3'ANAĞANİ
|
ARMENURİ, GREK'URİ DO İBRANURİ İGURİNASUNON
Nevşehirişi Universit’eş Feni do Nç’aralobaşi Fak’ult’eşi Dek’ani P’rof. Dr. Metin Hulaguk, Turkias Armenuri, Grek’uri do İbranuri na uçkin çkinerk’oçepe dido na var renan şeni Turkiaşi universit’epes maartanot Armenuri, Grek’uri do İbranuri k’ortape gon3’k’imuşa vixandept ya tku. P’rof. Hulaguk, Armenia, Grek’ia do İsraeli k’ala k’abği rt’asnati am dobadonapes na iğarğalinen nenape k’ai na uçkin, arkivepes na goşogorasunon çkiner-k’oçepe domaç’irnan ya tku do “İptinerot na mçitunanpe olagu emuşk’uleti am dobadonape k’ala dosturi k’ont’akt’obape omordinu do oşkendari ilmiuri xandape oxvenuşa gza meçamu şeni am k’ortape gon3’k’imu minonan” yado noqonu. Fak’ult’e mutepeşis Çinuri, Jap’onuri, Rusuli do K’oreş nenapeşi k’ortape 3’opxineri miğunan ya na tku P’rof. Dr. Metin Hulaguk, Armenuri, Grek’uri do İbranuri nenapeşi k’ortape gon3’k’imu şeni moxtasneri ndğalepes YOK-işen p’ozit’iuri coğabi moxtimu pçumert yado ognapu.
Hava-İş coxoni sendik’aşk’elen na i3’opxinu “Çkar k’at’astrofa var iqvas yado pilot’epek ixandan” temaloni p’anelis, Putxinobaş Medi3iaşi K’erk’elaş Generaluri Dudmaxvence Doç. Dr. Muzaffer Çetinguçik, pilot’epek na ak’ates ank’et’aşen ambarepe meçu. 159 k’onari THY şi pilot’i do mtelot 180 pilot’ik na ak’atu ank’et’aşi toliten pilot’epeşi oşişen 80 k’onarik, Turkiaşi 3iviluri putxinoba emniet’oba şeni dobağineri var z’irops. Pilot’epek ank’et’as na meçes onç’eloni coğabepeşen na oxui3’onu ar mtinobati ren, mapxaşi orapes t’urizmuri goxtimu manz’inaşi 3iviluri putxinobaşa na oğodaps negat’iuri tesiri. Putxinuş ekibepeşi doç’k’indinoba k’ala k’at’astrofaşi risk’i muk’onari ren yado k’itxaşa pilot’epeşi oşişen 81,6 k’onarik “Ho, xususurot mapxaşi tutapes doç’k’indinoba eçkindun do k’at’astrofaşi risk’i manz’inen“ yado coğabi meçu. Pilot’epek putxinaşi firmapeş ekibepek moşvacinu şeni na ixmarnan ot’elepek am temas notesiraps yadoti nenas gebaz’ges. Xususurot xonarişi sebebiten var mancirenan yadoti noqones. Ank’et’as pilot’epeşa, a3’ineri şart’epek k’at’astrofaşa sebebi meçaps-i yadoti ik’itxinu. “Andğaneri xaliten putxinuşi k’at’astrofa yeçkindinus gza na meçaps fakt’orepe ren-i?” yado k’itxaşa pilot’epeşi oşişen 45,3 k’onarik “Ho, mağali albatoba uğun” yado nena guktires. KORYUREKİS AVT'OMOBİLİ MANTXU DO DOĞURU
