoni ren-ya tku.

 

TUSİAD-şi dudmaxvence Yalçindağik eşo tku: “Murenki mtelis miçkinan, xampa t’erit’oriapeşen umuteli t’erit’oriapeşe geç’areli meçamu ren mk’ule vadeloni ar tedbiri t’erit’oriapeş şkas çkvaneri mogapaşa. Ginz’e vades sap’ara t’erit’oriapeş odidanu ok’ap’et’anu şeni fizik’uri do k’oçiuri odudepes geç’areli do çkina meçamu do mtel t’erit’oriapeşi ok’oç’işuşi menceli monz’inu dvaç’irs. Nunç’işoba, cansağoba, gamantana, energia, t’elek’omunik’a3ia do çkinaşi t’eknologiape steri temeluri tudeni st’rukt’urapeş ok’au; ar-ge (goşoğora-3’oxleşgedvu) do oağanuşi omxvacupeş omağalinu; t’erit’oriaşi ek’onomia na dvaç’irs dulyaş mencelişi p’iasaşi, xususurotti gamantanaşi gzaten na ikten xalepes adap’t’a3ia oqopimus mxuci meçamu do iptineri kobi-pe na uk’ors xe meçamupeti ok’atuten k’idalape 3’oxlextimu do t’erit’oria do noğapeşi cazibepeşi ağani dulyaş imkanepe monz’inuten ik’ap’et’anen.”

TXİRİŞ MAMRALEPEŞİ TİEZDALA

Sak’ariaşi noğa K’ocaalis, txiriş pasi ignapuşk’ule txirepe muşi TMO-s na var naçines vitoş k’onari txiriş mamralek kvalepe istoles Fiskobirlikişi generaluri dudmaxvenceşi ofisis, AK P’art’iaşi t’abelati geğmalu unt’es. K’ocaalis txiriş pasis p’rot’est’i na qves txiriş mamralepes unt’es ogzalu noğaşi Zaferişi meidanişa. P’olisik am ogzalobas gza var meçuşi, k’artak kvalepe istoles oxaçkalobaş odaşi camepes. Ok’ule AK P’art’iaşi noğaluri binaşa na idupeşen ar mitxanik yextu ç’erişa. AK P’art’iaşi t’abela geğmalu unt’u. T’abelas kusi na montxu do mcixii na geçu k’artak nut’axes binaşi camepe. Ok’ule xuçeli mamralepek ides Fiskobirlikiş generaluri dudmaxvenceşi ofisişa. Ofisis kvalepe na istolu k’artas p’olisik nodgitu. P’olisik nobz’it’ilinu omgarinuşi gazi k’artas. Edo zoriten omendranu k’arta k’oçi p’olisik.

K'ONFEK'SİONİŞİ MADULYEPEŞEN TERSANEŞİ MADULYAPEŞA MEMXVACU

Tersanek naqonops coxo muşi ognapus madulyepeşi ğuraten. Am ğurape op’rot’est’u na unt’u k’onfek’sionişi madulyepeşen ar k’erk’elik geç’aru sloganepe Çağlayanişi ğocepes. Çağlayanis ğocepes eşo ç’areli rt’u sloganepe: “Tersanepes ğurapeşi mesulepe imaxkeminas!”, “Tersaneşi madulyepe umiteli va renan”, “Pasi mepçit, pasi mevoçamaten!” Majura k’ele, Tuzlaşi tersanepeşi raionişen, ağani “dulyaş k’eza”şi ambari çkva momixtes. Positif gemi k’omp’anias mont’ajişi madulyot na ixandeps Ali Alemdar coxoni madulyes gelu mak’inaşi finç’ak. K’aburgape na at’axu 40 3’aneri do jur bereşi baba Ali Alemdar mendiqones Dr. Lutfi Kirdar Kartal gamantana do goşogoraşi ozabunaleşa. Edo aqu emus op’era3ia.

XÇE XOR3İŞ SEKT'ORİŞİ İMENDİ: REMEZANİ

Xçe xor3iş mamralepek goloçkumernan meç’ireli ar p’eriodi. St’ok’iş didobaşi sebebiten, vit tutaşen doni zarariten na gamaçapan xçe xor3iş mamralepeşi imendi ren remezani. Ar kotumeş k’omp’aniaşi generaluri k’oordinat’ori Necmettin Çalişkanik oxo3’onapa muşis eşo tku: “Vit tutaşen doni zarari maqven udodginu. İmendi çkini ren remezanişi tuta. K’vinciş gribiten na oxvasu xçe xor3işi sekt’oris aqu dido p’at’i dğalepe, ğanç’k’aş sebebiten xalk’is p’iknik’i na var axvenu şeni. Sekt’ori ren didi ar k’rizişi doloxe. Dido mağala nak’onobaten m3ikanoba iz’iren. Skindinapeş oç’k’omalepeşi pasepeşi dido monz’inu, ek’onomiaşi dodginoba, omraluş p’lanepeşi varenoba, tapala dovizişi k’urepeşi sebebiten, galegamaçamobas skideri meç’ireloba k’ala sekt’orik z’irops k’ut’ali onç’unoba. Xçe xor3işi sekt’orişi k’ap’et’inoba geoç’k’aps mirk’anis generalurot, gamaçamupes manz’inen am p’eriodis. Am k’ai xalik irden, mbuloras t’urizmik 3’oxle idaşi. Edo mxuci meçaps gamaçamuşi monz’inukti oşişen 30 nisp’etiten. Murenki var iqu eşo 2008-s. Var maz’ires, t’urist’epekti dido kotume na oç’k’omes. Ar k’ilos nanç’inerot 40- 50 k’uruşoni zarari maqven. St’ok’iş didobaşi sebebitenti pasepe var moinz’inu.”

K'AVUNİŞİ MAMRALEPE DERDONİ RENAN

K’avunişi omralute na içinen K’oniaşi ç’it’anoğa Çumras mamralepek kok’ut’alupan k’avunepe gamaçamute, namuşi moduli iç’it’anu oşişen 40-ten xomulobaşi sebebite. Çumraşi oxaçkalobaşi odaşi dudmaxvence Suleyman Akbaşik ar milioni 200 vitoş dek’ari xaçkaş dixaşen nanç’inerot 800 vitoş dek’ari i3’k’aren-ya. Murenki an3’os var iqu dobağine o3’k’aru-ya tku. Turkiaşi irişen moduli let’oni Çumras irişen k’ai k’alit’oni k’avuni, k’arp’uzi, xaci, ç’axala, çxvari steri uk’ore3xu dido çaneroba imralen-ya na tku Akbaşik çodina 3’anapes çanerobaş ç’it’anoba iz’irinu do emuşi sebebiti xomuloba ren yado ognapu. K’arta 3’anas 10 vitoş t’onişen ekole k’avuni na imralinen Çumras an3’o moduli iç’it’anasen ya tku.

Suleyman Akbaşik aşo noqonu: “Xaçkaş direkt’orobaşi ç’arapeşi tolite, oxaçkuşi dixa ren 3500 dek’ari. Go3’osti artneri rt’u k’oro3xa. 2007-s, maqves nanç’inerot 10 vitoş t’oni çaneroba. An3’osti gondineri ren oşişen 35-40-s. Omraloba ç’it’a rentina, pasepe duskides tapala. Çumraşi k’avuni içkinen mtel dobadonas. Muşi nostoni do şuraten dido igorinen Polatli do Manisaşi k’avunişen ekole. Remezanişi tutas k’avunişi gamaçamas iz’iren k’ap’et’i ar talebi. Çkin pçumert’it pasepeşi m3ika monz’inu do maxaçkaleşi m3ika geç’areli mogapu. Mara dulya var gamaxtu na mint’es steri. K’avuni tapala pasiten mamraleşen eç’opupan do mağala pasiten gamaçapan. Mamrales var magen. Pasepek 3-4 faraten imağalen qonaşen supraşa moxtaşakis. K’avunik irişen dido mogapaps magverdepes. Mamraleşen 10-25 k’uruşiten na iç’opinen k’avuni gamiçinen 50-75 k’uruşiten mark’et’i do bazarepes”

Suleyman Akbaşik eşo noqonu: “Çumras u’kore3xu maxaçkalek var meçaps çkina entepeşi k’avunişi orgu şeni ç’it’anoğaşi xaçkaşi direkt’orobaşa. Xes k’oçani var giğut’aşi, k’avunişa gza var meçapan çkar ilçe do beldeşa amaxtimuşa. Mamralepek na mok’ides k’avunepe gamaçamuşi gza gorupan t’rakt’orepeten ar oput’eşen majuranişa oxtimuten. 10 k’uruşiti var momçapan. An3’os, k’avunişi mamraleşi nunk’u var az’i3u.” Suleyman Akbaşik ar-jur 3’ana 3’oxleşakis 5 vitoş dek’arişi ekole k’avunişi omraloba ixvenu mara çodina 3’anapes am k’oro3xak 3 vitoş 500 dek’aris dvark’inuti dotku. İRİŞEN P'AT'İ XUT SVALURİ FİLMİ

