PUKRİK'A
|
1 MİLYAR DOLARONİ NUK'LERULİ AKT'İ QVES
Rusia do Çinik 1 milyar dolaroni nuk’leruli akt’is imza kogedves. İmzaşi seremonia Rusiaşi ağani go3’oncğoneri Dimit’ri Medvedevişi, Pek’inişi mok’itxuş maartani ndğas ixvenu. Rusiaşi At’omuri Energiaş K’idalaşi Dudmaxvenci Sergey K’irienk’ok, akt’i k’ala Çinis na dgin ar nuk’leruli sant’rali moirdinasunon do Çinişa xampineri uraniumi gamiçina-sunon yado ognapu. K’irienk’ok, “Akt’i ar milyari dolarişen m3ika dido ren. Amuşi gverdi tesisişi omordinuk do majura gverditi uraniumik 3’opxups” ya tku. K’irienk’ok, Çinuri umçanepe k’ala k’orta Tianvanis na dgin nuk’leruli sant’raliş omordinuş temati ok’oviğarğalit yado noqonu. Tianvanişi maartani reakt’ori 2 Mbulora 2007 tarixis, majuraniti 12 St’aroşina 2007 tarixis guin3’k’eret’u. A3’i masumani reakt’oriş gon3’k’imu isimadinen. TURKİAŞİ FUZELURİ DUDOÇVALUŞİ SİST'EMA
Amerik’aşi Ok’ont’aleri Oxen3alepes (AOO) dudoçvaloba speros gamiçkveneri Defense Nevs coxoni jurnalik ç’aru, Turkiak dixaşen dixaşa na istolen fuzepeşa medgineri risk’oni noğirapeşi dudoçvaloba ok’ap’et’inuşi simadaten, fuzeluri dudoçvalobaşi sist’emape eç’opuşa ixaziren-ya do em temaş jin otxo dobadona k’ala ok’oitkvals-ya. Jurnalik ognapu, Turkuli avt’orit’epek AOO, Rusia, İsraeli do Çinişen fuzeluri dudoçvalobaşi sist’emapeşi pasi do omraluşi çkinape ak’vandu-ya, moxtimeri iptineri coğabepe niçasen-ya. Defense Nevsik fik’iri meçu, İranişk’elen mordineri dixaşen dixaşa na istolen Şahab-3 coxoni fuzepeşi menzilik dolok’atups-ya. Turkias eç’opuşi albetoba na uğun fuzeluri dudoçvaluşi sist’emapeş şkas ren AOO-şi noxvene P’at’riot’i, Rusiaşi noxvene S300 do S400, İsraeli-AOO-şi oşkendari noxvene Arrov-2 do Çinişi noxvene sist’emape yado ignapinu.
Defense Nevsik ognapu, Turkiak na eç’opasen do otxo bat’aria do entepeşa mek’ireli majura p’arçape na dolok’atasen fuzeluri dudoçvaluşi sist’emaşi pasi ar milyari Amerik’anuri dolarişen met’a iqvasen-ya. Jurnali k’ala na ok’oiğarğalu sp’e3ialist’epek ognapes, irişen idialoni jur k’andidat’i, ok’ok’idinuşi şart’epesti gecginerot 3aderi AOO-şi P’at’riot’i sist’ema do Rusiaşi ağanmorderi S400 sist’ema na ren. Turkiaşi fuzeluri dudoçvaluşi sist’ema, AOO-şi Dudoçvaluşi Naziri Robert Gatesik Ank’araşa K’unduraşi çodinas moxtuşi, kok’oitkvinu yado ignapinu. İptineri sist’ema eç’opinu şk’ule, Turkiak majurani ar fuzeluri dudoçvaluşi sist’emati oşkendari omraluşi gzaten omancenu p’lanups yado ignapinu ambaris.
Amerik’anuri Na3ionaluri Arkivis z’ireli oşkurinoni fot’oğrafepek Amerik’anuri armiaşk’elen iptinerot 5 Pukrik’aşi ndğas gamiçkvinu. 58 3’anaş morgvalis şinaxeri am vandaloba mtel t’et’eloba muşiten mjoraşi tes iz’irinu. Fot’oğrafepe ren yeşiğeri 1950 3’anaşi X3alas Omjore K’oreas. Omjore K’orealuri p’olit’ik’uri molaxunerepeşi mtelot, Omjore K’oreaşi armiaşk’elen go3’ok’idoba aşo doloç’areli ren. Andğaneri ndğaşakis xalk’işsimadaşen mpuleri am fot’oğrafepe na z’iru k’oçepes di3xiri dok’rotu. 3’oxle, mutepeşi sapule mutepeşi xeten zoriten na intxorinu molaxunerepe, ok’uleti mtel sapulepeşa geit’k’oçinu. Na mebaz’gupeti zoriten dolit’k’oçinu. Ok’uleti entepeş jin k’urşumepe ist’olinu. Uşuroni xurape p’icdop’ic sapules doloxe na rt’u şeniti, malimepes çkar var aqu doxvuşi meç’iroba. Xvalot let’a gebğes entepeşi jin. Am dulya na goşogoru matarixepek, X3ala 1950-s, Omjore K’oreaşi noğa Daejeonişen xolos ixor3elineri am mtelot go3’ok’idobaşi oras şkviti p’olit’ik’uri molaxuneri qvileri na rt’u inoğiren. Daejeonişi ambari a3’işakis ist’oriaşi şigneri irişen didi mtelot go3’ok’idinu na rt’u itahminen. SADRİ ALİŞİKİŞİ P'RİZEPE KONİÇİNU
Mustafa Kemali K’ult’uruli Şkaguris me3’opxeri do Kerem Alişik do Berna Laçinik na koçkinapu p’rizepeş 3eremonias, p’rizepeş mancepeşi coxope ignapinu. Teat’rişi t’ot’is xçetomonobaşi p’rizi niçinu Nedret Guvençis. Sinemaşi t’ot’isti xçetomonobaşi p’rizi niçinu Mujde Aris. Teat’rişi speros “3’anaşi irişen gecgineri xvenaşi maktale”şi p’riziti niçinu Genco Erkalis. “3’anaşi irişen gecgineri oxorca masağale”şi p’rizi, Duru Teat’ris isahneri “Ar P’ik’asso domaç’irs” coxoni p’iesis na uğut’u roliten Ayça Bingolis, “3’anaşi irişen gecgineri k’oçi masağale”şi p’rizi Teat’ri Peras na isahninu “Venedik’işi taciri” coxoni p’iesis na uğut’u roliten niçinu Mehmet Ali Kaptanlaris. “Manuşvaluri rolis, 3’anaşi irişen gecgineri oxorca masağale”şi p’rizi MDB Noğaşi Teat’repeşk’elen na isahnen “Bernarda Albaşi oxori” coxoni p’iesis na uğut’u roliten Ozlem Turkadis, “Manuşvaluri rolis 3’anaşi irişen gecgineri k’oçi masağale”şi p’riziti, Mp’olişi Oxen3aluri Teat’repes na isahnen “Ok’vak’idu majurani perdes yeçkindasen” coxoni p’iesis na uğut’u roliten Burak Şenturkis niçinu.
