ა ანდღა-ჭუმენთენ დულჲა ვარ იჩოდენ. ანდღანერი დულჲა ჭუმენშა ვარ ნაშქვა. ავლის ჯოღორი ვარ ტუში, ღეჯის ოლალაფეს. ამ დუნჲას მითი ვარ გესქიდერენ. ანკესიშენ ნა მესთვას ჩხომი მჩხუ იყვენ. არ გზას კაითი გულუნ დო პატითი. არ დღას დოვიბადი დო არ დღას ბღურუ. არ ელახცაფერი უშქირიქ ვით უშქირი ოხცინაფს. არ ზენგინიშ ოძღუს ოში ჶუკარაშ ოძღუ უჯგინ. არ თის ჟურ ქუდი ვა გეითვენ. არ ნენაქ -ვარ მიჩქინ- თიშენ შქვით ბელა მუიწკიფს. არაბა გეიქთაშ კულე გზა ნა დოგურაფს კოჩი დიდო რენ. ართიქართიშა მუმქურობა ნა იქიფს ბერეში ბერეთი მუმქური იყვენ. ართიქართიში ოწკომილუთენ მტვერის ქომამქვეს. არი ნა ნუხონდუნ ემუს, მაჟურანეფეთი ქონუხონდუნან. არის თოლის გოწვაღუ მშქირონითენ, მაჟურას ძღალათენ. არის ნა ახვენას, ეჲა დულჲა, სუმიქ ყვას ნა, ართო ფერფუ იყვენ. არიქ იბირს, მაჟუარაქ იმგარს. არ მასარითენ ღობერი ვარ იხვენენ. არ კარჶიშ დერდინე ნალი ვარ იყვენ! არ ნალიშ დერდინე ცხენი ვარ იყვენ! არ ცხენიშ დერდინე კოჩი ვარ იყვენ! არ კოჩიშ დერდინე არ კაბღა დიყვენ! არ კაბღაშ დერდინე უთოლე ვარ იყვენ! არ კოჩის ნა აღოდენ მუთხა, მთელი მილეთისთი აღოდენ. არ თხირი ჩხორო ჯუმაქ უკუირთერენ. არ მონქინუთენ ნჯა ვა მუიკვათენ. არ მცუდელაში ნენათენ ჟურენეჩი კოჩი დიყვილერენ. არ მწკირი შენი ეთვალა ვარ იჭვენ. არ ნენა გოწაკიდერი კოჩისთი დოთქვაფაფან. არ თომა მუთუ ვარ მარა ვით ვარ ნიჭკვიდენ. არ ნოსთონი დო არ ფერი ჯუმალეფესთი ვარ უღუნან. არ ოხორის ჟურ ჯუმა ნა სქიდუტას, ენთეფეში დულჲა წოხლე ვარ ულუნ. არ პიჯიშენ კაითი გამულუნ დო პატითი. არ სერი დოდგინერითი დითანენ. არ ტას დო კაი ტას. არ ფუქირიქ ფუქრინორა ვა იქიფს. არ მუთხა ორა მუშის ვა ყვი ნა, ხოლო სი ეგოტრუხუნჲა. არ ხეთენ ჟურ კარპუზი ვარ დიქაჩენ. აქ ჯუმორი დოგაბუჲა დო ჩხალას ხარჯი მოთ მაკვანთჲა? აღა-აღა რენ ზენგინი ტაშაქის. აღანი დერდიქ მჯვეში გოგოჭკენდინაფაფს. აღანი მანებრა ნა ძირა, მჯვეში ვარ გუიჭკვენდინა. აღანი ოქოსალექ კაი ქოსუფს. აღანი ძირამერის ფარა მო გუწუმეთ. აღანმორდალეში ხე-ფორჩასთი შქირონს. აჭარელიქ გერმაკელე იწკენ, ლაზიქ ზუღაკელე. აჯელე ნა ყვა დულჲა შქვით ჶარა იქიფ. ბ ბაბა საღი ტუში უკუნი მევიტით, ნა ღურუ წოხლე მევულუთ. ბაბაში ბედუა ბერეს აკნეფსჲა. ბაბაში ნენა ნანაქ ვა გოგურაფს. ბაბაში ნენაფეშ ჟინ ოხთიმუ უნონ. ბადი დო ბერეს არ ნოსი უღუნან. ბადი კოჩის აღანმორდალეფეკალა დოხუნუ ვარ ნომსქუნ. ბადის ყინორას მთვირი აკვანდა ნა, ვარ მექჩაფს. ბაზი ჯუმუთი ხაჩქარე. ბედიავა კატუქ კატუს ვარ მეჩაფს. ბედიშ ოსთერუ დო იხიშ ობარუ არ რენ. ბედუა, ნა იქიფს კოჩის გვაკირენ. ბერე დიდო ელომცქვინუქ ოკოხუფს. ბერე დო ჯოღორი არ რენ. ბერე ვარ დიბადერეტუ მარა ჯოხო გეოდუმეტეს. ბერე ნანა-ბაბაში დერდი. ბერე ომგარუ შენი რენ, ჯოღორი ოლალუ შენი. ბერე ორდაგინონ მუჭო დუშმანი დო ნა ირდას, სქანი შენი არგურონი იყვენ. ბერეს ართერიშენ აშქურინასინონ. ბერეს ნა უძიცა, თის გეგხედუნ. ბერექ დერდი ოკოგირთაფს. ბერექ ვარ იმგარაშა, ბუძი ვარ მეჩაფან. ბერექ ნა ჭკომას, ნანათი იძღენ. ბერეკალა გზას მო ამულურ, ბერეკალა მო იწონერ. ბერეშ ოყოფუმუ ირი ოხორჯას უჩქინ, ორდუ ირის ვარ აჩქინენ. ბეღის საატი ქუღუნ ნა, მჟორასთი ვა მენდოწკერს. ბინა მუჭო ნა დოდგა, ღოჯი ეშო ჲულუნ. ბიჭი ბერე ოჯაღიში მალი რენ. ბორჯი კაი დღაშა ვარ დოსქიდუნ. ბორჯი მეჩამუთე იჩოდენ, გზა ოგზალუთე იჩოდენ. ბორჯის მეჩამუ უნონ. ბორჯიშენ მენდრა იყვაგინონ. ბუტკუჯიქ თქვერენ: მა ნა მევუჭკომარე კოჩი დოღურატუკონ ნა, არ კოჩი შენი არ ფუთი თოფური დოვიქიფტიჲა. ჯ ჯარი ოჭკომუთუ ჩეთინი რენ: ვა ლაღუნა დო გეაშქვაკო დიშქვიდერ. ჯაჰილი კოჩი სქინდინაშენთი თაფალა რენ. ჯებე მონკა გიღუტაში მანებრა დიდო გაყვენ, უფშუ გიღუტაში მანებრა მითი ვარ გაყვენ. ჯიხა დოლოხეშენ ტკვაცუნ. ჯოღორიქ კუნდი ოჭკომუს ვარ მოჟვაგენ. ჯოღორი უგურელი კალივიშა ვარ იყონენ. ჯოღორი მითხანიქ ყვილუ, ემუქ დოხვას. ჯოღორის უღირინაში, გეგაკიბინს. ჯოღორის ყვილი ნუტკოჩი დო დოსთიბუნ. ჯოღორიქ ბაბა ვარ იჩინოფს. ჯოღორიქ მანჯე იჩინოფს. ჯოღორიქ ლალუფს, ლალუფს დო დოსთიბუნ. ჯოღორიქ ჯოღორიში ხორცი ვარ იმხორს. ჯოღორიში ვარ ნა, მანჯეში ხატირი ყვაგინონ. ჯოღორიში კუდელი ვარ ინწურანენ. ჯოღორი შინი დო ბიგა დიქაჩი. ჯოღორი ხჩეთი დო უჩათი, ჯოღორი რენ. ჯოხოქ კოჩი ვარ, კოჩიქ ჯოხო ომცქვაფს. ჯუმაკალა მწკუფისთი კაი გოილენ. ჯუმას ჯუმაკალათი ხესაბი უღუნ. ჯუმა შენი პატი მო ისიმადეფ დო მო ოღოდაფ! ჯუმორითენ დაჩხირი ვარ ნისქირინენ. ჯუმუ ოჩამუ შენი ხოჯი ჭერიშა ჲონჭაფტერენანჲა. ჩ ჩაში გჩაფს. ჩერემეს ბაღი, ბათუმის ჲაღი. ჩორბაშენ ჲეშქურდინერიქ მეყვერის შური უბარტუჲა. ჩოხა ვარ ეჭოფაშა, ხარი მო იზიმუფ. ჩქვაში გამაწკომილერის მუშითი ქაგუნდუნუ. ჩქვას ორმე ვარ უნთხორა, სი ქოდოლოლაფ. ჩქვაში ბერგითენ ყონა ვარ იხაჩქენ. ჩქვაში გურის მითი ვარ დოლოხენ. ჩქვაში დულჲას მო აკათერ! ჩქვაში თოკითენ ორმეშა ვარ გილენ. ჩქვაში ნეკნას ნა ნოკანკა, სქანი ნეკნასთი ნოკანკაფან. ჩქვაში იმენდითენ ვარ ისქედინენ. ჩქვაში ცხენის ნა გეხედა, ორდო გჲულუ. ჩქვაში ხეს ვარ იწკომილენ. ჩქიმი თოლითენ ბძირი, ჩქიმი ყუჯითენ შევიგნი. ჩქიმიკალა ულუნ ნა, კუჩხე ჩქიმის ოწკედი! ჩქიმი კისმეტი თრანგიქ ოხორი ჩქიმიშა ქომომიმერს! ჩქიმი სთერი ნა უჩქინ ბექიმ არჩქვა ვა რენ. ჩქიმი წანაში ქვათი ვა რენ. ჩქიმიშ კულე ქვა მთვას. ჩქინ პჭარით თქვან იკითხუფთ, თქვან ჭარით დო ენთეფექ იკითხან! ჩიჶუტი კოჩიში მუთუ მო გინტას. ჩხომი კუდელითენ ვარ იჭოფენ. ჩხომი თიშენ ხცუნ. ჩხორო მთუგიქ კატუ დოკირეს. ჩხომიქ თქვერენ: ოთქუში დიდო მიღუნ მარა პიჯი წკარითენ ჲოფშა მიღუნჲა. ჭ ჭანდა მიღუნჲა დო ფუჯეფეს მო უჭანდუფ! ჭანდაშა ულუტაში, გჲარი ჭკომერი ტაგინონ. ჭიტა ვარ ტაში, დიდი ვარ იყვენ. ჭიტა თქვი დო დიდო ყვიჲა. ჭიტა კოჩის გური დიდი უღუნ. ჭიტა ზუღას ოშქვიდუს, დიდის იშქვიდიჲა. ჭიტა ოღარღალუ დო დიდო დულჲა. ჭიტას გური ჯინიქის უღუნჲა. ჭიტა სედეკექ დიდო ბელაფე ქაგოგინდინუფსჲა. ჭიტა ტას დო ჩქიმი ტას. ჭიტა ღარღალი დო დიდო ისიმინი. ჭუბური ფენცქვაშენ გამალერენში, სო მეშაფხეტერეჲა, თქვერენ. ჭიტა ოსინაფუ ოქრო რენ. ჭიჭიტა ღორმაქ დიდი ჶელუკა გჲონტონაფს. დ დამთირეფექ ნისაშ დერდი ვა ზდიფან. დაჩხირი დო ყოროფა ვა იმფულენ. დაჩხირი ვა რენნა, კომა სოლენ ჲულუნ? დაჩხირი თიფის ვა იშინახენ. დაჩხირის თეშქე გეშუბღი, ირიხოლო დოჭუფს. დაჩხირი ჩქიმიქ გოტიბინაფსში, გჲარი ჩქიმიქ მოთ ვარ გოძღაფს? და ჯუმა შენი, ჯუმა თი მუში შენი. დღა იჩოდენ დო გზა ვა იჩოდენ. დღას სერი ნოყონს. დელის მთელი დელი უჩქინ. დელის ნოსი ვარ მოკითხუფან. დერდიქ დერდი გოჭკონდინაფაფს. დიდი გზაშენ იდი, ოხორიშა საღი მეხთი. დიდი დულჲას მჭიფე გამოწკერნან. დიდი თის დიდი წკუნი აყვენჲა. დიდილეფეშ ნოსი უმოსი დიდი რენ. დიდი მუშიში ნენას ნა ვა ნუსიმინს კოჩიქ, დიდი ზიანი ძიროფს. დიდი ნჯაშენ დიდი ნოხაპულე ჲელაფსჲა. დიდი ქორტაში, ჭიტა ვარ დოხედასუნონ. დიდი ჩხვინდი გიღუნ ნათი, კართა შურას მო აშურ! დიდი ჩხომიქ ჭიტა ჩხომი იმხორს. დიდიქ მუ მუღუქი, ჭიტაქ მუღატუ! დიდო ბერე დიდო დერდი რენ. დიდო გჲარის დიდი ქორბა უნონჲა. დიდო ისიმადი ნა, ლაპათი ვა იჭკომენ. დიდო მო გოინზდერ, მეჭკოდარე. დიდო მო ისიმადეფ, ორდო დიბადერ. დიდო ნა უკუწკინაფს, ემუს მატენ. დიდო ნა უნტუ ემუს, ჭიტათი ქაგუნდუნუ. დიდო ნა ქხვამუფს კოჩიშენ გაშქურინას. დიდო ნა ღარღალა, ნენაქ ნენა მუმერს. დიდო ოგაჭკომუ ნა, თოფურითი მკოლო მოგიხთეფს. დიდო ომგარინუთენ ღურელი ვარ ისაღენ. დიდო ოსინაფუ ნოშქერი რენ. დიდო საპრი ყვი, დულჲაში ჯინჯი ვარ ნაგნაშა, მუთუ ვა ყვა! დიდოქ თემბელობათენ იძაბუნენ, დიდოქ უდულჲელობათენ. დიდოთე ნენათენ რენ, დიდოთე ნოსითენ. დიდოფეს დოხუნუთენ დვაჭკინდენ, დიდოფეს დულჲათენ. დიდოქ მცუდი მთინი სთერი იხმარს. დინის ნა გუიქთენ კოჩიკალა მანებრობა ვარ იყვენ. დიძღაში, მშქირონი მუფერი რენ, გოგოჭკონდუნ. დობადონა გონდინი ნა, თითი გონდინერი გიღუნ. დოდგინერი ტიბაშენ გაშქურინას. დონოჭკინდე შენი ნჯირი ჭამი რენ. დოღურუ დო ქამუჩითუ. დოხუნუთენ დულჲა ვარ იჩოდენ დო ვარ იყვენ. დუგუნიშა ნა იდუთი დიფიშმანუ დო ნა ვარ იდუთი. დულჲა თქვანი კაი დოქაჩით დო მუთუ ვარ გაღოდენან. დულჲა მო უწუმერ დო თის პალო გეჩი. დულჲა მუში ჩქვას ნა ოხვენაფასენ კოჩის ფუჯიშენ ჶარკი ვარ უღუნ. დულჲამხვენუ კოჩი შენი უდულჲელობა ჯეზა რენ. დულჲამხვენუს თრანგიქ მეჩაფს! დიმჭკუქ მსვა მოიღაში, ჲა დაჩხირის გელულაფს ჲა წკარის. დუნჲა მარქვალი სთერი რენ მარა ვა გეიტაღანენ. დუნჲა ნიტას, ქორბას დგიტას. დუნჲა ნიტუ დო ონჯღორექ ოქაჩუ. დუნჲას ენ კაი ნა კვათუფს კამა კალემი რენ. დუნჲა ირ იქთირენ, ირ იჩოდენ. დუნჲას ირ კაობა დო ირ პატობა ნენაქ იქიფს. დუნჲას ნოსი ნა უღუნ კოჩიქ, დულჲა მუში ხე მუშითე ყვას. დუშმანი დოსტი ვარ იყვენ. დუშმანი დულჲათენ იჯგინენ. დუშმანის დუშმანობა უნონ დო დოსტის დოსტობა. დუშმანი ქორბა სქანი რენჲა. ე ეთვალას ოწკედი დო კუჩხე ეშო გონთხი! ემ დუნჲაშენ მითი ვარ გუიქთერენ. ენა მეხთა სოთის, ოხორი კიდაგინონჲა. ეშო ჲუშქვი, ვარ გელაგისქიდას. ეშო ფუჯიქ დიმღორატუქი, არ კარდალა ინჭვალტუკონჲა. ჶ ჶელუკას ნა დოლოხენ ზუღა ხვამასუნონ. ჶუკარა იმენდითე სქიდუნ. ჶუკარას ნულერენ დო ზენგინიქ ქოძირერენ. ჶუკარაში გჲარი, ჯუმუ დო წკარი. ჶუკარაში ქორბა ვარ იძღენ. გ გერმა უმკჲაფელი ვარ იყვენ. გერმაშენ გამახთიმერი მთელი გერმაშა ამულუნ. გამახთიმონი დიცხირი გამახთასუნონ. გელახთი ღარღალაშა, ელახთი მაძღალაშა. გენჯირელი ვარ ღურუნ, კუჩხეს გედგინერი დოღურუნ. გეღარღალერის ნოსთონი ვარ უღუნჲა. გეჭკაფულე კაი უღუნ, ოკულე მუ იყვას!? გზა ოღარღალუთენ იჩოდენჲა. გზათენ ნა ულუნ ვა დვაჭკინდენ. გინონიჲა ძაბუნის კითხუფან. გინძე ნენას კაბღა მოყუფს. გინძე ხჩე ნჯათი რენ მარა დიშქა ვარ იყვენ. გიჩქიტას, საპრის სელამეთი უღუნ. გჲარი გინტაში, მაკარინა დო ლუყუ არ მოგიხთეფს. გჲარი ნა იმხორ სოთის, კუჩხე მო გედუმერ. გჲარი ოძღაფაშა. გჲარი უნონ, დულჲა ვარ. გოლა მაღალა რენ, თუთათი მაღალა რენ, ღორმოთითი მაღალა რენ მარა დობადონა ირი ხოლო რენ. გორი დო ქოძიროფ! გოხვერის თომა ვა გვახვენ. გოხთიმუთენ გზა ვარ იშირენ. გური ყინი გიღუტაში, მჟორაქ ვა გოტიბინაფს. გური ირის უღუნ მარა არ კაელი ვა რენ. გური მოგიხთუნა, ქვას გჲაკიბინიჲა. გურის ნა გიღუნ სთერი, ეშო ყვი. გურონის ღორმოთიქ ნუშველს. გირინის ფალანი მუში მონკა ვარ აყვენ. გირინიქ ცხენი შენი იჩალიშეფსჲა. გირინი ჩქიმი! აქ გელადგატი ნა, ვარ მეჟოლაფტიჲა. გირინი დო მსქვერი ნა ვარ იჩინოფს კოჩი მუქ რენ გირინი. გირინის ოქრო მოკიდესში, აჲა მუ მონკა რენჲა თქუ. გირინის ოქროში უზენგეფე დუხვენეს, ჯოხო მჯვეში ქოდოსქიდუ. გირინი სქანის გეხე ნა, ხარკიშ ცხენის მო ჭიშუ. ღ ღალი ემთი ულუნჲაში, ქო ჲა უწვი. ღალიში აკრას მო ინჯირ! ღობერი ფუჯის უხვენუფან, კოჩის ვარ უხვენუფან. ღორმოთის ოხვამუთენ ბაგენი ვარ ჲეგაფშენ. ღორმოთის მუქ ნა მექჩუ ნენათენ უღარღალაგინონ. ღორმოთიქ ნა მექჩუ ნანანენა კოჩიქ ვარ გოგონდინაფას. ღორმოთიქ ჯოღორის გური უხვენატუკო, ცაშენ ყვილეფე დომთუფტუ. ღორმოთიშენ ჯენნეთი მო ჩუმერ. ღურა მთელი შენი არკაელი რენ. ღურა მთელიში ნეკნას ნოდგითუნ. ღურას მგარა ნომსქუნ. ღურას, სქანი-ჩქიმი ვარ უჩქინ. ღურა ტას, ოხჩინუ-ობადუ მო რტას. ღურაქ დიდი დო ჭიტა ვარ ცხუნუფს. ღურაქ კაი დო პატი ვარ ცხუნუფს. ღურაშა ჩარე ვარ იყვენ. ღურელი ვარ შინაფან. ღურელი შენი ჲა კაი ზოპონან, ჲათი მუთუ ვარ ზოპონან. ღვინიშ ნოსთონი ნუნკუს გიღუნ ნა ყურძენი დორგი. ჰ ჰამ დუნჲას კაობა ვარ იხვენენ. ჰამ დუნჲას ირხოლო იყვენ, ჶუკარა ზენგინი იყვენ, ზენგინი ჶუკარა იყვენ, მსქვა ნა რენ იბეთანენ მარა ვამსქვა ვა იმსქვანენ. ჰამ დუნჲას მუთუში ოჶიკირუ ნა ვარ უღუნ, კოჩი ქორენი? ჰამ დუნჲას ჰემ დუნჲაშ დერდი ვარ ზდიფან. ჰელალი კოჩი თრანგიქ ვარ გონდინუფს. ჰენნი ნოსიჲარისთი თის ნიკანკენ. ჰემშილიქ ანწი მჩხური დიდო მაყვასენ დო შარვალი ვიჭამინონ ჲადო ხარი იზიმერენ. ჰემშილიქ ჲაღი ძირუში, მუნდის ისუჲა. ჰუქუმეთიში კოჩიკალა დოსთობა ვა ყვათ. ი იგბალი მომჩი დო გზაში წალე მისთოლიჲა. იგბალი გიღუნ ნა, ვარ გონდუნუ. იმენდითი კაი რენ. იმენდი ღორმოთიქ ვარ მოგიშალას. იზმოჯეს გამათხვერი უხვენუ ვარ იყვენ. ირი კოჩიში თის ჟურენეჩ ბელა იყვენ. ირის ქორენ მციქა ირიში. ისა მეკახთიმუ ვარ გიჩქინ ნა, ღალის მო მეკულუ. იხი დო მჭიმა ვარ ტაში, ლიბადი მონკა მოგიხთეფს. იხიქ მეჩხომეს ნა უნონ სთერი ვა ბარს. იხი ხვალა არკელე ვა ბარს. ჟ ჟურ ბიგა ართო ვა გეიჩენ. ჟურ ხე არ თი შენი რენ. ჟურ-სუმ კოჩიკალა ისინაფამტაში, მელე-მოლე ოკიწკედეს დო თოლი ქოკონჩახეს ნა, ჰექ ჩქვა მოთ დოხედუ? ქ ქალამანი კუჩხეს კაი ვარ გუიკირაშა ვარ უნკაპა, გეაფისერ. ქაპი უმუნტურე ვა იყვენჲა. ქიმოლი კოჩის თი ომცქუ ვარ უჩქინ. ქოთუმე ჩქინიქ ოხორის კარკალაფს დო ჩქვაშის მარქვალი გესქუფს. ქოთუმექ ოყირუს ნა გეოჭკას, თი ნოჭკირაფან. ქოთუმექ ჩხინკოლუფს დო თი მუშიშ ხამი მოშიმერს. ქოთუმექ წკარი შუფს დო თრანგის ახვამენ. ქიმოლი რე ნა, ოხორჯაშ ფორჩაქთი ვა ქშინახუფს. ქორბა იძღენ, თოლი ვარ იძღენ. ქორბას მითიქ ვარ დოლოგოწკენ. ქირუფტაშაქის მიქ დიტალეფს! ქუდი მჯვეში ნა უღუნს, გური აღანი ვა აყვენ. ქვას კუჩხე ქოგეჩი ნათი, აჩქვა ქუსქი მო გეჩაფ, ხოლო დოგაჭვასენ. კ კავე უჩა რენ მარა აღა დო ბეგიქ შუფან. კართა კვინჩი ობღე მუშიშა მულუნ. კართა კოჩი არ ნოსიშა ვა რენ. კართა კოჩიკალა არკაელი ნენათენ ვარ იღარღალენ. კართა თხა მუში კუჩხეთენ გუწიკიდენ. კართა ქვა სვა მუშის მონკა რენ. კართა ბიგას ჟურ დუდი უღუნ, მუჭო ემთი დო გემთი. კართა ნენას ყუჯი ვარ ნიჩენ. კართა სოთის ქიმოლობა ვარ იყვენ. კართა ჭუმანი ზუღაპიჯის გოლვაყონი, სქანი კისმეტი ქოძიროფ. კართა ნჯაშ თუდე მო ფინთუფ, დოხუნუშ სოთი ვარ გაყვენ. კაი ავჯიქ მზესქუს ვარ ასთომერს. კაი ბერეში ნანა-ბაბაქ ვარ იმგარერენ. კაი დოლომოქუნსჲა დო აღა მო გიჩქიტას თი სქანი. კაი