K’arta dobadonaşen uk’ore3xu sinemamaqoropeş-k’elen merağiten i3’k’omilen ar sait’is “İrişen k’ai 250 filmişi list’e”s, andğanerdğas Turkuli xvena çkar var iz’iren. Atif Yilmazik na oktalu 1977-şi xvena “Servi t’anoni do xçe xasoni çkimi”s 9,0 p’uani niçinutina, a3’i dobağine na var aqu şeni, va ren geç’areli list’es.

List’es mk’ule ar p’erioditen iz’iru mara a3’i list’es na var iz’iren filmepeş şkasti 8,9 p’uanoni 2005-şi xvena “Baba çkimi do biç’i çkimi” k’ala 8,4 p’uanoni 1996-şi noxvene “Qaçaği” iz’iren. İrişen k’aepeşi list’es na var iz’iren Turkuli filmepe “irişen p’at’i oşi filmişi list’e”s iz’iren. Am filmepe renan: 9. svas “Domiçinadvi sardali çkimi: şaxi do mati” (2007), 28. svas “Kiana na moşletinu k’oçişi bere” (2006), 45. svas “Qlap’ibiç’ik uça p’rensişa medgineri” (2006), 86. svas “Hababamişi k’lasi 3,5” (2006) do 88. svas “Cado” (2004).

Sait’işi tkvalaten, irişen k’ai filmi ren 1994-şi xvena Stephen Kingişi romanişen adap’t’a3ia xveneri “Ç’opinerobaşi pasi”. Majurani svas ren 1972-şi xvena “Baba” do masumani svasti ren Batmanişi çodina avant’uria 2008-şi xvena “Uça şovalye”. İrişen p’at’epeşi list’es vo3’k’ertşi, kianaşi irişen p’at’i filmi ren 2008-şi xvena “Acaibi ar filmi”. List’es majurani svas ren 2002-şi xvena “Ma&Arthur” do 2004-şi xvena “Zombie nation”.

Mİ İQVASEN P'REZİDENT'İ AMERİK'AŞİ OK'ONT'ALERİ OXAN3ALEPES?!

Kianas unon Demok’rat’i P’art’iaşi namzet’i Barack Obamaşi p’rezident’i o3xunu Amerik’aşi Ok’ont’aleri Oxen3alepes. BBC-k 22 dobadonas na oxvenapu ank’et’ik mo3’ires, am dobadonapeşi xalk’is unon oz’iru Obama p’rezident’ot. K’omp’ania GlobeScanik 23 vitoş 531 k’oçi k’ala ok’oğarğaluten na qu ank’et’is, Obamaşa mxuci meçamu nanç’inerot oşis 49 ren yado iz’irinu. McCainis mxuci na meçapanpeşi nak’onabati ren oşis 12 am ank’et’is. Ank’et’is na ak’atu k’arta 10 şurişen nanç’inerot 4 şurik mutu var tku tema şeni. Ank’et’i x3ala do mariaşinaşi tutapes na ixvenu, ignapinu. P’icdop’ici ank’et’epe na ixvenu dobadonape eşo isvaren: Avust’ralia, Brezilia, K’anada, Çini, Egvip’t’ia, Frangia, Germania, Hindistani, Endonezia, İt’alia, K’enia, Lubnani, Meksik’a, Nijeria, P’anama, Filip’inia, P’olonia, Rusia, Singap’uri, Turkia, Ok’ont’aleri Araburi Emirobape, İngiltere.

OLANDE K'OREAŞİ OZ'İ3ONİ GO3'ONCĞONERİ

Zabuni ren ya na itkven olande K’oreaşi “oz’i3oni go3’oncğoneri” Kim Jong-ili, dobadonaşi 60. ok’iduşi 3’anobaşi 3eremoniapesti var iz’irinu yado ignapinu. Jap’onuri Kyodo ambarişi agent’i k’ala Rusi RIA-Novosti agent’ik Pyongyangişen na meçes ambarepes, Kimi 3eremoniapes na var iz’irinu ognapes. Omjore K’oreaşi mediak mağala mkuroni k’uçxeş modvalu na moidumers, toma muşi na içistinups 66 3’aneri Kimişi cansağoba na ip’at’u, 22 mariaşinas na izabunu, ognaperet’u. Omjore K’oreaşi muxbirobaşi k’erk’elakti, Kimis k’ronik’uri guriş zabunoba do şekeriş zabunoba na uğunşi ambari meçeret’u.