Noğanurobapeşi şkaguroni, ist’orias iptineri ç’ara, iptineri geç’areli, iptineri ç’areli huk’uk’işi k’aidepe, iptineri musik’aşi alet’i, iptineri gurami mapa do legenda steri dido ondişi iptinerot na iz’irinu sva ren Anatolia. Mu xeleba rendo, entepek na ok’oikipan dido beciti k’ult’uruli ar anderi miğunan. Mcveşoraşen genomskide ar k’ult’uruli anderi, na axvenen k’onariten ok’oxtinoboni do vizualuri xampobas doloxe na meçasunon, berepe umekaçinuten, entepe k’ala dido ondepe ok’oltaluten am k’oroba ağani tasepeşa na naçinasunon p’iesi ren “Midasişi Qucepe”. Maç’arale: Gungor Dilmen; Maktale: Umut Toprak; Manuşvalepe: Şirin Toprak, Ozgur Keçeci; Dek’orişi masimadale: Sertel Çetiner; Dolokunuşi masimadale: Gazal Erten; Teşi masimadale: Mehmet Yaşayan; Dansişi me3’opxa: Koray Ural; Dramat’urgi: Şirin Aktemur Toprak; Sahneşi umçane: Serpil Kiliç; Teşi maktale: G. Ahmet Gokdemir; Suflozi: Ş. Belgin Ulusoy; Masağalepe: A. Volkan Çetinkaya, Ozgur Keçeci, Murat Ozben, H. Ebru Gulerarslan, Ahmet Çokmez, Ozgur Baş, Çağatay Çiftçi, Revşan Genç. 3'URAK'OBAŞİ ÇETE KOGOŞİBĞİNU
K’era mutepeşişk’elen elait’k’oçinu P.A. do D.B. doskides omralobaşoxoris. Jur ağanmordale k’ulanik imt’es na skidut’es omrolobaşoxorişen jur tuta 3’oxle. İptineri ndğalepes, cebes na uğut’es ar-jur oşi liraten goiles barepes Taksimis. Entepes geç’areli dvaçodesşi, P.A.-k oxandus kogeç’k’u ar t’ekst’iluri atolyes, Esenyurtis. Xveneri idiaşi toliten, artneri atolyes na ixandept’u 25 3’aneri Mine O.-k, omralobaşoxorişen na imt’es na iguru P.A. k’ala muşi megabre D.B.-s megabroba o3’iru do gun3’k’u entepes oxori muşişi nek’na. Mp’olişi Noğaluri Jandarma Sardalobaşi ek’ibepek op’era3ia qves Mine O.-şi oxorişa Esenyurtis, golaxtimeri dolonis, nark’ot’ik’i na gamiçinen do 3’urak’oba na ixvenenşi ixbariten. P’olisepek nek’na get’axesşi, P.A. do D.B. nark’ot’ik’işi magamaçamale ren ya na itkven İbrahim Y. do Vedat S. k’ala ar oncires koiz’iru. Oxoris xveneri goşogoras, otxo pak’et’i, İbrahim Y. do Vedat S.-şi oxorepesti 98 pak’et’i 50-oni gramoni esrari k’ala uruxsatoni silaxi iç’opinu. Nark’ot’ik’işi magamaçamaloba do berepe moğerdinobaşi k’abaxatepeten Buyuk-çekmeceşi Adliyes maxkemeşa meiqoneri Mine O., İbrahim Y. do Vedat S. okaçuten mendiçkvinu xapisxanaşa. Masaveşi k’arariten ok’ont’rolinuşa mendaçkvineri P.A. do D.B. bozo na va rt’u oxoi3’onu. Ç’it’a k’ulanepe xolo konişkvinu omralobaşoxorişa.
|
XALK'İŞSİMADAŞİ OZİMOBA K'İP'RİSİS
K’ip’risuri Urumepek kogeç’k’es oktirus K’ip’risuri Turkepe şeni negat’iuri osimadu, Tasos Papadopulosisi p’olit’ik’a kogeijilu şk’ule. Çodina xveneri xalk’işsimadaşi ozimobaşi toliten, Urumi xalk’işi oşişen 85-k k’abuli ikips K’ip’risuri Turkepe k’ala arto oskedinu, uoşkurinoba ixor3elinas na.Go3’os xveneri ank’et’is am nispet’i rt’u oşis 63. Urumi Politis coxoni gazetak gamoçkvu Noverna Consulting and Resarch coxoni k’omp’aniak 18-30 İgrik’aşi tarixepes, 500 şurişi ok’atuten na qu ank’et’işi çodina. Gazetaşi toliten, ank’et’is k’itxeri k’itxvapes işart’inu “ge3’k’umoba do uoşkurinoba mtelot ixor3elinaşi” yado. “Uoşkurinoba mtelot ok’idu”şi şart’iten Urumepes otku unonan k’un3’ulaşen mtelot Turkuli malimeşi oxtimu do Turkiaşi garant’orobaş oçodinu.