დო პატი არ ნენაშენ ითქვენ. კაი დო პატი მთელის უხუქთუნ. კაი დო პატიში შქას დიდი მენძილი ვა რენ. კაი დუშმანითი კაი რენ. კაი თრანგიშენ, პატი კოჩიშენ. კაი ისიმინი დო პატის ყუჯი მო მეჩაფ. კაიკელე ყუჯი გიღუტას, პათიკელე ყუჯის ნითვი. კაი კოჩის მთელი სოთის ოხორი უდგინ. კაი კოჩობა ფარათენ ვარ ჲიჭოფენ. კაი კოჩიში ნენა გჲარითი რენ წკარითი. კაი კოჩობა ბერობაშენ დონი ბელლი რენ. კაი მანებრაფე ვარ გამაჩა! კაი ოხორმანჯე თანორას ჲისელს. კაი რენ მუში შენი რენ, პატი რენ მუში შენი რენ. კაი ტარონის ზუღა ჭიტა რენ მარა ნა გჲობარს ირდენ. კაი ტარონის პატი მოყუფს, მშქირონობას ძღერობა. კაი შენი კაი მის უხვენუნ? კაიშენ კაი ვარ იჩოდენ. კაი ცხენის ჭეფხე ვარ უნონ. კაი ჯოღორიქ მცუდიში ვარ ლალუფს. კაი გეჭკალას კაი ჩოდინი მოყუფს. კალათი ჭერის გეძინ, გედგინ. კაობა ნა ოღოდიშენ გაშქურინას. კაობა ბურგილის გელუძინ, ჲისელაში ნულაფსჲა. კაობა დოყვი დო გზაშ წალე ისთოლიჲა. კაობა ყვი დო ქვაშ თუდე ეწადვი. კაობა ვარ გონდუნუნ. კაობა თოლიშენ ვარ გიტკოჩენ. კუკულინას ჯინოქ გენტომილუ ოგურუ, ოკულე მუს ქოგოჭკონდუ. კარავი მუკო ტუხას, ჶელუკა კონარი ხოლო ქოდოსქიდუნ. კარკალაქ ბირთუმ წკარი ვარ ზდიფს. კატუ დო ჯოღორითი არ ოხორიში რენან მარა ართიქათი ვარ იჩინოფან. კატუ ვა ნანჭუშინენ ხორცის ვა ცადუფს. კატუ კაპულათენ ვარ დვატენ. კატუს მთუგი ალანდეტუ. კატუქ კუდელის გეჩინადუფტერენჲა. კატუქ კუდელი ვა გჲონწაფს. კატუ ჯოღორი ვარ იჩინოფს. კეზა არ დეკიკეს იყვენჲა. კეზათენ კოჩითი იყვილენ. კაბირი ემუშენი გიღუნქი, ნენას გჲობაძგა. კიბირი ნენაში კილა რენ. კიბირი ხჩე-გური უჩა. კითხი დო გაჩქინას. კილიჯიქ კაი მიჭკირუფსჲა დო დიდო ინქინაფ, ბელას ქოდოლოქტკომერს. კიამეთი იყვასინონჲა დო დობაწიწიქ თოლი ქონიკარბერენ. კომა ნა ჲულუნ სვას, დაჩხირი რენ. კომანთორუს ირო კომა ვა იყვენ. კოჩი არ დღას გოწაკიდერი ქონუხონდუნ. კოჩი დიდიკალა დიდი ტასუნონ, ჭიტაკალა ჭიტა. კოჩი დოლოხე ჭერელი რენ, ფუჯი გალენდო. კოჩი ვარ ცხუნაგინონ. კოჩი კოჩითენ, ღობერი მძგუჯითენ. კოჩი კოჩიქ ოქაჩაფს, ღობერი მასარიქ. კოჩი კოჩი შენი ჭამი რენ. კოჩი მაჟურა ჶარა ვარ დიბადენ. კოჩი მენდრანი გზას იცადენ, იჩინოფენ. კოჩი მთელი მუთხანის ნუხონდუნ. კოჩი ნა იზენგინას, ჶუკარობა გოჭკონდუნჲა. კოჩი ნენათენ ნოკირაფან დო ფუჯი ქრათენ. კოჩი ნენა მუშიში მანჯე ტასუნონ. კოჩი იმენდითე სქიდუნ. კოჩი ოხორიში მუსაჶირი რენ. კოჩის გჲარითენ შური გედგინ. კოჩის იგბალი მუში ყვას ნოჭარუნ. კოჩის ისთერაჭი ვარ უღუტაში, ნოსითე მუთუ ვარ იყვენ. კოჩის კოჩობა გიღუტას, ჯოხო მუთხან გინონ გჯოხონტას. კოჩის მგერიშენ ვარ აშქურინეტუკონ ნა, ჯოღორი ვარ შინახუფტუ. კოჩის მთელიშენ დიდი იმენდი მუში თიშენ უღუტასუნონ. კოჩის მუ აღოდასუნონ უჩქიტას ნა ოხორიშენ გალე ვარ გამულუნ. კოჩის მუკო უღუნ, ეკოჩქვა უნონჲა. კოჩის მციქა შეიტანობათი უჩქიტასუნონ. კოჩის ნა გეოჯგინაფს, დუნჲას მუთუ ქორენ ნა, ხოლოთი კოჩი რენ. კოჩის ნა მელასენ სოთი ქუჩქიტას ნა, ბალიშეფე ქოდორჩაფს. კოჩის პატი შუნს, კაი გოჭკონდუნ. კოჩის დღა ვარ აჩოდაშა, შური ვარ გამუხთეფს. კოჩის ნოხვენე მუში ვარ გუნდუნუნ. კოჩის ქორბა დვაძღენ, თოლი ვარ. კოჩის ღურა ქომანჭუი, ლეტა მუშიკელე გზა გორუფს. კოჩის ქუდი ნომსქუნ, ოხორის ოქუდე. კოჩის შური გედგიტაშა, ხოლო მუთუში იმენდი უღუნ. კოჩის ხუთ კითი უღუნ, ჩქართი არკაელი ვა რენ. კოჩიქ უკაჩხე მუთუ ძირაში, დიდო ელამცქვერი იყვენ. კოჩის პატობა ვარ ყვა, სი ვარ დოგხვადუ ნა, სქანი ბერეს ქოდოხვადუნ. კოჩიშა კაი ვარ გახვენენ ნა, პატითი ვარ ოღოდა. კოჩიში თოლი მუთუთენ ვარ იძღენ. კოჩიში კაობა-პატობა ნენათენ რენ. კოჩიში ნენაქ ქვათი ოკოტკომერს. კოჩიში მანუშვალე ხოლო კოჩი რენ. კოჩიში ქორბას მთელი მუთხა ინტრენ. კოჩიში წანას დო დიდოწანას ნოსი ვარ იყვენ, ნოსითი თის იყვენ. კოჩობა ვარ ჲიჭოფენ. კულანი ჩქვაში რენ, ბიჭი ოჯაღიში მალი რენ. კულანიში ხე-ფორჩათი ბელა რენ. კურაკი ნა გეინკილუ კელეშენ გოინწკენ. კუჩხე გედგაში, წიწილაქთი გეგაკიბინს. კუჩხეს გედგითაში, კაი გოწკედი, სოთი ხეფეს კარ გედგირი. კუჩხე სქანი ეთვალა კონარი გონთხი. კუჭი იძღენ, თოლი ვარ. ლ ლეტაქ დიდო კოჩი ჭკომერენ. ლეტაქ ნა მექჩასენ, ღორმოთიქ ეზდასენ. ლიმხანაფუნას სქიდუ ნა, მუნდესთი რენ იჭვარე. ლიმჯი ფუჯიქთი ქონაგნეფს ოხორიშა მოხთიმუ. ლოყა ნენათენ ხოჯითი ინჭვალენ. ლოყა ნენა ჭამი რენ. ლოყა ნენაქ წიწილა ღორმაშენ ქოგამიყონოფს. ლუყუ ძიროფს დო ღობერი ვარ ძიროფსჲა. მ მანებრა სქანი მო მეტკომერ, მეშველუ უნტაში. მადულჲექ თურჯარის ქურქი ქამოწკუჲა. მალი მანჯე მუშის ნუნგაფს. მალის ნა