TRT-şi binaşi 3’oxleşen gzaşi ekole mek’ilapt’uşi, şurişurisobaten na nulut’u ar avt’omobilişi montxuten met’repeten na go3’it’k’oçinu sp’ort’uli mediaşi duayenepeşen 77 3’aneri C. Koryurek, monk’a yaranot Taksimişi Gamantana do Goşogorobaşi Oxzabuneşa ninç’işinu. İnt’en3iuri o3’k’omilobaşi k’ortaşa na incirinu C. Koryurek meçu şuri muşi Ğormotis, saat’i 22.00-s. C. Koryurekis na montxu 27 3’aneri mat’ekst’ile N. Arslanik aşo tku: “T’rafik’işi tepe var t’u. Arşvacis 3’oxle çkimis eçkindu. Frenis gevobaz’gi mara var domadginu.” C. Koryurekik, Atlet’izmişi Federa3ias, Generaluri Mdivani, Asdudmaxvence do dudmax-vencot ixandu. Gazeta Cumhuriyet (Resp’ublik’a), Hurriyet (Oxoşkvoba), Yeni Yüzyıl (Ağani Oş3’anura), Radikal (Radik’ali) do Sabahis (Ç’umani), atlet’izmi, olimp’iadepe do generaluri temapeten st’at’iape ç’aru. TRT şeni atlet’izmuri p’rogramape 3’opxu, olimp’iaduri sterapes mak’oment’arot ixandu. 5. P’rezident’i Cevdet Sunayişi mediaşi k’onsult’ant’i rt’u. Xalk’i k’ala k’ont’akt’epeş k’erk’elaşi mak’idalepeşi doloxe rt’u. Avraziaş k’ont’inentişen k’ont’inent’işa marat’onişi menç’işoba do organiza3iaşi direkt’orobati na qveret’u C. Koryurekik, 7 olimp’iaduri sterapesti ixandu magazetot. GAZİPAŞAS AVİ İMEMNİNU
Gazipaşas Ğormoturi skidalas mxuci meçamu şeni, avi imemninu. K’vinçepe xolo Ğormoturi gomorgva mutepeşis oz’iramu, entepeşi oç’ik’ç’ik’upes nusiminu, ar t’ot’işen majuranişa z’enurepeşi o3xont’inupe oseyru, oput’epeşi gomorgvas m3kvit’urape oz’iramu na unonan, na tku k’aimak’ami İ. Gultekinik aşo ğarğalu: ”Am muşenobaten memnu gebdvit avis uvadelonot. Mt’k’uri 3xovarepeşi 3’k’arişa dvaç’irobas mxuci meçamu şeniti, na dvaç’irs dulyapeti p’aten. Gazipaşaşi sinorepeşi doloxe avcoba oxvenu, oavu andğaşen memnineri ren. Mtel gzalepe onk’ilu şeni, k’arta dulya dop’it. Mitik gza mo goras avi oxvenu şeni.” XALİŞİ FABRİK'AŞA CEZA NİÇ'ARİNU
Milasişi oput’e Boğaziçis, vit 3’ana 3’oxle k’onaris k’ideri xali oçxuşi fabrik’as 25 şilya Lira ceza niç’arinu. Fabrik’ak kimialuri genomskidepe abja Mazis na dolot’k’oçeren oxui3’onu. Am kimialuri genomskidepekti abja Mazişi gzaten Tuzlaşi 3’k’aroni sahaşa nunç’işun. Doloxe muşis 120 k’onari ç’eşidi k’vinçi do 50 k’onari ç’eşidi çxomepeşa oskiduşa gza na meçaps, 340 hek’t’aroni Tuzlaşi 3’k’aroni sahas k’vinçi do çxomepek oğuruşa geç’k’uşi, Milasişi K’aimak’amoba, Gomorgva do Mt’k’alepuna Noğaluri Direkt’oroba k’ala Jandarmaşi gomorgva oçvaluşi timepek goişogores do ceza nuç’ares abja Mazis kimialuri genomskidepe na dolot’k’oçapt’u fabrik’as. Fabrik’aşi mance D. Yaşarik, “Vit 3’anaşen doni fabrik’aşi 3’k’arepe baği çkimiş o3’k’aruşi arxepes mevaşkumer. A3’işakisti mitik mutu var mi3’u. K’abaxat’oni na vore var miçkit’u.” ya tku. EFES PİLSENİK LİDERİ GECGİNU!