OPUTXALES LAST'İĞİ UT'K'VA3U

(THY) Turkuli havaşi gzalepeşi, Bangk’ok’i-Mp’olişi seferi na ikipt’u magzaluri oputxales aqu seriozuli şkurinoba. Bangk’ok’işi 3aşlimani Suvanhabumişen svalonuri saat’iten 23: 35-s yeputxu na ip’lanert’u 61 seferi nomeroni “Gaziantep” coxoni Airbus-330 t’ip’oni magzaluri oputxales last’iği arşvacis ut’k’va3u do k’adu p’ist’işa gedginuşi oras. Mara manişa yepuxtu na uk’ort’u k’ap’ineroba aquşi yeputxu kodvaç’iru. Oputxaleşi doloxe na rt’u 250 magzaleşen namtinepek oputxaleşi marz’gvani k’ap’ula oktaşişen yeçkindu m3’k’a do k’omape z’iruşi, oputxaleşi doloxe p’anik’a iqu mk’ule oras. M3’k’ape na z’iru magzalepek ambari meçes oputxuşi ek’ibis. Arçkva oputxaleşen melu ya na oxui3’onu ar maddek last’iğişi ot’k’va3inus na nusebebu ignapinu. Na iç’vet’u t’k’va3eri last’iğiten na yepuxtu oputxalek ok’ule gepuxtu Bangk’ok’iş Suvanhabumişi 3aşlimanişa mecburi. “Gaziantep” coxoni oputxalek 3aşlimanişa gextuşk’ule oç’vamameskurinaleşi ek’ibepek xe meçes oputxales, namuşi last’iğik iç’vet’u. 3’oxle mendiqones magzalepe t’erminalişa. Ok’uleti kodobarges ot’elis. THY-k nuncğonu arçkva Airbus-340 t’ip’oni oputxale Mp’olişen Bangonk’ok’işa. 250 magzalek, na skides şkurnoni deik’epeşk’ule goikt’es Mp’olişa 16 saat’oni rot’ariten.

PAUL NEWMAN DOĞURU

Hollywoodişi çinoberi akt’orepeşen Paul Newmanik meçu şuri Ğormotis, ginz’e oraşen doni k’anserişi şvela na z’iropt’u ozabunales Connecticutişi noğa New Havenis. 1925-s Ohiaos na dibadu Paul Newmanik Amerik’aşi Ok’ont’aleri Oxen3alepeşi zoğaşi mencelis ixandu majurani kianuri limaşi oras. İptineri filmi ren “The silver chalice” (1954). Paul Newmanis uqount’u anşi bere.

FİLMİ: GONDİNERİ MA3'K'İNDİ

Xçeperdeşi ust’a maktalepeşen Richard Attenboroughik oxo3’onapaps ar qoropaşi p’aşura, namuk na kogeoç’k’u majurani kianuri limaşi oras do andğanerdğaşakis na naqonops, gondineri ma3’k’indi. Nanç’inerot sumoş vitoşi Amerik’urik na ğuru varna oçildre İrlandas na dibargu majurani kianuri limaşi oras, 1 Mbulora 1944-s vit ağanmordale ulunan oputxale B-17-ten. Empuloni t’aronis oputxalek mantxu Belfast Caveşi rak’anis. K’ezaş 3’oxle ar malimek meçaps muşi nişanişi ma3’kindi oput’arepeşen ar teris, mendralas na ren qoropelis nuncğonas yado. Ginz’e 3’anapeşk’ule ma3’k’indi iz’iren ar sotxanis. Edo mcveşi orapes na gondinu şinaxapekti xolo yeçkindun...

Maktale: Richard Attenborough; Senario: Peter Woodward; Masağalepe: Shirley MacLaine, Christopher Plummer, Mischa Barton, Neve Campbell; Sort’i muşi: Drama; Nena muşi: İnglisuri; Oz’iramuşi tariği: 29 Mariaşina 2008.