Ank’et’işi toliten, K’ip’risişi p’roblema gein3’k’uminuşi xalis, Urumi ağanmebargalepeşen namtinepek k’ai toliten o3’k’en tazminat’i ezdimus, mcveşi mulki mutepeşişa goiktu var. Ank’et’is na ak’atupeşi doloxe tazminat’is “ho” na tkupeşi nispet’i oşis 46; “var” na tkupeşi nispet’iti oşis 39 ren. “K’ip’risişi p’roblema ge3’k’umus, tkvanda endişe na goğodapan ar xali koreni”şi k’itxva ik’itxinu ank’et’is. Am k’itxvas “ho” itkvinu oşişen 47 nispet’iten. “Ho” na tkupe şeni irişen didi endişeşi odudeti ren k’un3’ulas na skidasunon Turkiaş cinconi Oçildre K’ip’risiş Turkuli Resp’ublik’aşi dobadonamşinepe.
Che na dibadu noğa na ren Rosarioşi meydanis na ik’idasen 4 met’re ginz’enobas do sumi t’oni monk’anobas devi heykeli, iptinerot didinoğa Bunenos Airesişi kuçapes goingzalinu. Heykeliş Buenos Airesişi t’uri diçodu gedgineri kvas, namuk na ren Buenos Airesişi simboli. P’roekt’is mxuci na meçu Ernesto Che Guevaraşi muzeumiş direkt’ori Eladio Gonzalesik çodinas, medi3inuri n3’opula na ik’itxu, ağanmordaloba muşişi hulyapeşa oxormancoba na qveret’u noğak xolo z’irops muşi oxtimu-ya tku. Bronzişi heykeli, Cheşi 3’anoba na ren Mbuloras, maotxoneçani dobadonaş ndğaşen ar-jur ndğaş 3’oxle Rosarios k’aide muşis geidgiu. SUMİ K'AT'İ ÇKVA ZİFİRİ UĞUN
Kianaşi dobadonapeş oşkendas, çai na i3’ilen maxutani do çai dido na işven maotxani tere na ren Turkias, “na3ionaluri oşumale” na ren çai oçvu do omralus naqonu şeni nanç’inerot 7 milyar liraloni oağanuşi xarcoba unon. Oşkendurot ek’onomik’uri skidala muşi 50-60 3’ana na ren çaepunape var iağanasna, çaişi omralu do k’alite dido na dvark’inasunon şeni Turkiak, çaişi p’iasa Çini do Hindistanis oncubalasunon. Edo xolo Uçazoğaşi regionis na skidun 204 şilya ocağikti skidalaşi odude gondinasunon. Çaepunapeşi oağanu şeni 3’oxlenurot çaişi moxva nergişi ç’eşidepeş oçkinu do am nergepeş omralu uk’ors. 766 şilya dek’aroni çaepunapeşi oağanu şeni nanç’inerot 7 milyar liraloni geç’areli unon yado ixesap’inu. Çaepunapeş oağanuşi mtelot ğirsi oxoi3’onasunon, Çay-Kurişk’elen sum 3’anaş doloxe p’roje ixvenaşi. Mara maomrale ocağepes na anç’enan çaepunapeş dido m3ika oqopinu do na moigen geç’areliş oağanuşi xarcobaşa na var dibağun k’onari m3ika oqopinuş sebebiten maomralepes oağanu xvala var axvenasunonan do moxva şart’oni k’redepeten omxvacu dvaç’irasunonan. FİLMİ: "…Şİ BEREPE"
Malimuri darbe şk’uleni vakit’i ren. Na igoren ar çili-komoci menyaş gale oxtimu gonk’vatupan. Omt’inuş 3’oxle bere mutepeşi obargu şeni, uoşkurinoboni ar sotxani gorupan. İrişen uoşkurinoboni sva ren Mehtap nanaşi berepuna. Mara entepes na var uçkinan ar mutxani koren: bere mutepeşi na dobarges svaşi mance ren mcveşi ar 3’urak’a. Mehtapik gon3’k’eret’u ar berepuna, na ixandeps 3’urak’apeşi berepe şeni. Çili-komocik menyaş gale imt’es şk’ule, bere mutepeşi ezdas yado İt’alianuri k’ulani Turkiaşa mendoçku-mernan. Murenki dulya var içoden entepes na unonan steri…
Daily Mail coxoni gazetaş ambarişi toliten, Missourişi Vet’erinerobaşi N3’opulak gurişi zabunoba na uğut’u xuti 3’aneri çik’olat’aşi peroni Labrador cinsoni Mollyis gurişi pili doludvu. 3’una na ren Mollyis op’era3iaten pili dolodvus, guris na uğut’u p’roblema na iz’iru şk’ule k’arari niçinu. Mollyişi mancepe Allen do Alicia Brovnik meo3xvu, 2 şilya 500 Amerik’anuri dolari k’onari na ren op’era3ia do muşi majura masrafepe, lok’aluri ar gazetas gamiçkvineri “Mollyis gurişi pili dvaç’irs” yado ambariten entepes niçineri şvelapeten. Oxori muşişa na goiktu Mollyik ar-jur tutaş doloxe naqonasunon mcveşi dulya muşişa. Edo K-9 goşogoru do moşletinuşi brigadis cansağobaşi xalk’işa gurişarot mxuci na meçaps Brovnişi k’erak. Dido energiuri na rt’u Mollyi golaxtimeri tutas arşvacis uxonaroni iquşi do şuri moşvacinuşi derdi zduşi zabunoba muşi oxoi3’oneret’u. İRİŞEN 3'ANERİ COĞORİ
Gazeta Daily Mailik, Labrador cinsoni Bela şeni a3’işakis irişen 3’aneri coğori ren yado ç’aru. Mara 76 3’aneri mance muşi David Richardsonik man-ya ep’çopi Bela-ya 1982 3’anas-ya, sumi 3’aneri rt’uşi-ya, xes surati na var miğun şeni-ya ispat’i var maxvenen-ya. Golaxtimeri dolonis dido na izabunu do na var agzalu şeni Bella kodonciras, mtini gi3’vat na, doqvilas yado vet’erinerişen randevu ep’ç’opi-ya. Murenki var maxvenu do randevu mebjili-ya tku Richardsonik. Livadis na vuntxori sapuleti kevopşi xolo let’aten-ya. K’ap’ulas goviktişi, Bela rt’u otxo k’uçxes jin do igzalt’u-ya. Edo k’ap’et’i rt’u-ya. A3’i k’ai ren-ya. Mitam domsincu-ya tku. Ofi3ialuri ç’arapes na iz’iren irişen mcveşuri coğori rt’u Avust’ralias 1939 3’anas 39 3’aneri do 5 tuteri rt’uşi na ğuru cogişi coğori Blueyi. İrişen mcveşurot Guinnessişi rek’ordepeşi svaras amaxtimeri coğoriti rt’u Amerik’aşi Ok’ont’aleri Oxen3alepes 2003 3’anas 28 3’aneri na ğuru Beagleşi cinsoni Butch. AĞANİ ÇERİBAŞİ 3XUNES
Maxale Menzilahiris xveneri çeribaşobaşi 3xunas kogeç’k’u, arteri namzet’i na rt’u Fikri Ocaki, maxaleşi k’axvexanas ar orz’os dodgitinuten na qu ğarğalaten. Romani dobadonamşinepes na nucoxu do na qvasen dulyape na oxo3’onapu Çeribaşobaşi namzet’i Fikri Ocakik, 18 3’anaşen doni çeribaşoba na ikipt’u Mehmet Ali Korukluk, k’ai var domitemsilnan-ya tku do aşo noqonu, “Mcveşi çeribaşi çkinik var domitemsiles k’aixeşa do 3xuna oxvenu gevonk’vatit. Mati tkvani omxvacuten arteri namzet’i viqvi do vognapi çkimi çeribaşoba. Na momçit mxuci şeni didi mardi gi3’umert.” Ağani çeribaşik na qu ğarğala şk’ule, 3xunaşi speros na ok’oibğes Romani dobadonamşinepek Fikri Ocaki mok’iduten goiles maxales. Ok’uleti artot davuli do zurna k’ala korbaşi dansiten ixeles Romani dobadonamşinepek serişi yano saat’epeşakis. |