Bekoşi Bask’etboliş Ligaşi 15. dolonuri maçis Efes Pilsenik, lideri Galatasaray Cafe Crovni 72-59 sk’oriten gecginu. Abdi İpekçi sp’ort’iş salonis na isterinu maçi na mogu Efes Pilsenik p’uani muşi 26-şa yoçku. Galatasaray Cafe Crovnikti p’uani muşi 27 qu. Skit’a-mç’ita peroni ekibi geicginu mara maartani p’eriodi xolo liderot oçodinu. 15. dolonişi irişen beciti maçis na ok’oniges jur ekibişen Efes Pilsenik, Euroleagues Maccabi Tel Avivişa na geicginu şeni umoraloni rt’utina geç’k’aşen çodinaşakis ucgişi sterapa o3’iru. Bekoşi Bask’etboliş Ligas şamp’ionobaşi menceloni favorepeşen Beşiktaş Cola Turka, Fenerbahçe Ulkersp’ori do Turk Telekomi na gecginu Galatasaray Cafe Crovnik, artneri t’akimepeşa ne icginu Efes Pilsenişa ti gendrik’u. Galatasaray Cafe Crovnik, aşoten Bekoşi Bask’etboliş Ligas salonişa na moxtu do maçişi çodina-şakis mxuci na meçu 7 şilya k’elenari muşiş 3’oxle, 8 doloni şk’ule geicginu.
|
K'OST'AS K'ARAMANLİSİK ANİTK'ABİRİ MOİK'İTXU
Gverdi oş3’anura şk’ule, Turkiaşa ofi3ialurot iptineri na moxtu Grek’iaşi Dudnaziri K’ost’as K’aramanlisik 3’oxle Anitk’abiri moik’itxu. Am mok’itxa muşişi oras, ti-muşis Oxen3aleşi Naziri Zafer Çağlayanik naqonu Turkuli xe3alaşi coxoten. K’ost’as K’aramanlisik naşkvu çelengi Ataturkişi mozoleumis do eya oşinu şeni dogditu. Ok’ule Anitk’abirişi muşeuri defteris coxoşç’ara gedvu. K’ost’as K’aramanlisik aşo noç’aru defteris: “Ataturki do Venizelosis uğut’u p’olit’ik’uri gonk’vatoba do gurişk’ap’e-t’oba. Çkinti gurişk’ap’et’oba miğunan, mcveşi ç’vinapek var memodgitan yado. Am guriştkvala do guramobak jur xalk’işi şkas çxant’eri moxtasneroba meidanişa gamiğasunon.”
2009 3’anas oxzabunepeş 3’oxle do oxen3aleşi dairepes didobaten na iz’iren na çumernan k’oçepe var iz’irinasunon. Elek’t’ronik’uri oxen3ale oqopinu şeni TUBİTAK-k na xazirups k’artiten dobadonamşinobaşi k’arti yani “minobaşi elek't’ronik’uri sist’ema” geiç’k’inasunon. Ağani sist’ematen k’arta dulya şeni oxen3aluri dairepeşa oxtimu var çitasunon. İnt’ernet’işen dido dulyape ixveninasunon. Oşi p’ro3ent’i emniet’oni iqvasunon yado na ignapinu k’arti çkar k’op’ia var ixvenasunon. Elek’t’ronik’uri k’arti, 3’oxlenurot şursağobaşi k’arnepe do reçetape mek’arbasunon. Doxtorik zabunis na meçasunon ç’ami “elek’t’ronik’uri dobadonamşinobaşi k’arti” şi jin noç’arasunon. Zabunis, eczaxaneşen k’arti muşiten ç’ami yaç’opasunon, sigortakti eczaxaneşa geç’areli muşi meçasunon. A3’i na ixmarinen minobaşi k’artepeşen emniet’oba dido monz’ineri na iqvasunon am k’artepe, oxen3aleşk’elen elek’t’ronik’uri xizmet’i na niçinen k’arta k’idalas ixmarinasunon. Dobadonam-şines ti muşi oxen3aleşa oçinapu dubağasunon. İptinerot oxmarinu şursağobaşi speroşa na niçinasunon k’arti, uk’açxe oxen3aluri k’arta k’idalas oxmarinus geiç’k’inasunon. ADANURİ MAAMAGEPEK NOBAZ'GAPAN
15 3’anağanişi ndğas, grevi mutepeşişi 670. ndğa na ek’askidinu SCT Or T’urbo Filt’re fabrik’aşi maamagepe k’ala artot ar ok’oxtala ixor3elinu. Ok’oxtala ixvenu Petrol - İş Sendik’aşi Adanaşi filialis. Ok’oxtala geç’k’u musik’as nusiminuten. Grevişi dudişen andğaşakis muepe golaxtu na oxo3’onapapt’u ar slayt’i iseyrinu. Am slayt’uri oseyroba şk’ule ğarğalape ixvenu. Dulyaşsvaşi matemsile Erdinç Tumukik oxo3’onapu muşeni do muç’oşi geç’k’u mutepeşi grevi. Nobaz’gaşa na naqonasunonan, tku. Ok’ule Ok’ont’aleri Metal- İş Anatoliaşi oteşkilobaşi mdivani Rasim Gundalik ğarğalu. Rasim Gundalik ti muşis p’rofesionaluri masendik’e oqopinu na var unt’uşi gebaz’guten antepe tku: “Ar maamagot sendik’aşi doloxe dulya oxvenus mevaqonop. Am grevişi gecgineri oqopinus mtel guriten vicer.” Ok’ule Ok’ont’aleri Metal- İş Anatolia So3ialuri Dulyapeşi mdivani Musa Benlik nena nokaçu. Sendik’aluri xvenapeşen ğarğalu. SCTşi grevis mxuci meçamuşi becitobas gebaz’gu. Ar leksiti ik’itxu. Nena na nokaçu, magreve oxorca maamagepeşen Ummuhan Doğanik antepe tku: “Grevis 670 ndğa golaçkvinu eşo perpu dulyapeşen var ren. Murenki, na bgorupt’it mxuci var maz’ires. Arçkva mtelot goç’k’ondineri voret mado visimadept. Aşo ar moment’is xveneri am ok’oxtalak şuri momçes. Am guri meçamuten, mu iqvasna iqvas, gebaz’ga çkinis mevaqonatminonan çodinaşakis.” Ok’oxtalaşi irişen xeloni moment’i rt’u, magreve SCTşi maagepek artot kursişa extimu. Ok’oxtalak am xela do artikartis mxuci meçamuşi gagnapaten diçodu.
|
CHP-ŞEN MAJURANİ ATAK'İ: NANANENA
CHP-k, Deniz Baykaliş Oçildre İrak’işi atak’i şk’ule majurani atak’i oxvenuşa ixaziren. Ağani atak’i nananena doguruşi temas iqvasunon. “Oxen3aleşi unit’ari st’ruk't’ura na var ok’oxvasunon ar 3’opxa” şeni xe na muinz’iku CHP-k, 1989 3’anas Deniz Baykalişi imza gedveri “Turkulişen çkvaneri nenapeşi oxmaru temaloni k’anonişi tek’lifi” xolo Meclisişa omoğuşa ixaziren. CHP-şi Şkaguroni Oktalaşi K’omit’eş mak’ature Sinan Yerlikayak, 1989 3’anas xazireli Yulva do Omjoreyulvaşi rap’orepe ağneburot oxazirus mevaqonopt ya tku do 1989 3’anas Meclisişa na niçinu “Turkulişen çkvaneri nenape oxmaruşi temaloni k’anonişi tek’lifi” xolo mepçatminonan yado ognapu. Yerlikayak, “Nananenapeşi omordinus oxen3aleşk’elen omxvacinu dvaç’irs. Dobadonamşinepesti mutepeşi nana-nena oçkinu do oguru nçitunan. Mara xususuri gzaten nananena mutepeşi dogurus mxuci mepçapt” ya tku. "CERAŞ XARİT'A"Şİ BROŞURİ GAMİÇKVİNU
K’ult’ura do T’urizmaşi Nazirobak gamoçkvu, Turkiaşi ceraşi şkaguronepe-şen ambari na meçaps suretoni broşuri. Broşuris niçinen İslamuri, Krist’ianuri do Musevuri 32 ceraluri şkaguronişi ambari: “Ağrişi germa, Ahlatiş Selçuk’uri k’umbet’i do sapulape, Amasyaşi Sult’ani majurani Bayezidişi k’omp’leksi, Ank’araşi Xaci Bayram Veliş meçetişi turbe, Antakiaşi Aziz Pierişi ek’lesia, Antakiaşi Habibun Neccarişi meçeti, Bursaşi jvari meçeti, İznik’işi Aiasofiaşi muzeumi, Demreşi Noel Babaşi genomskidepe, Divriğişi ulu