SP'ORT'MENİ ZERXOŞİ İQVENİ?!

İsviçreşi noğa Lozanis Grand Prixişi mağala o3xont’uşi ok’oç’işinupes zerxoşi na ak’atu Rusi atlet’i İvan Ukhovis ar 3’anaş morgvalis ok’oç’işupeşa uk’atuşi ceza niçinasen yado isimadinen. Rusiaşi atlet’izmişi federa3iaşi dudant’renori Valent’in Maslak’ovik çkinape meçu jurnalist’epes zerxoşi atlet’i İvan Ukhovi şeni. Maslak’ovik eşo tku: “Aya ren dido oncğoroni ar dulya. Am xaliten ok’oç’işobas ok’atu ren ar uça leke Rusuli atlet’izmişa. Vak’vandaminon federa3iaşen, Ukhovişi get’k’oçu ok’oç’işobapeşen ar 3’anaş morgvalis.” Ukhovişi menajeri Pavel Voronk’ovikti 22 3’aneri atlet’is k’ulani megabre k’ala namtini p’roblemepe uğun şeni do Pekin 2008-şa na var i3xunu şeni na aqu gemzulerobaşen ğarğalu. İvani ren epto pişmani am dulyaşen. Organizat’orepek evo3xit tazminat’i. Ağanmordale ar sp’ort’meni İvanis aqvasen ar dersi am ambarişen, mara ar 3’anoni gamak’atuşi ceza doçodinaps muşi sp’ort’menobaşi skidala-ya tku. Ukhovişi xali iğarğalasen federa3iaşi oktalobaşi k’omisiaşi ok’oxtalas.

1 St’aroşina 1920: Fransurepek k’ides Lubnanişi oxen3ale, namuşi nananoğa rt’u Beiruti.
2 St’aroşina 1944: General McArthurik coxoşç’ara gedvu Jap’oniaşi xe meşkvinuş akt’is.
3 St’aroşina 1783: İngilterek içinu Amerik’aşi Ok’ont’aleri Oxen3alepeşi timoşletineroba P’arisis coxoşç’ara na geidvinu akt’iten.
4 St’aroşina 1970: So3ialist’i go3’oncğoneri Salvador Allende i3xunu p’rezident’i Şilis.
5 St’aroşina 1950: Ok’itxu na unt’espeşi nak’onoba dido na rt’u şeni, universit’eşa amaxtimuş 3adaşa geiç’k’inu Turkias.
6 St’aroşina 1986: Mp’olis Sinagogi Neva Şalomis nank’ap’a: 21 Ebraeli doğuru, 4 Ebraeli iyaralu.
7 St’aroşina 1943: Kianuri majurani limas İt’aliak xe naşkvu aliansepes.
8 St’aroşina 1930: 5000 madulyek İzmiris grevis geoç’k’u.
9 St’aroşina 1932: Esp’aniak içinu K’at’aloniaşi avt’onomia.
10 St’aroşina 1943: Mp’olis motvaleri çarçis oç’va yeçkindu; 200-şen met’a dukani diç’u.
11 St’aroşina 1941: Vanişi t’ibas dixaşk’ank’ala: 194 şuri doğuru, 36 oput’e kodilixvu.
12 St’aroşina 1953: K’ruşçevi i3xunu maartani mdivani k’omp’art’iaşa Sovyeturi dobadonas.
13 St’aroşina 1788: Ağanyork’i iqu federaluri nananoğa Amerik’aşi Ok’ont’aleri Oxen3alepeşa.
14 St’aroşina 1933: Turkia do Grek’iaşi megabrobaşi akt’is coxoşç’ara geidvinu.
15 St’aroşina 1975: Doloxeni lima kogeoç’k’u Xrist’ianepe do Muslimanepeş şkas Beirutis.
16 St’aroşina 1949: Doloxeni lima diçodu Grek’ias.
17 St’aroşina 1941: İnglisuri do Sovyeturi armiapek xe na gedveret’u İranis Şah Riza geit’k’oçinu t’axtişen. Edo muşi biç’is niçinu t’axti.
18 St’aroşina 1950: Sabiha do Zekeriya Sertelis p’asap’ort’i niçinu, mendaxtes Romaşa 1950-s.
19 St’aroşina 1967: 50 dğaşen doni na naqonupt’u Singeriş fabrik’aşi madulyepeşi grevi k’anonuri na var t’uşi idiaten, maxkemeşi gonk’vataten içodinu.
20 St’aroşina 1992: Gazeta “Ozgur Gundem”işi maç’are Musa Anter iqvilinu Diyarbekiris.
21 St’aroşina 1947: Grizuşi t’k’va3oba Zonguldakiş Kozluşi noşkeri k’erapes: 48 madulye doğuru.
22 St’aroşina 1919: Turkiaşi madulye do maxaçkaleşi firk’a ik’idinu.
23 St’aroşina 1967: Sovyetepeşi dobadonak coxoş-ç’ara gedvu meşveluşi akt’is oçildre Viet’nami k’ala.
24 St’aroşina 1933: Turkia-Bulgariaşi megabroba do uk’elenarobaşi akt’i iginz’anu xuti 3’ana çkva.
25 St’aroşina 1953: Vanişa na ulurt’u oputxales nadvu do komelu; 4 şuri doğuru, 17 şuri iyaralu.
26 St’aroşina 1990: Na3ionaluri ok’oambaruşi k’erk’elaşi mcveşi must’eşarişi manuşvale Hiram Abas iqvilinu Mp’olis “Magektaluri K’vazali” şk’elen.
27 St’aroşina 1529: Kanuni Sultan Suleymanik na oktalapt’u Osmanuri armiak gvak’iru Vianas.
28 St’aroşina 1979: Adanaşi oşkurinobaşi direkt’ori Cevat Yurdakul iqvilinu.
29 St’aroşina 1994: Sosiologi maç’are İsmail Beşikçis 2 3’anaşi moloxunoba do 250 milioni lira geç’arelişi ceza niçinu gazeta “Ozgur Gundem”is gamiçkvineri ç’ara muşiş maok’ortalobaşi idiaten.
30 St’aroşina 1930: 3iviluri maputxace Vecihi Begik muşeburot na qu oputxaleten putxu Goztepeşen Yeşilkoyişa Mp’olis.