ელვაწკას მჩხური მგერიქ იმხორს. მა ნა მპილასენ კოჩი, დაჰა ვარ დირინუჲა. მა ბლალუფ, მა შევიგნეფჲა. მანგურითე ნა იყონა, ჯოღორიქ ვა ლალუფს. მანდაბოლიშ ფორჩაქ კოჩი ოღერდინაფსჲა. მაისიში დღას მჭიმა გოთანაში, მჟორაქ პატი გამიკიბინს. მაფხა ოჩალიშუ შენი რენ, ყინორა ოჭკომუ შენი. მაპატკალეჯი ოხორჯაში დო ტახერი კვანცაში სერსი არ რენ. მარტიშ ტარონი სთერი დღას შილჲა ჶარა იქთირენ. მარქვალი სქანი სი გეტახი. მარქვალიშენ გამახთიმერიქ მარქვალი სქუფს. მახვენეტუში ვა მიჩქიტუ, მიჩქინში ვა მახვენენ. მახვა ფორჩას დოლიბღენი, კალათის წკარი დოლიბენი, ვამსქვა მითის ალიმბენი? მგერის მჩხური ონჯვინაფეს. მგერი მგერი რენ. მგერიში მგერი იყვენ, მთუთიში მთუთი. მამზოღეში ოხორჯა შირა, ფარა დო ძირას? მანძაგერის უღუნ ნა, სითი გიღუნჲა. მანძაგერიშ მარქვალი მჩხუ იყვენ. მელი გულუნ, გულუნ, ჩოდინას მაქურქეშ დუქანის ქოგელიკიდენ. მეივეში ქორბა ჩქვა რენ. მემლექეთის თის ნა მოგატუ ქვათი კურბეთის კაობათენ გოიშინენ. მენონჭკვალე ვარ ლოსქაგინონ. მენჩხომე ონჯირეს ვა ღურუნ. მენჩხომე ჩხომი ვა იყვენ, ანკესის ვა ნიკიდენ. მენჩხომეს ჩხომიში აჩქინენ. მენჩხომეში ძიქვა ხომუნი? მენჯელი ართობას რენ. მენჯელონიშენ მენჯელონი ირო ქუიძირენ. მეჭკირუში ხამი სქანი ნენას რენ. მეჭკოდუნ, სოთხანითი მჭიფე რენ. მთელი დულჲას ყუჯი მოთ მეჩაფთ, ნა გიჩქინან სთერი ყვით. მთელი ვარ გონდუნუნ, მთელი ვარ იჟოლენ. მთელი თი მუშიში ნოსითენ რენ. მთელი თი მუშიში მანჯე რენ. მთელიკალა ნენა ვარ ითქვენ. მთელი კოჩი არკაელი ნოსონი ვა რენ. მთელი მუში კუჩხთენ გუწიკიდენ. მთელი მუში ნოსითენ სქიდუნ. მთელის უხუქთუნ კაითი დო პატითი. მთელიქ ორმე მუში ჲოფშაფს. მთელიქ მუში მემსქვანუა გორუფს. მთელიში ვა ისიმინენ, მთელიში ვარ იჯერენ. მთელიშა ყუჯი ვარ ნიჩენ. მთელიშეი ვარ ითქვენ. მთელიშეი ოქროში უღუტან ნა, არ სოთი ლინჯიში აყვენან. მთელიშეი ბირდემ მიქ ძირერენ. მთელიშეი გეგინუთენ რენ. მთელიშეი მუში სვას ტასინონ. მთელიშენ გჲუნახი ღურელი რენ. მთელიშეის ხესაბი უღუნ. მთელიშეის მუში მარიჶეთი უღუნ. მთელიში გური ვარ გახვენენ. მთვირიშ მსქვანობაქ მითი ვარ ოტიბინუ. მთვირი ხჩე რენ მარა ჯოღორეფექ გჲოძგვაფან. მთვირი ხჩე რენ, მარა მუნტური ნოხედუნ. მთინი ნენა მჭოხა რენ. მთუგიშა მუთუ ვარ ახვენერენან დო კატუს ბელა უგორუფტერენან. მთუთი ძიროფში, ნოკუჩხონეფე მუში მოთ გორუფ? მთუგიშ წკინტილის შვარი გამოყუფს. მთუთიქ გოჯგინაში, ბაბა დუჯოხიჲა. მთუთიქ თქვერენ: ბერეფე ნა მაყუშ კულე, პიჯის ნოსთონი ქემაზდუჲა. მითი მითი შენი ვა რენ. მითის ვარ უჩქინ, სო ძიროფ დო სო გონდინუფ. მითიშა მეჩამუ ვარ გინტაში, ხალადისთი კუმი ნიმფინენ. მითხანი თი მუში შენი კაი რენ, ჩქვა შენითი კაი იყვენ. მითხანის თი მუშიში კიმეთი ვარ უჩქინ, ჩქვაში კიმეთითი ვარ აჩქინენ. მითხანის კაობა უნონ, პატობასთი ნუხონდასუნონ. მითხანის ჭიტაში კიმეთი ვარ უჩქინ, ემუს დიდიშითი ვარ აჩქინენ. მითხანიქ დიშქა კვათუფს, უდაჩხირე ვარ დოსქიდუნ. მითხანიქ იმხორს, ეჲა იძღენ. მითხანიქ ძირუ, ხოლო ემუქ ძიროფს. მითხანიში არაბას გეხე, ემუში ბირაფა იბირაგინონ. მილეთიშ პიჯი ვარ იჩოდენ. მი პატობათენ მულუნ მგარინერი იგზალს, კაობათენ ნა მოხთასენ ძიცინერი იგზალს. მკიბინაჯე ჯოღორის ყვილი ნუტკომელან. მკჲაფუს იზმოჯეთი ქოთუმე ალანდენ. მკულე ნენაქ თი იშინახუფს, გინძე ნენაქ თი ოყვილაფაფს. მოთა მარქვალიში გური რენჲა. მოთაქ პაპულის ოგურაფტერენ. მოლლა ცხენიშენ მელუში: ცხენიშენ ზათე გეფთამინტუჲა. მონჭერის ასთოლეს დო კობო ქამელუჲა. მჟას ყოროფ ნა ფუჯისთი ყოროფტაგინონ. მჟორა ჶუკარაში ქურქი რენ. მსვა ქომეგაჩანუ ნა, ზუღაპიჯის მო ფუთხუ! მსქვანას ნოსი ვარ უღუნ. მსქიბუ კათა სემთიკელე იქთენ. მსქიბუქ მჭიფეთი მქუფს, მჩხუთი. მსქიბუქ უწკარე ვა მქუფს. მტირი კუჩხეს ნა გიხუნა, თიშა ჲულუნჲა. მტირონიქ მწკირონის ნოძიცაფტერენ. მუ ბედ-იგბალი გიღუნ, ეჲა იყვენ დო ვარ იქთირენ. მუთხანი ნა ორგა, ეჲა ჲულუნ. მუ იყვასენ ღორმოთის უჩქინ, კოჩის ვარ აჩქინენ. მუკო კაი ნანაშანტიში ტას, ხოლო ნანშანტიში რენ. მუკო კაი ნისა ტას დამთირეს ვარ მოწონს, ნისასთი დამთირე. მუკონარი იჩალიშა, ეკონარი გაყვენ. მუკო ჟინ რენ, ეკოჩქვა თუდე რენ. მუსაჶირი სუმ დღაშა რენ. მუ უღუნქი გუნდუნას, მუ უღუნ დო მუ გუნდუნასუნონ. მუშებურა მუთუ ვარ მულუნ. მუში გზა წკარიქთი ძიროფს. მუში შენი ვა რენ, ჩქვა შენი რენ. მუჭო მთელიშეი ვარ იჭკომენ, ეშო მთელიშეითი ვარ ითქვენჲა. მუჭო ჯუმუ კართა გჲარის მო ანტალე. მუჭო ცანა, ცა ტრიკითენ მო ოქაჩაფ. მშუმუს ბოინე ოშუ უნონ. მშქირონის ონჯღორე ვარ უჩქინ. მშქურინაჯე ჯოღორიქ მენდრაშენ ლალუფს. მჩხურეფე წანაში ჩოდინას კოროცხუფან. მცუდელა ჭურვალის დოლოხედუნ დო ჟინთი ნიკირაფს. მცუდი მთინიში დოციგალე რენ. მცუდი ნა ზოპონს კოჩის, მთინი თქვასთი ნა ვარ უჯერან. მცუდის დიდი გზა ვარ უღუნ. მცუდის კუჩხე ვარ უღუნ. მცუდის მენძილი ვარ უღუნ. მცუდიშიში კამა მო ელიწკიფ. მწკული მწკულითენ გამიმენან. მწკუფი სერის თუთა უნონ, სეჶილი ქიმოლის ნოსერი ოხორჯა უნონ. მჭაჯი ჭიტა რენ მარა გური გუქთინაფს. მჭიმას გოწამტუ, ხორშაკალის ქომოხვადუ. მჯვეში კაი რენ მარა აღანი უმოსი კაი რენჲა. მჯვეში დუშმანი მანებრა ვარ იყვენ, ემუშენი პანდა დუშმანი რენ. ნ ნა გახვენენ, ემუში იმენდი მეჩი კოჩის. ნა გიღუნ, ემუშათი რაზი ტა. ნა გიღუნს გუსქირი, ნა ვარ გიღუნ ინანტრი! ნა ვა გინონ შეი მო კითხუფ დო ნა ვა გინონ დულჲას მო ანტალეფ! ნა ვა გჭირს მუთუ მო კითხუფ, მო აკათე დო მო ნაციგე. ნა ვარ ყოროფ კოჩი, ვართი გეგაყვენ. ნა თქუქ თასუ, ნა უყუჯუქ კორობუ. ნა რენ ქორენ. ნა უჩქინქ იქიფს, ნა ვარ უჩქინქ დიგურაფს. ნა მეგოჭარუნ ემუს ვარ გოგაქთინენ. ნაკო ბერე, ეკო ოხორი. ნაკო ნენა გიჩქინ ეკო კოჩი რე. ნამუსთი კულანი მამული მჭაჯისთი უნტკობუნ. ნანა-ბაბა ბერე შენი, ბერე თი მუში შენი. ნანა მუშიში თოლის მაჲმუნითი მსქვალინა რენ. ნა ნაგნეფს ქონაგნეფს. ნანაშანტიში გიყოუნ ნა, ბაბათი ბაბაშანტიში იყვენ. ნანაშანტიში ნანა ვარ იყვენ. ნანაშანტის ნანობა ვარ ახვენენ. ნანაში ბედუა ბერეს ვარ ნაკნეფს. ნანაში მჟაუჭკომუ ბერეს ხორცი ვარ ელადვენ. ნანაში ნენას ნუსიმინაგინონ. ნა ხენს მუთუ ვარ აჩქინენ, ნა გულუნს აჩქინენ. ნეკნაშა მოხთიმერი უფშუ მო ოჩქუმერ. ნენა გურიში ნეკნა რენ. ნენა ვა ნიკირენ. ნენა მონკათი რენ დო ჩორჩითი. ნენას ნენა მოყუფს დო იყვენ კაბღა. ნენა სქანიშენ ონჯღორე ვარ გაყვასუნონ. ნენა სქანიში მანჯე ტაგინონ. ნენას მთელიშეი ვარ ოთქვაფაგინონ. ნენას ოთქვაფაში, მთელიშეი ზოპონს. ნენას ყვილი ვარ უღუნ. ნენა ფარათენ ვა რენ. ნენაქ მუ ვარ ზოპონს! ნენაში ნოთქვაფე ვარ იმფულენ. ნისათი ვორტი დო დამთირეთი, ჟურითი მიცადუნ. ნოსერი ნანაშ ბერეფე ნოსერი იყვენანჲა. ნოსერიქ იდუშუნტაშა, დელიქ გერმა მეკილუ. ნოსი ვარ იფარენ. ნოსი შუქა ვა რენ, მეგიტახა ქომექჩა. ნოსის ოხმარუ უნონ. ნოსი უმჩანეს მოკითხუფან, თერბიე ჭიტას. ნოსი შენი გზა არ რენ. ნოსი წანას ვა რენ, თის რენ. ნოსი ნა უღუნ კოჩის დულჲა მუში ხე მუშითე ყვას. ნოსიქ კურშუმიშენ კაი ყვილუფს. ნოხაპულე ნჯა ნა კვათუფან სვას დიბღენ. ნუნკუს უწვი, ნუნკუშ უკაჩხე მო ღარღალაფ. ნცირერი კუმიშ დოლოხე ბაზი ქვანჭალათი ანტალენ. ნჯას მთელი ფუქირი ვარ ნოსქიდუნ. ნჯირიშ გუდა გჲარითენთი ვა იძღენ. ნჯუმონი ნა ოჭკომაფის წკარითი ოშვაფი! ო ობღე სქანის ნა ვარ გეგასქვას, ჩქვაშისთი ვარ გეგასქვენ. ოთქვაფაში, ნენაქ მთელიშეი ზოპონს. ოთქუ დო ოხვენუ არ ტასუნონ. ოთქუ ფერფუ რენ დო ოხვენუ ჩეთინი. ოთქუმუში ითქვასუნონ, ოყვილუში იყვილასუნონ. ოტკაფუ შქას ოიზდარე დო შური მბოლი მოიზდარე. ოკითხუ დო ოჭარუ ვა იგურათ ნა, ხე ჭკონდინერი, კაპულა გესთიქერი გოხთათე! ოკითხუ დო ოჭარუ ნა უჩქინ კოჩიქ, გჲარი ჰემუქ იმხორს რახატი. ონჩვირუ ვა გიჩქინში, წკარის მუ გორუფ? ონჩამურე მოკიდერიქთი დო ონცირე მოკიდერიქთი არ იმგარს. ონჯღოჲარი კოჩი ირო მშქირონერი დოსქიდუნ. ონჯღორეთენ მითი ვარ ღურერენ. ონჯღორეთენ ყვა მითის ვარ გოლაჭვერენ. ონჯღორეში დულჲა ართე დოყვი ნა მაჟურანისთი დიქიფ. ორა მუშის ვა მეწილაში შუკათი იბადენ. ორა მუშის ღურათი კაი რენ. ორდო მთელიშეი კაი რენ, ღურაშენ ჩქვა. ორმე ნა უნთხორუფს კოჩი, ორმეს მუქ დოლოლაფს. ორძოს ოთხო კუჩხეთი აყვენ, სუმთი. ოქიმოჯუში ორა მუშის ოქიმოჯი! ოქოსალექ ირხოლო ქოსუფს. ოქროქ ნოშქერითი დოხჩახუ. ოღარღალუთენ დულჲა ვარ იყვენ. ოღარღალუთენ დულჲა ვარ იჩოდენ, დულჲა ოჩალიშუთენ იჩოდენ. ოღურუში ღურასუნონ. ოჩალიშუ არ ხაზინა რენ. ოშმეში კატუსთი უღუნ. ოძირუ ჩეთინი რენ, ოხარჯუ ფერფუ. ოძიცინუს ომგარინუ მოყოფს. ოძღუ ფუჯიქთი ქონაგნეფსჲა. ოჭარუ გიჩქიტას დო ნოშქერითე ჭარი! ოჭკომუს შური ქეხთუ ქაფჩაკალა ლაზუტი. ოხვამეში ქვათენ ოხორი მო კიდუფ! ოხირუთენ კოჩი იყვეტუკონ ნა მთუგითი დიყვეტუ. ოხორიშ ხოჯიკა ხოჯი ვა იყვენჲა. ოხორი მერამითენ იკიდენ. ოხორიში ამბარი გალენის ვარ უჩქიტასუნონ. ოხორიში გზა ფუჯისთი უჩქინ. ოხორიში დიდინობა მთელის ვარ ახვენენ. ოხორის მამული - გალე დადული. ოხორჭკუას არ ხე მახირჯე უღუტასუნონ. ოხორჯალეფეშა კაპულა ვარ ნიდვენ. ოხორჯალეფეშენ სოთინე ნა ვარ იშინეტეს, ენთეფე ოხორჯა დიყვეს. ოხორჯას ტკობაშა მუთუ ნა გიღუტას, მო უწუმეთჲა. ოხორჯა ქუიძირენ, ნანა-ბაბა ვარ. ოხორჯაში ნენათენ ნა გულუნ კოჩი, ეთი ოხორჯა რენ. ოხორჯაშ წანა დო ქიმოლიშ ფარა ვა იკითხენ. ფ ფარა გიღუნ ნა კოჩი რე. ფარა გიღუტას დო ოკოროცხუ ვა გიჩქიტას. ფარათენ ნოსი ვარ ჲიჭოფენ. ფარა მუჭო მულუნ, ეშოთი ნულუნ. ფარა სქანი სო ულუნ გიჩქიტაში, ოხარჯუთი სუბუქი რენ. ფარაქ ოკოროცხუს ყოროფს. ფარაქ ფარა ვარ იქიფს. ფარაქ ფარა ძიროფს. ფარა ჯოღორიშ მუნდის მეშაძინჲა. ფახილი კოჩიქ მანძაგერიში მარქვალი მჩხუ ძიროფს. ფუქირის კაპულა ვა უღუნ. ფუჯი სქანიქ ინჭვალს, ხოჯი ჩქიმიქ მოთ ვა ინჭვალს? ფუჯიქ ყონა ძირუ დო ღობერი ვა ძირუ. ფუჯი ხამიშა ნიყონოფტესჲა. ფუჯი, ხოჯი ვარ ტაშა, ქოდოსქიდუნ კისირი. პ პატი დულჲას კაი დულჲა ვარ მოყუფს. პატი კატუქ ჩქვაშ ოხორის მთუგეფე ჭოფუფს. პატითი გუიჭკონდინენ დო კაითი. პატი კოჩიკალა მოწყვინუ ვარ იყვენ მარა პატი ტარონიკალა მოწყვინუ დიყვენ. პატი კოჩობა მითის ვარ დოსქიდერენ. პატი კოჩიში გჲარი ჯოღორიქთი ვარ იმხორსჲა. პატი მთინი კაი მცუდიშენ კაი რენ. პატი ნა მაწონეტუ, თიშა ქომომიხთუჲა. პატი ოხორჭკუაში ხეს, მუკო მუღას ქიმოლიქ, მუთუ ვარ გამულუნჲა, თუდენდო დიბღენჲა. პატი ოხორჯაქ ქიმოლი ნოსიშენ გამიყონოფს. პატი ოხორჯაქ ქიმოლი დელი დოწოფხუფს. პატის მუში პატობა დუბაღუნ. პატის პატი მოყუფს. პატი ტარონის კაი ტარონი მოყუფს, კაის პატიჲა. პატიქ მუ ყუ პატიშ მეტაჲა. პატიქ პატი ძიროფს, კაიქ კაი. პატიში კაითი მო გინტასჲა. პაპული დო ნანდიდიში მორდერი ბერე ელამცქვერი იყვენ. პატობა ნა ყუ სვას კაობა გორუ, ოხვამეს ღორმოთის ოგორუ. პიჯი გონწკიფტაშაქის თოლი გონწკარე. პიჯიში ოწკუნუს ბურგილიში ოწკუნუ უჯგინ. პიჯი ხვალა გჲარიშენი ვა რენ. ყ ყვალი მხირუს ყვალი შუნს. ყოროფა ნენათენ ვარ ითქვენ. ყოროფას ზენგინი დო ჶუკარა ვარ უჩქინ. ყუჯი მიქ ელოგოჭკირუ ჲაში, კოჩი ჩქიმიქ ჲა. ყუჯიქ ნაკო გიგნასენ, პიჯიქ ეკო ვა თქვასენ. ყინორას ეთვალა, მაფხას გონწკარელი. რ რაკანი რაკანის ვარ ნაგენ, კოჩი კოჩის ქონაგენ. რკინა ფასიქ იმხორს დო კოჩიში გური დერდიქ. რუსული ქოდიგური ნა, თურქი ვორე ჲა მო ზოპონ! ს სევი მთელის აღოდეს. სერენთი დიდი ტას დო ჲეფშერი მო გიღუტას! სერთი ჯოღორი კაობათენ მოღერდუნ. სი დიბადიში, მითხანი დოღურუ. სი ნა გახვენენ ღორმოთის მო ოხვეწაფ, დომიხვენი ჲადო. სი ვარ გიჩქინ ნა, ჩქვას კითხი, ონჯღორე ვა რენ. სი თი სქანის მუკონარი ნოსი გიღუნ, ემუს უხეზმეტი დო დულჲა სქანის იჩალიშიჲა. სი ნა გიჩქინ კონარი, მა გომოჭკონდუჲა. სი პატი ვა რენა, პატიშენ ვა გაშქურინას. სოთხანი ნა იდა, ექონი ქუდი გითვი. სოთხანის კოჩი გეაგენ. სქანი დო ემუში შქას დიდი გერმა გოშაძინ. სქანი დულჲა სი გიჩქიტას. სქანი კისმეტი ვა რენ ნა, ლუკმა ხეშენ მეგილაფს. სქანი ნოჩალიშე კაი რენ დო მითიშა ვარ იმეტენჲა. სქანი ყუჯითენ ვარ შიგნაშა, მუთუ მო ზოპონ. სქანი შვი დო სქანი ჭკომი. სქიდალა ვარ ჲიჭოფენ. სქიდალა, მუჭო დიხა, ზუღათი ქუღუნ დო რაკანეფეთი. სქირი ვარ იცხუნენ. სქირი მარქვალიში ცილი რენ, მოთა მარქვალიში გური. სქირიში დერდი თრანგიქ ვარ გოწირას. შ შარვალი ვარ გაშოლაშა, ჩხომი ვარ იჭოფენ. შარვალი გებურელის, ირიქ მა მოწკერს ჲა უჩქინ. შილჲა მცუდის არ მთინი უჯგინ. შური ლოყა რენ. თ თაფალა ღობერიშენ ფერფოთ მუჟიცხონტინენ. თაფალა დოფხედათ დო მაღალა ბღარღალათ. თაფალას ვა ჲანჭიშინუ, მაღალაქ ვა გჲანჭუ. თემბელი ბერეფეს მუთუ ვარ აგურენან. თემბელი ოჭკომუშ ვაქითის კაი რენ, ოჩალიშუს ვაქითის იძაბუნენ. თერმონიში შქურინერიქ მეყვერისთი შური უბარს. თეფეშური ქვა ვა რენ, მეჟილაში ჩქვა ვა რენ. თი გენჭინერი კოჩიშენ გაშქურინას. თი სქანი სი მო ომცქვაფ, ჩქვაქ გომცქვას. თი სქანი სი ოქაჩაგინონ. თითო კუსური მთელის უღუნ. თი ჩქიმიში სელამეთი ნენა ჩქიმიში კუნწულის რენჲა. თიქ გიჭკომუფს ნა, წანა სქანის ვა ვოწკერ. თიში დიდინობას ნოსიშ გინძენობა ირო ვა აყვენ. თიში თომა მითის ვარ უკოროცხუნ. თი ჩქიმიში დოხთორი მა ვორე. თოკი მუჭო გინონ, ნენას ხამანცა გეკირარე. თოლეფე მიღუტას დო პატი ფერის ტას! თოლიგონწკიმერი კოჩი ვარ გონდუნუნ. თოლი დო ყუჯი სქანითე ვარ ოგნა, ვარ ძირაშაქის, დულჲა მოთ იქიფ ხარკიში ნენათე! თოლი ვარ იძღენ. თოლითე ვარ ძირაშა, ვართი კაი თქვა დო ვართი პატი. თოლი სქანითე ვარ ძირაშა, მო იჯერ. თოლიქ მენდრა ძიროფს, ნოსიქ უმოსი მენდრაჲა. თოლი-უძღუში მუთუ მო იკვან. თომა გინძე-ნოსი მკულე. თომას ნოსი უღუტუკონ ნა, კართა სოთის ვარ ჲიტუ. თომონი ტაში მთუთი ვორეჲა მო ზოპონ. თოფურიში ლოყანობას ბუტკუჯიში ნძი უღუნ. თოლიქ თოლის ემირობა ვარ ოღოდაფს. თრანგის უნტას ნა კოჩიში მოშლეთინუ, მთუთისთი პილილი გელოჩაფაფსჲა. თრანგიქ წოხლე სი მეგჩას, ოკულე მაჲა. თუთუმი შუფ ნა, ებზა