meçeti do Daruşşifa muşi, Efesi, Erzurumişi t’k’ubi minaroni medrese, Eskişehirişi Seyid Battal Gazişi k’umbet’i, Xaci Bektaş Velişi muzeumi, Xarrani, Topkapiş Sarayişi Ğormoturi amanatepeşi k’orta, Aiasofiaşi muzeumi, Kariyeşi muzeumi, Axrida do Neve Şalomişi sinagogepe, K’ap’adokia, Mevlanaşi muzeumi, Mardinişi Deyrulzafaranişi manast’iri, Pamukk’ale, Sarti, Siirtişi Veysel K’aranişi k’omp’leksi, Siirtişi İbrahim Hakki Efendi do Xazret’i Fakirullahişi turbe, Şanliurfaşi Rizvaniyeşi meçeti do çxomoni t’iba, Tarsusişi Aziz P’olişi orome, T’amt’raşi Aiasofiaşi muzeumi, Maçkaşi Sumelaşi manast’iri, Akdamarişi ek’lesia do Yalvaç Aziz P’olişi ek’lesia.” UMENCELONEPEŞOXORİS XÇİNİ DOBAXES
Ti-muşiuri ar umencelonepeşoxoris xçini do badepes xizani ndğa o3’iruşi ar t’eleviziuri p’rograma z’iru. S. Poşul coxoni ar dobadonamşinek xçini do badepes xizani ndğalepe na o3’iresşi ambari z’iruşi, dadi muşi G. Uyari, am umencelonepeşoxorişen gamiqonu. Vit tuta 3’oxle dadi muşi umencelonepeş-oxorişa na naşkveret'u S. Poşulik, em oras dadi muşi 76 k’ilogrami na rt’u, a3’iti 45 k’ilogrami na ren ognapu. S. Poşulik aşo naqonu: “Mxuci muşis get’axeri qvilepe uğut’u. Xura muşişi mtel k’ortape monağeri ren. Am umencelonepeşoxori şeni p’rok’uroris ambari mepçi. Ar tutas 850 Lira mepçapt’it em umencelonepeş-oxoris. Amuş met’a, dadi çkimişi qucişdolok’idale, ğazi, ar kvaoni ma3’k’indi, alyansi do qali muşis na uğut’u, zenciriti gondineri ren.” AR K'UÇXEŞMODVALONİ ŞAMP'İONİ
Kirikkaleşi noğa Bahşilis, geç’k’apuroni n3’opulapeşi şkas na ixvenu atlet’izmişi şamp’ionobas, 1500 met’res na kok’oç’işu mamgurek çodina 800 met’re ar k’uçxeşmodvaluten notamamu. Edo okroşi medali mogu. Ağanmordaloba do Sp’ort’işi Generaluri Direkt’oroba do Atlet’izmişi Federa3iak na 3’opxu geç’k’apuroni n3’opulapeş mamgurepeşi atlet’izmişi şamp’ionoba ixvenu Bahşilis. 1500 met’reşi k’at’egoriaşi 700. met’res na kok’oç’işu Fatma Buşra Taşişi k’vazali k’uçxeşmodvalu k’uçxe muşişen gamostu. Aya na var inç’elu Fatma Buşra Taşik naqonu ok’oç’işas ar k’uçxeşmodvaluten. Çodina 800 met’re ar k’uçxeşmodvaluten na notamamu Fatma Buşra Taşi iqu maartani. "MAAMBARE" VİZİONİS REN
”Maambare” coxoni filmi amaxtu oz’iramas 25 3’anağanis. Filmis 25 şuroni ar bereluri masağaleşi k’adroti roli osağaps. Nizami muşi ok’oxveri ar oput’eşa mulun Zekeriya coxoni ar magzalek. Muşi oxtimuten, şinaxuri oğodape gamaxtimus kogeç’k’aps. Çetin Tekindorik na osağu Zekeriyaşi xasiet’ik oxo3’onapaps “maambare”şi p’aşura oput’eşi berepes. Entepes imendi meçamuşi gza gorups. Filmişi gala şeni Mersinişa na idu rejisori Çağan İrmakik “Maambare” a3’işakis na p’i filmepeşen çkvaneri ren ya, tku. Magazetepek “Gişes ar noğira giğunan-i?” yado k’itxesşi, Çağan İrmakik aşo nena guktiru: “Ma gişeşi derdi var bzdip. Am filmi ren umosi beciti filmi gişeşi rek’ordepeşen. ‘Baba çkimi do biç’i çkimi’şen dido çkvaneri ren.”