DİP'LOMAŞİ 3EREMONİA HAVA DO ZOĞAŞİ MALİMEŞ N3'OPULAPES

İlker Başbuğik generaluri şt’abişi dudmaxvencot ak’atu hava do zoğaşi malimobaş n3’opulapeş oçodinuşi 3eremonias. İptinerotti mahavari do mzoğari uniformape muşi dolikunu. Meclisişi dudmaxvence Koksal Toptani do mencelepeşi sardalepek ak’ates 3eremonias entepeşi çilepe k’ala. P’rezident’i Abdullah Gul, dudnaziri Tayyip Erdoğan, na3ionaluri dudoçvaluşi naziri Vecdi Gonul do na3ionaluri gamantanaşi naziri Huseyin Çelik rt’u xvala. Havaş malimobaşi n3’opulaşi 54. p’eriodişi dip’lomaşi 3eremonias, p’rezident’i Abdullah Gul, dudnaziri Tayyip Erdoğan do generaluri şt’abişi dudmaxvence orgeneral Başbuğik meçu dip’loma derece na qu mamgurepes. 3eremonia diçodu Turkuli muru3xepeşi at’rak3ionite.

 

Yeşilkoyis geladgineri havaşi malimobaşi n3’opulas 3’opxineri 3eromonias anşi timandi, 203 leait’enant’ik ezdu dip’loma. Havaşi malimobaşi n3’opulaşi sardali generalmaiori Sinan Şanlik 3eremonias na qu ğarğalas leait’enant’epes eşo tku: “Tkvan ret ağanmordale ofi3erepe, namuk z’iropan dobadona do na3iaşa mek’ireloba malimobaşi şerefi. Megişvent mtelot. Bedi do muru3xi giçxant’an iroras.” N3’opulaşi maartani leait’enant’i Haluk Yildizis dip’loma muşi p’rezident’i Abdullah Gulik meçu. Zoğaşi malimobaşi n3’opulaşenti anşi timandi, şkviti st’umari, mtelot 201 mamgurek ezdu dip’loma. Zoğaş malimobaşi k’ont’radmirali Turker Erturkik aşo tku n3’opulaşen gamaxtimeri mamgurepes 3eremonias: “Andğanerdğas çkin dobadona demok’rat’iuri do laik’uri sist’ematen tixçoni ar dobadona ren na, aya Gazi Mustafa Kemal Ataturkis, Turkiaşi Resp’ublik’aşi ok’iduşi filosofias, resp’ublik’aşi mogapapes do resp’ublik’uri p’eriodis ixor3elineri gektalapes na evo3xunit, gogişinapt.” Ğarğalapeşk’ule n3’opulaşi maartani leait’enant’i Gokhan Ayarik ezdu dip’loma muşi p’rezident’i Abdullah Gulişi xeşen.