მოთ ვა გიღუნ? თუნა დიდი ტერენ მარა სარფითი ჭიტა თუნა ტერენჲა. თურქი ცხენის გედეხუი, ბეგი ვორეჲა უჩქინ. თურქის ყინი აყუში, გეჭუ ოხორი მუში. თურქიქ მჭკიდი ვა იმხორს, ქოვალითი ვა უღუნ. თხა გამაფჩი, თხა ჲეპჭოფი. თხაქ კუდელი ვარ ეწაზდაშა, ბოჩი ვარ ნულუნ. ტ ტაღანის ოთხო კელეთი ხე ნიჩანენ. ტუ უჩქინელი, იყვენ უჩქინელი. ტუჶეღი ბერეს ვარ მეჩაფან. უ უბერელი კოჩი კიტმირი იყვენ. უბერელი კოჩიში მუთუ მო გინტას. უბერელი ოხორი მესქირელი კარვანი სთერი რენჲა. უბერელი ოხორჯას ნანობა ვარ ახვენენ. უგამაზაყუქ უგამაყაზებური ზოპონს. უგეგაფუს მო გემოგაფ, გეგაფერის მო მომშალუფ! უგურე დულჲა ვარ იყვენ. უდულჲელი მეზარის რენ. უთოლე კატუს ქოდუსქიდერენ. უთოლე კოჩიქ თქვერენ: არ თოლი ქომიღუტუკონჲაში, ღორმოთიქ სუმ ქომეჩუში, ვართი ხვამუ. უკითხუ კოჩი ქვას გეხედუ, ქვას ქვა ქომანძინუ. უკითხუ კოჩი ფუჯი სთერი რენ. უკისმეტე ლუკმა ვარ იზდენ. უკოჩელი ოხორი მეღურელი რენ. უკუსურე კოჩი ვარ იყვენ. უმჟარე ფუჯიქ დიდო ღირინს. უმუთელობა ონჯღორე ვა რენ. უსტას ოხორი ვარ უღუნ. უსტას უსტაში ვარ მოწონს. უღნოსესთი ბაზი წორი მუთხანი დათქვენ. უჩა ფუჯისთი ხჩე მჟა უღუნ. უჩა ქოთუმექთი ხჩე მარქვალი გესქუფს. უჩოდინუ მუთუ ვა რენ. უწკუმუ თი ვარ იწკუნაფს. ვ ვათანიგონდინერი კოჩი გონდინერი რენ. ვარ გიჩქინ ნა კითხი, ოკითხუ ონჯღორე ვა რენ. ვართი მომცქვა, ვართი მემოძიცა. ვართი ბღურურ, ვართი ფსქიდურ. ვართი ფსქუფ ვართი პკარკალაფ. ვარ იშოლაშა, ჩხომი ვარ იჭოფენ. ვარ მიჩქინშო დო მეკოლაფი. ვაქითიმეკალაფერი მთელიმუთხა პატი რენ. ვაქითი მუშის მთელიმუთხა კაი რენ. ვაქითი მუშის ღურათი კაი რენ. ვაქითიქ მითი ვარ ჩუმერს. ვით კითის ართი ვა აქთირენ დო ვითოშ მურუცხიქ არ მჟორაშ თე ვა მეჩაფს. ხ ხამი გეჩა ნა დიცხირი ვარ გამუხთეფს. ხამიქ არ კოჩი ყვილუ, ნენაქ ვითოში. ხამიშ ჲარა დიკარენ, ნენაშ ჲარა ვარ იკარენ. ხარკიშ ოხორჯა მო ცადუფ, ქომოგწონდუ ნა მუ ყვარე? ხე დო კუჩხე ოხონკანი დო გაყვენჲა. ხე-კუჩხე განკანტაშა ვარ დოხედარე. ხესისი კოჩი ხაზაინიში უმააშე ბეგჩის ნუნგაფს. ხექ ხე ბონს, ჟურიქთი ნუნკუ. ხესაბი მთელიშეის უნონ. ხეშენ ხეშა მეკულუნ. ხოლო ტას დო მკოლო ტასჲა. ხომულა დიშქათენ ლარდე ჭუფან. ხონცას მჟორაშენ აშქურინეტუკო, ცა ვა ონტრეცინაფტუ. ხოფას ლაზი ღურუ, მპოლის მგარა დოდგეს. ხონცუნჲა დო ხვალა თი მო შინახუფ! ხოჯას თოკი აკვანდერენანში, თოკის მქირი მემიმფინსჲა. ხოჯას ქორბა ხუთ უღუნ, ართერი დაიმა უფშუ უღუნ! ხოჯაფეში დულჲაფე კერემული სთერი კირკოლერი რენ. ხოჯი ვარტაში, ფუჯის ონთხორაფაფან. ხოჯი ჭერიშა ჲონჭაფან. ხუთ კითი ხუთ ჯუმა, ართერითი ვარ ნიკვათენ. ხუთ პეპერი, ხუთ ლობია, არ ბათმანი წკარი- ისპირლეფეშ გჲარი. ხუთ უჩვაგინონ დო ვით მუჩვაგინონ. ხურხი მჭიფე რენ, ქორბა მჩირე. ხჩინიში ნოსი ულუნ, მულუნ. ხცაფერი თოკითენ ორმეშა ვარ გილენჲა. ხცაფერი ფიცარის კარჶი ვა ნიჭკადენ. ჲ ჲა კაი სიჯა გიყოუნტასუნონ ჲა კაი გირინიჲა. ჲაჰუდიქ თქვერენქი, იფთინერი ხე მეჩიჲა. ჲეთიმიში თოლი უძღუ რენ. ზ ზდერი წკარითენ ქარმატექ ვა მქუფს. ზენგინი ქორე ნა, აქ რახატი დოხედუ ემორას. ზენგინიში მამულიქთი სქუფს, ხოჯიქთი ინჭვალს. ზენგინიში ონჯირეს ინჯირი დო ჶუკარაში გჲარი ჭკომი. ზენგინიშ ქესე გუინწკეტაშა, ჶუკარას შური ქჲუხთეფსჲა. ზორითენ მსქვანობა ვარ იყვენ. ზუღაკალა ნა სქიდუნს ონჩვირუთი აჩქინენ. ზუღა მეკილუ, ტიბას დოლიშქვიდუ. ზუღა მეყვერი დიყვას ნა, არ კიზი ვარ ჲაზდენ. ზუღაპიჯის სქიდუ ნა, გერმას ფაცხა გიღუტას! ზუღას ნა იშუვუს მჭიმაშენ ვა აშქურინენ. ძ ძაბუნობა ცხენითე მულუნ, მეფოხნერი იგზალს. ძაბუნობაქ ვარ გოჯგინასუნონ, სი ოჯგინაგინონ. ძაბუნის ვარ კითხუფან გჲარი გინონიჲა. ძაბუნიში ჭამი დოხთორის უჩქინ. ც ცანას ვით ნენა უჩქიტუ, ოიჭოფუში ირითი გოჭკონდუ. ცანაქ გოლა მოქთუ. ცა სუბუქი ქორტუკო, იხიქ მენდიმეტუ. ცას მო იწკერ, წოხლე იწკედი, ვარ მეგაბოჩას. ცხენის ნა გეხედუნ მელაფს, ნა ვარ გეხედუნ ვარ მელაფს. ცხენის ნა გეხედა, აღა ვორეჲა მო გიჩქიტას. ცხენიშ მტერი კუჩხე მუში რენ. ცხერი ფარათენ ოხორი ვა იკიდენ. წ წანა უკუნიშა ვარ გუიქთენ. წანას ნოსი ვა უღუნ, ემთუმანი ჲულუნ. წიწილას კუჩხე ვარ გედგაში, ვარ გეგაკიბინს. წიწილა ძირაში, შქა ნუტახი! წკარი ონჩახუთენ მჟა იყვენი? წკარიშენ გამაყონერი ჩხომის დაჩხირიშენ ვარ აშქურინენ. წკარი ემთი ვარ გჲულუნ, გემთი გჲულუნ. წკარი ოწაპუ-ოწაპუთენ ტიბა იყვენ. წკარიშ მომალერი წკარიქ ნიმერს. წკარი ჭიტაში რენ, ნენა დიდიში. წკარიშ კვანცა წკარიშ გზას ტროხუნ. წოხლე მა დო ოკულე სი. მეგრული და ლაზური ანდაზები, თბილისი 1994   © 2009 kolkhoba.org