ABXAZİAŞİ AĞANİ MO3'QVAŞ P'LANİ İ3'OPXİNEN
Gazeta Kommersantişi toliten, Abxaziaşi ağani mo3’qvaş p’lanik, Margali multecepeş irrot Abxaziaşi Gali do Oçamçireşi k’ortapeşa uk’uniktinu noğiraps. P’lanişi toliten, am k’ortas na geşaxenan Rusepeşi mo3’qvaş askerepe gamaxtasunon do k’ortaşi emniet’i Okortura do Abxaziaşi p’olisepek artot oxor3elasunon. K’odorişi ğaliş oçilde k’ele mtelot Rusiaşi k’ont’rolişa nişkvinasunon. Okorturakti K’odorişi ğaliş oçildre k’ele Kortu multecepeş uk’uniktinuşi ok’vandu naşkvasunon. Abxaziaşi ağani mo3’qvaş p’lanişi det’ayepeşi toliten Tbilisik, Rusiaşi k’ap’it’aliş Abxaziaşa moğinuşa var nodgitasunon. Edo xolo Tbilisis, Rusiaşi Federasionişen formalit’ot rt’asnati Abxazia do Omjore Osetia k’ala p’icdop’ic ok’ont’akt’uş k’ararişi mejilu unon. Gazeta Kommersantişi toliten, p’lanis uğun Abxaziaş huk’uk’uri st’at’uş ogarant’inu do Okorturaş doloxe dido mçire hak’epeş meçamu. Mara p’rakt’ik’urot K’odorişi oçlidre k’ele am p’laniş doloxe var t’asunon. EK'LESİAPE MEÇETİ NİKTEN
Belçik’aşi majurani didi noğa Anversis, cemaat’i muşi na im3ikanu şeni, o3’k’omiloba do tamiroba şeni, geç’areli na var az’iren ek’lesiapeşi meçetişa noktinu varna çkvadoçkva noğirapeten oxmarinu ip’lanen. Anversişi k’ult’ura, t’urizmi do religiuri monument’epeşa coğabinameçaps, Krist’ian Demok’rat’i Belediyeş Reisiş Manuşvale Philip Heylenik, De Morgen coxoni gazetas na meçu oxo3’onapas, noğas na geladgin 80 ek’lesiaşen didopes var uğun dobağine cemaat’i-ya do namtinepes uqonun xvala 20 şuri ar dolonis-yado ognapinu. “Muşeni var mepçat namtini ek’lesiape Muslimanepeşi oxmarinus” yado na k’itxu Heylenik, Anvarsis nak’onoba muşi şurşurisobas na imağalen Muslimanepeşi dvaç’irobas gza na meçasen didi meçetepe na varenobasti no3’iru. An3’os noğaşi doloxe na geladgin ek’lesiape na moik’itxasunon do entepeşi p’ap’azepe k’ala na ok’oiğarğalasunon na oxo3’onapu Heylenik ek’lesiapeşi envant’eri o3’opxu diçodaşi, ek’lesiape meçetot varna çkva noğirapeten oxmaru şeni toliten iz’irasen gzalepe na o3’iarasunonşi ambari meçu. T'URİST'EPEŞA MAFİAŞİ T'URİ