Eskişehirişi Odunpazarişi Belediyeşi timçxupek z’ires jur ğurz’uleri coğori, dobadonamşinepek ambari na meçes şk’ule na ides kuça Kibris Şehitleris. Monop’olobaş duddirekt’orobaşi binaşi 3’oxle, ç’umaneri oğodas coğorepeşen ar teri şuri oç’k’viduten doxro3ku. Majura coğorikti var naşkvu megabre muşi. Eya ododginu şeni gza goru. 3xovarepeş Cansağobaşi Şkaguronişi timçxupek, “Am coğorepes ğurz’uloni oç’k’omale niçineren ya doma3’onenan. Çkin mevunç’işitşi, ari xro3keri rt’u. Majura coğori oşvelu şeni, 3xovarepeş Cansağobaşi Şkaguronişa meviqonit. Şvelaten var xro3kas yado k’arta çare bgoraminonan.” ya tku. |
XRANT DİNKİ İŞİNU
19 3’anağani 2007 tariğis meqvileri magazete Xrant Dinki, şuri muşi na meçu kuça Halaskargazis, gazeta Agosişi binaş 3’oxle 3’opxeri ar 3eremoniaten işinu. 3eremonias na ak’atupe, kuça Halaskargazis gazeta Agosiş 3’oxle ok’oxtimus kogeç’k’es ondğeşi oras. 3eremonias na ak’atespek naşkves k’aranfilepe do nudvines luk’unape Xrant Dinki na niqvilinu svas. 3’eremonias Turkuli, Somexuri, Lazuri, K’irmancuri, Zazuri, dovizepe itirinu do sloganape itkvinu. “Gurami çkimi akonaşis cans”, “Firatişi birapa”, “Skit’a nisa” coxoni birapape geliçinu.
Kabataşurepeşi k’erk’elaşk’elen 3’opxi-neri “irişen k’aepe”şi p’rizepe koniçinu. 700 mamgure do 2900 k’erk’elaşi mak’aturek na ak’atu ank’et’aten “İrişen k’ai ğocişmaç’arale” Bekir Coşkuni, “İrişen k’ai mağoşogorale magazete”ti Arena coxoni p’rogramaşi Generaluri oçvalobaşi rejisori Uğur Dundari i3xunu. Mehmet Ali Birandik na 3’opxups 32. Ndğa “İrişen k’ai p’rograma", Beyazit Ozturkik Kanal D-s na iç’andinen Beyaz Shoviten, “İrişen k’ai şovişi p’rograma”şi p’rizi eç’opu. 3’anaşi irişen k’aepeşi p’rizuri p’rogramas, gazeta, t’elevizia, radio do k’ult’ur-xeşnoxveneşi t’ot’epes 27 çkvadoçkva k’at’egoriapes p’rizepe niçinu. Kabataşişen gamaxtimeri Ahmet Taner Kişlali, Suleyman Seba, Adnan Kahveci, Omer Kavur, Feridun Karakaya, Nehar Tublek, Behçet Necatigilişi coxotenti şerefuri p’rizepe niçinu mancepe mutepeşis.
Oxen3aluri oxzabunes jurşuroni na rt’u na oxui3’onu 12 3’aneri D.G.-k kodorinu. Arapgirişi oxzabuneş timçxupek, nana do bere muşişi cansağoba k’ai renan yado ognapes. D.G. do muşi bere, lavoni muşişk’elen oxzabuneşen gamaiqoninu ya itkvinu. Malatyaşi So3ialuri Xizmet’epeşi Direkt’ori M. Konanik na qvu ognapas, na qvasunonan goşogora şk’ule, dvaç’irsna, D.G. muşi lavonişen na eli3’k’inasunon oxo3’onapu.