LEVENT KİRCA REN REMEZANİŞİ OXVAMOBAPES

Umraniyeşi belediyeşk’elen 3’opxineri maxutani remezanişi oxvamobapes sk’eçi do sahneşi osağobaten na ak’atu çinoberi mateat’re Levent Kircak z’iru didi onç’eloba Umraniyelurepeşen. Ek’ibi k’ala artot remezaniş tutaşi maartani dğas sahneşa na gamaxtu ust’a masağale iqu qorepeli k’arta tasişen Umraniyeluri maseyrepeşen. Belediyeşk’elen ananuri Turkuli mimaruli genomskide 3’opxineri pi3arişi oxoris oxor3ilineri teat’rişi p’iesapes inç’elu dido berepek. Remezanişi tutaş morgvalis “Daçxiri na melu sva”, “Remezanişi sk’eçepe”, “Şkaş stera”, “Xacivait-K’aragozi” do “Torosişi canavari” coxoni p’iesapeten. Otxo oşi k’oçoni ge3’opxineri ar oxoris teat’rişi p’iesapeşen met’a kukla do p’ant’omimiş sterapeti ixvenen.

TEAT'Rİ: GİRİNİŞİ LANDE

Ar oput’eşen majuranişa na gulun k’ibiriş hekimik e3xups ar girini ar dğas. K’ibiriş hekimi, girini do mance muşik çolis ulurt’esşi, dodgitunan moşvacinu şeni. K’ibiriş hekimik 3xunups girinişi vava moşvacinu şeni. Moxva ar teri sva aya ren do emuşeni. 3’ori p’aşurakti aşopeten kogeoç’k’aps. Girinişi mancek geç’areli ak’vans girinişi vava şeniti. K’ibiriş hekimis gvak’viren. Ok’ule am dulyaşen guri dido muxteps. Ma am girini pkirali-ya, domaxunen muşi vavas-ya tkumers k’ibiriş hekimik. Am dulya var mo3’ondun girinişi mances. Edo 3’oxle k’arak’olişa ok’uleti sudiaşa ulunan. Davas jur advok’at’iti ak’aten. Aşopeten dulya na rt’uşen çkvati kok’oint’alen. Advok’at’epek t’ani muşi o3’iru unonan do emuşeni. Am davaten xalk’ikti kok’oigverden. Ar k’ele magirinepe, majura k’ele mavavalepe! Am p’aşuraşi çodinaşi meraği gaqves na, emoras idit teat’rişa do k’arari komeçit. Girinişi mancei varna k’ibiriş hekimii 3’ori na ren?!

Maç’arale: Haldun Taner; Maktale: Halil Akarsu; Dek’ori: Sertel Çetiner; K’ost’umi: Ozge Şenol; Te: İbrahim Karahan; Maktaleşi manuşvale: M. Şekip Taşpinar; Rejişi asist’ani: Demet Boci; Musik’a: Kemal Gunuç; Dansişi on3’uranoba: Neslihan Ozturk; Masağalepe: Sema Oner, Tamer Gozudeli, Devrim Evin, M. Şekip Taşpinar, Tunç Yildirim, Çağri Turan, Şirin Çetinel, R. Hikmet Çam, Muge Taşpinar, Nimet İyigun, Sevinç Gediktaş, Serdar Kayaokay, Omer Bertan, Veysel Sadak, İlter Şen, Onder Ozcan, Başak Akan, Yeliz Ateş, Dilek Doğan. (Adanaşi Oxen3aluri Teat’ri)

ŞEMP'ANZEPEKTİ İKİPAN MUÇ'O K'OÇİ STERİ

Çkinerk’oçepek ognapes, k’abğaşk’ule majura k’eleşi guri oxvenuşi adeti, şemp’anzepesti na uğun. Am goşogoraten ignapinu, maimunepeşi gok’iru do osvalu steri guri oxvenupek st’resi na oç’it’anaps. Chesterişi zoop’ark’is 22 morderi şemp’anzeten 18 tuteri dulya muşişen İngilisuri ilimepeşi artobaşi fest’ivalis çkina meçu Liverpoolişi John Mooresişi Universit’eşen dokt’ori Orlaith Fraserik. Şemp’anzepeşi nosepes mu mek’ilaps, var içkinen mara am skindinapeşi xalepeşen mutxanepe oxoma3’onenan-ya tku.