Brezilias 1957-s xveneri ar gamo3adaş oras k’afesişen na imt’u Afrik’uri maqvilace but’k’ucepek nusebebu p’anik’aşa, Amerik’aşi Ok’ont’aleri Oxen3alepes. Meksik’aşi jilendo Amerik’aşi Ok’ont’aleri Oxen3alepeşa na amaxtu but’k’ucepek dobadonaşi oşkendas geladgineri olkepeşakis nunç’işu. Amerik’aşi Ok’ont’aleri Oxen3alepes iskedinen maqvilace but’k’ucepeşi p’anik’a. Ark’ansasişi olkişa na nunç’işu but’k’ucepe iç’opinu ragiten olkişi omjores, ç’it’anoğa Brightstaris. Eksp’ert’epek Avrop’aş cinconi topuriş but’k’ucepeşa umosi agresiuli na ren maqvilace but’k’ucepek şurişurisobaten irden ya zop’onan. Amerik’aşi Ok’ont’aleri Oxen3alepeşi dobadonamşinepes, but’k’uciş boginape z’iranşi, astaxolobaten ekşen imt’it şo na tkves avt’orit’epek, but’k’ucepek boginaşen artot gamulut’anşiti unk’ap’inuten omt’inu dvaç’irs ya zop’onan. Avrop’uri but’k’ucepeşen umosi ğurz’uloni na var ren maqvilace but’k’ucepeşi oşkurinoba yeçkindun artobaten mek’ap’inu mutepeşişen ar texlikeşi oras. Maqvilace but’k’ucepe Avrop’aşen ezdimeri nanmapa k’ala omzik’uten am agresiuli xasieti mutepeşi majura but’k’ucepesti nuk’limapan. 19 3'ANERİ P'ROFESORİ!
Ok’itxu do oç’aru vit tuteri rt’uşi na iguru, Amerik’aşi Ok’ant’aleri Oxan3alepeşi dobadonamşine Alia Saburik notamamu universit’e vit 3’aneri rt’uşi. Alia Saburik dokt’ora muşi notamamuşiti, vitootxo 3’aneri rt’u. Omjore K’oreas, K’onk’uk’u Universit’es xolos ar vakit’is p’rofesori unvani muşiten dersepe meçamus geç’k’asunon. A3’i vitoçxoro 3’aneri na ren Alia Saburik vit 3’aneri rt’uşi notamamu Stony Brooki Universit’e. Alia Saburiş ekole Guinness rek’ordepeşi svaras na amaxtu irişen ağanmordale p’rofesori, çinoberi mafizik’e İsaac Nevtonişi mamgure Colin Maclaurini rt’u. Omjore K’oreas dersi meçamus na geç’k’asunon Alia Saburis var uçkin K’orealuri nena a3’i. Alia Saburik, matematik’a do musik’aşi nena miçkin do aya gamantanu şeni domibağun ya tku. P'ARKİNSONİŞİ MAAMBAREPE
The Marmara ot’elis, k’onferan3ias na gamağarğalu p’rofesori Haletlik, p’arkinsonişi zabunobak k’oçis k’ank’ala ek’onudginaps-ya, k’ank’alaşi dork’inobas nusebebups-ya do aşopeten otirtinu do ogzaluşi ok’oxvobaşa gza meçaps-ya tku do aşo noqonu: “K’ank’alaşi semp’t’omepe ik’aen mara p’arkinsonişi zabunepe renan dep’resifi generalurot. Na tirtins zabunepes, p’arkinsoni irden umosi tamot. Zabunoba ren oşişen 15 nispet’iten genet’ik’uri fakt’orepeten yeçkindineri. K’ank’alaş şkaguronişi gale onç’onobape muşi ak’aen meç’irelot. Am onç’onobape hip’ertansioni, guri do kunişi zabunobape, ink’ibazoba, t’u3anoba do qinobaşa unoxondinoba, obsesiuri seksi, dido upi geçamu, ndğas ncironi goxtimu do seris unciru. Amuş met’a k’umarişi gegaperobati ren p’arkinsonişi maambare.” P’rofesori Halletik p’arkinsonişi zabunobas dvaç’irs ç’amişi şvela-ya, 3’oxle do ok’uleti-ya op’era3iuri gzalepeti dvaç’irs-ya tku. P’rofesori Halletik eroini na ixmars ağanmordalepesti risk’i uğunan p’arkinsonişi zabunobaş-ya tku.