“Yaşari Skidunti Var Skidunti” isaxninen Mp’olişi Didinoğaş Belediyeşi Noğaluri Teat’repes 2007 3’anaşen doni. P’iesişi tema mk’ulot aşo ren: Oxen3ale k’ala dobadonamşine Yaşar Yaşamazişi şkas skideri oğodape ixiciven. Burok’rasişen k’arta oras zarari na z’iru Yaşar Yaşamazik ikten xapisxanas. P’iesişi k’adroti aşo ren: Maç’arale: Aziz Nesin, Rejisori: Y.Kenan İşik, Musik’a: Timur Selçuk, Dek’orat’ori: Rifki Demirelli do M. Emin Kaplan, K’ost’umişi Ust’a: Duygu Turkekul, K’oreografi: Çiğdem Gurel do Ali Duşenkalkar, Teşi op’erat’ori: Fatih Mehmet Haroğlu; Masağalepe: Can Doğan, Derya Kurtuluş, Ergun İşildar, Ezgim Kilinç, Hamit Erenturk, Hasibe Eren, Mehmet Bulduk, Mert Turak, Mevlut Demiryay, Murat Gureç, Murat Uzen, Osman Gidişoğlu, Reyhan Karasu, Savaş Barutçu, Şevket Avşar, Tuğrul Arsever, Volkan Ayhan, Yalçin Avşar, Berk Samur, Berna Adiguzel, Cihan Kurtaran, Doğan Şirin, Goksel Arslan, Nurdan Kalinağa, Okan Partirer, Ozge O’Neill, Ozgur Efe Ozyeşilpinar, Selin Turkmen, Senem Oluz, Tankut Yildiz, Tolga Coşkun, Yasemin Guvenç do Yilmaz Alpkiray. 'AĞANMORDALOBAŞİ MARKVALİ' İMRALİNU
Ataturkişi Universit’eş Vet’erinariş Fak’ult’eşi mamgurale Doç. Dr. Armağan Hayirli do Firatişi Universit’eş mamgurale P’rof. Dr. Kazim Şahinik na go3’oncğonu do Amerik’aşi Ok’ont’aleri Oxan3alepeşi Vayne State Universit’eşi Medi3iaş Fak’ult’eşi mamgurale P’rof. Dr. Omer Kuçuk k’ala oşkendari na ixvenu xandaten adamepes; st’resi, havaşi pintinoba, radiasioni, z’igara do mengaperi zararonepek na yeçkindaps, obadu do oxçinuten na manz’inen hucrepeşi oğuru na om3ikanasunon ot’rik’eşi markvali na imralinu ignapinu. Eczaxanepes ç’ami yado na gamiçinen lik’op’eni, ot’rik’eşi markvalisti uğun ya na tku Hayirlik antepe tku: “Amuşk’ule adamepeş t’k’ebişi şursağoba, nodgitinuş sist’emaşi ok’ap’et’inu, zabunobapeşa nodgitinu do skidalaşi k’alit’e do oraş monz’inu; moxva ordu do omorduş noqonu lik’op’eni na uğun ot’rik’eşi markvaliten ixor3elinasunon.” Doç. Hayirlik, goşogora mutepeşi şeni, AOO-s na gamiçkvinen “Food Resarch İnternational” coxoni ilmiuri jurnalişi K’unduraş tutaşi k’oro3xales geidvinasunon yado ognapu.
P'İYANGOŞİ XAMPA K'OÇİ OK'ROTUTEN DOĞURU
30 3’anaş 3’oxle p’iyangoşen didi geç’areli na mogu M. Sarioğlu doğuru sefilobaşi doloxe. Denizlişi Saraykoyişi oput’e Tirkazis maxaçkaloba na ikipt’u M. Sarioğlus aqu didi ik’ramiye. Ok’uleti dibargu Mp’olis. Na mogu geç’areli 10 3’anaşi doloxe na oçodinu do ugeç’areli na doskidu M. Sarioğluk goiktu xole oput’e muşişa. Barak’a muşis oskidus kogeç’k’u. Otxo 3’anaş 3’oxle peç’k’o muşişi m3’k’apek barak’a muşi na geç’vu M. Sarioğluk şuri muşi meç’irobaten moşletineret’u. Oput’arepe-şi mxuci meçamuten, ağani ar barak’a na k’idu M. Sarioğlu xut ndğaşi doloxe var iz’iruşi, oput’eşi pazvanti İ. Kiyakik z’iru muşi uşuroni xura, barak’a muşişa iduşi. Yastuğişi tude mcveşi p’iyangoşi bileti do list'epe na iz’irinu 81 3’aneri M. Sarioğlu ok’rotuten na ğuru oxui3’onu.
|