DİVİ MJVABUPEK İQU SİLAXİ

Ek’o ğurz’uloni renki, xvala ar k’oçi var, ar timsaxiti sumi deik’eş doloxe ağurinen. Am maqvilace xalik noktiru eya malimuri ar silaxi. Avust’raliaşi divi mjvabupek muç’o niktu malimuri silaxişa? Am k’itxaşa nena a3’i yeçkindu. İrişen ğurz’uloni na ren am mjvabupeşi sort’işi ğurz’uloni 3’arak xvala k’oçi var, didi timsaxepe, 3’i3’ilapeti ar-jur deik’eşi doloxe ağurinen. 1999-s Avust’raluri malimepek yulva Timoraşa xvala malimuri malzeme na var tires, a3’i oxui3’oni. Avust’raliaşi diviziapeş manganas am mjvabuti yulva Timorişa na itirinu, oxui3’oni. Avust’raliaşi diviziapek Amerik’aşi Ok’ont’aleri Oxen3alepe k’ala yulva Timoris na yeçkindu oğodapes xe na gedves, içkinen. 1999-şakis am mjvabupeşen çkar var iz’irinu-ya na tkves ekspert’epek, am mjvabupeşi ğurz’uloni 3’araten uk’ore3xu yulva Timoruli na iğurinuşi ambariti komeçes.

NA QVİLU KİMOCİ K'ALA SKİDU

K’irikk’ales 25 Mbulora 2007-s, ar 3’anoni kimoci muşi, 38 3’aneri O. S.-k na qvilu do uşuroni t’ani muşiti, çxoro tutaş morgvalis obonales na şinaxu 34 3’aneri F. S.-şi maxkeme kogeoç’k’u. Ceza yado skidalaş morgvalis molaxuneroba muşi na igoren F. S.-k eşo tku: “O-k mbaxupt’u udodginu. Ar limcis, oxori çkimis moiqonu qoropeli muşi. Zoriten, mak’vandu oç’k’amale oxvenu, dop’i. Qoropeli muşiten oxorişen ok’ui3’k’uşk’ule, goiktu oxorişa saat’i 05.00-s, monuğepeten qali muşis. Xolo dombaxu. “3’urak’aşi bere” domi3’vu. Baba muşişi p’ist’oliten jur k’urşumi vustoli do dop’ili eya.” Kimoci muşişi cesedi, çxoro tutaş morgvalis obonales k’uvetis pşinaxi-ya na gamotkvu F. S.-k qoropa çkimi ink’raxis na niktu şeni, p’ili eya-ya. P’ilişk’uleti, udodginu bonupt’i eya obonuşi 3’k’ariten-ya. Muşi k’ala vincirt’i-ya. Emuş 3’oxle p’ç’k’omupt’i oç’k’omale-ya. Pişmani var vore-ya tku. Maxkeme itexirinu şahidepes quci meçamu şeni.

MAMGURAPALEŞEN MATACİZOBA

İzmirişi ç’it’a noğa Bucas, muşiuri dersi na meçapt’u 8 3’aneri k’ulani mamgure muşi C. S.-s nutecavizu ya na itkven 50 3’aneri mamgurapale M. B., oğodaşen ambari na aqu ocağik oxoris na 3’opxinu mpuleri k’ameraşk’elen iç’opinu. K’ameraşi oz’iramape, p’olisis niçinuşi, k’abaxat’i muşi na var moavaru M. B.-şi oxoris maxkemeşi xeten xveneri goşogoras iz’irinu uk’ore3xu p’ornografiuri cd. M. B. iç’opinu.

60 3'ANERİ BOMBA

İt’alias, noğa Nap’olişi omjoreyulvas na geladgin Salornos na ixvenen ok’idobaşi dulyapeşi oras, iz’irinu majurani kianuri limaşen genomskide ar bomba. Emuşk’ule 5 vitoş şuri mendiçkvinu noğaşen gale. Ut’k’va3eri bomba na iz’irinu speroşi 250 met’re xolosobas na xen mtel xalk’i ibarginu st’adiumişa mk’ule ar p’eriodi şeni.