1 Pukrik’a 1945: Germaniaş Nazi P’ro-p’agandaşi Naziri Joseph Goebbelsik muşi oxorca do anşi bere oğurinu do ti muşi niqvilu Soviet’uri armiapek Berlinişa amaxtesşi. |
"ARTOBA ÇKİNİ VOK'AP'ET'İNATEN"
Prot’ok’olişi toliten, Ortodoksuri majura ek’lesiape mok’itxu şeni dudp’isk’oposi majurani İeronimosis dvaç’irs 3’oxle mokit’xu ek’umenuri P’at’rik’i. P’at’rik’i Bartholomeosik nuk’abulu dudp’isk’oposi majurani İeronimosi P’at’rik’xanaşi t’axturi salonis. P’at’rik’xanaşi avt’orit’e-pek na meçu çkinapaşi toliten; ok’otkvalobas, İeronimosik Hristodulosişi xe3alas jur ek’lesiaşi şkas skideri gonk’idobaşa arçkva gza var mepçaten-ya tku. Hristodulosik, P’at’rik’xanaş-k’elen 1928-s Grek’iaşi ek’lesiaşa emanetot niçineri Oçildre Grek’ia steri namtini t’erit’oriapeşi religiuri oktaloba meçamu ek’uk’tuşi do P’at’rik’xanaşa umeqonuten am ek’lesiapeşa reliagiaş-k’oçi na mendoçku şeni, jur ek’lesiak ok’ok’idinus kogeç’k’eret’u. Bartholo-meosik mek’vateret’u artikartisoba Grek’iaşi ek’lesia k’ala ar ora şeniti.
Ok’otkvalobas, am ambariti kogoşinu do, “Ocerapu minon, ma do çkini ek’lesiaşi met’rop’olit’epe, xvala oktalurot jur çkvaneri na ren ek’lesiape çkinişi şurieri uğarot artoba do artikartisobas k’arta k’eleşen mxuci meçamu do omağalu şeni vixandaten” ya tku İeronimosik. P’at’rik’i Bartholomeosik, “Macerepeşi şkas qoropaşi artikartisoba xvalot religiuri ar geçinadva var artneri oras çkini noğirati ren” ya tku. Mok’itxas, jur k’ele şeniti ağani ar p’eriodi na geç’k’u ignapinu. Fenerişi P’at’rik’xana k’ala xe3aluri ok’ok’idinus na geç’k’u do Turkiaşa medginerobaten na içkinen, Hristodulosişi t’avris çkar k’ai na var o3’k’ert’u İeronimosişi P’at’rik’xana k’ala artikartisoba xvala jur ek’lesia şeni var Turko-Grek’o artikartisobasti p’ozit’iuri mxuci meçasen yado ç’areret’u Grek’iaşi p’resak.
1 Pukrik’aş oxvamobapeşi oras iptineri ambari yeçkindu Şişlis, ondğeneri orapes. P’olisi do demonst’rat’orepeşi şkas yeçkinderi k’abğaşi morgvalis, p’olisik ge3’k’aru demonst’rat’orepe. Emuşk’ule demonst’rat’orepek kogeç’k’es omt’inuşa ç’it’a kuçapes. Edo demonst’rat’ori ar oxorca komelu. Am oxorcak mutu uçkineri svas gelacant’uşi, 3’oxle namtini p’olisepek geçes emus lastik’işi bigaten. Ok’uleti k’uçxeten geiçini mpuleri p’olisepeşk’elen dudi muşis. Majura ambariti yeçkindu Taksimis. T’urist’i ar k’oçi-oxorcak am ambarepeşi oras, ekol-akole gulut’esşi, ibaxines mask’eten mpuleri p’olisepeşk’elen.
ÇİNİS MEK'ARBERİ NOĞA |
